គិតត្រឹមថ្ងៃនេះ ព្រះមហាក្សត្រកម្ពុជា ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី បានឡើងគ្រងរាជសម្បត្តិអស់រយៈពេល ១៤ឆ្នាំហើយ បន្ទាប់ពីទ្រង់ត្រូវបានជ្រើសរើសឲ្យឡើងគ្រងរាជសម្បត្តិជំនួសព្រះបិតារបស់ទ្រង់។
ព្រះបាទសម្ដេច ព្រះបរមនាថ នរោត្ដម សីហមុនី ត្រូវបានក្រុមប្រឹក្សារាជសម្បត្តិជ្រើសតាំងជាព្រះមហាក្សត្រកម្ពុជា កាលពីថ្ងៃទី១៤ ខែតុលា ឆ្នាំ២០០៤ ពោលគឺកាលពី ១៤ឆ្នាំមុន។
ព្រះអង្គត្រូវបានជ្រើសតាំងជាព្រះមហាក្សត្រថ្មី ឡើងគ្រងរាជ្យជំនួសព្រះបិតាទ្រង់ អតីតព្រះមហាវីរក្សត្រ ព្រះបាទសម្ដេច នរោត្ដម សីហនុ ដែលបានប្រកាសដាក់រាជ្យសម្បត្តិនៅក្នុងឆ្នាំ២០០៤នោះផងដែរ។
មានព្រះជន្មាយុ ៦៥វស្សា ព្រះបាទសម្ដេច ព្រះបរមនាថ នរោត្ដម សីហមុនី គឺជាបុត្រាច្បងរបស់អតីតព្រះមហាក្សត្រ ព្រះបាទសម្ដេច នរោត្ដម សីហនុ និងព្រះមាតា សម្ដេចព្រះមហាក្សត្រីយ៍ នរោត្ដម មុនីនាថ។
ប្រសូត្រនៅក្នុងឆ្នាំ១៩៥៣ ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី បានបញ្ចប់ការសិក្សាជំនាញតន្ត្រី និងសិល្បៈបុរាណ នៅឯទីក្រុងប្រាក អតីតប្រទេសឆេកូស្លូវ៉ាគី។
យោងតាមព្រះរាជជីវប្រវត្តិ ព្រះបរមនាថ នរោត្ដម សីហមុនី អាចប្រាស្រ័យទាក់ទង ៤ភាសាផ្សេងគ្នា មានភាសាឆែក ភាសាបារាំង ភាសាអង់គ្លេស និងភាសារុស្ស៊ី៕