មន្ត្រីសិទ្ធិមនុស្សជាន់ខ្ពស់របស់អង្គការសហប្រជាជាតិ គ្រោងនឹងមកបំពេញទស្សនកិច្ចរយៈពេល ១១ថ្ងៃនៅកម្ពុជានៅសប្ដាហ៍ក្រោយនេះ។ នេះបើតាមសេចក្ដីប្រកាសព័ត៌មានរបស់ការិយាល័យតំណាងពិសេសរបស់អង្គការសហប្រជាជាតិ។
សេចក្ដីប្រកាសព័ត៌មានកាលពីថ្ងៃសុក្រកន្លងមក បានឲ្យដឹងថា តំណាងពិសេសអង្គការសហប្រជាជាតិទទួលបន្ទុកសិទ្ធិមនុស្សកម្ពុជា អ្នកស្រី រ៉ូណា ស្មីត នឹងចាប់ផ្ដើមដំណើរទស្សនកិច្ចរបស់អ្នកស្រីនៅក្នុងប្រទេសកម្ពុជា ចាប់ពីថ្ងៃទី២៩ ខែតុលា រហូតដល់ថ្ងៃទី៨ ខែវិច្ឆិកាខាងមុខនេះ។
បើតាមសេចក្ដីប្រកាសព័ត៌មានដដែលនេះ អ្នករាយការណ៍ពិសេសរូបនេះ គ្រោងមកបំពេញទស្សនកិច្ចនៅកម្ពុជា តបទៅតាមការអញ្ចើញពីសំណាក់រដ្ឋាភិបាលកម្ពុជា។
អំឡុងពេលបំពេញទស្សកិច្ចនេះ អ្នកជំនាញសិទ្ធិមនុស្សរូបនេះ គ្រោងជួបពិភាក្សាជាមួយមន្ត្រីជាន់ខ្ពស់របស់រដ្ឋាភិបាលកម្ពុជា តំណាងអង្គការសង្គមស៊ីវិល និងសមាជិកនៃសហគមន៍ការទូតផងដែរ។
បើតាមគម្រោង អ្នកស្រី រ៉ូណា ស្មីត នឹងបិទបញ្ចប់ដំណើរទស្សនិច្ចរបស់អ្នកស្រី ជាមួយសន្និសីទសារព័ត៌មាននៅរសៀលថ្ងៃទី៨ ខែវិច្ឆិកា។
អំឡុងកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី ៣៩ កាលពីចុងខែកញ្ញាកន្លងមក អ្នកស្រី រ៉ូណា ស្មីត បានចោទសួរម្ដងរួចមកហើយ អំពីភាពត្រឹមត្រូវនៃការបោះឆ្នោតថ្នាក់ជាតិខែកក្កដាកន្លងទៅ បន្ទាប់ពីលោកស្រីរកឃើញថា មានការរំលោភសិទ្ធិមនុស្ស ការរំលាយគណបក្សសង្គ្រោះជាតិ និងការបង្ខំពលរដ្ឋឲ្យចេញទៅបោះឆ្នោត៕
