អាជ្ញាធរខេត្តព្រះសីហនុថាពលដ្ឋ៥០០០គ្រួសារកំពុងខ្វះទឹកប្រើប្រាស់

អាជ្ញាធរខេត្តព្រះសីហនុបានឲ្យដឹងថា ប្រជាពលរដ្ឋរាប់ពាន់គ្រួសាររស់នៅក្នុងសង្កាត់ចំនួន៣កំពុងតែជួបបញ្ហាខ្វះ ទឹកស្អាតប្រើប្រាស់ ហើយអាជ្ញាធរប្រើរថយន្តដឹកទឹកចែកតាមផ្ទះ។​

ប្រធានការិយាល័យទំនាក់ទំនងសាធារណៈនិងពិធីការ នៃរដ្ឋបាលខេត្តព្រះសីហនុ លោក នងឌី ណារ៉ា បានប្រាប់VODនៅរសៀលនេះថា ប្រជាជននៅក្នុងសង្កាត់២ សង្កាត់៣ និងសង្កាត់៤ ដែលមានចំនួន៥០០០គ្រួសារកំពុងខ្វះទឹកប្រើប្រាស់ ដោយលោកបានបញ្ជាក់មូលហេតុថាមកពីមានកំណើនប្រជាពលរដ្ឋ កំណើនការសាងសង់ និងស្របពេលដែលខេត្តកំពុងរុះរើជួសជុលប្រព័ន្ធផ្គត់ផ្គង់ទឹក។

មន្ត្រីជាន់ខ្ពស់ខេត្តព្រះសីហនុរូបនេះឲ្យដឹងបន្ថែមទៀតថា អាជ្ញាធរខេត្តកំពុងប្រើប្រាស់ឡានទឹកបីគ្រឿងដំណើរការដឹកទឹកស្អាតជូនប្រជាជនក្នុងសង្កាត់ទាំងបីខាងលើនេះហើយ។ ប៉ុន្តែទោះជាយ៉ាងណា លោកបានបញ្ជាក់ថាការផ្គត់ផ្គង់ទឹកគឺមិនបាន១០០ភាគរយទេក្នុងស្ថានភាពនេះ។

មន្ត្រីរូបនេះឲ្យដឹងដែរថា ខេត្តព្រះស៊ីហនុត្រូវការផ្គត់ផ្គង់ទឹកចំនួន៦ម៉ឺនម៉ែត្រគូបក្នុងមួយថ្ងៃ ខណៈដែលខេត្តមានលទ្ធភាពផ្គត់ផ្គង់ទឹកស្អាតបានតែចំនួន៣ម៉ឺនម៉ែត្រគូបប៉ុណ្ណោះក្នុងមួយថ្ងៃនៅពេលនេះ។