ស្ត្រីពពោះជំនួស៣២នាក់អាចនឹងដោះលែងក្រៅឃុំដើម្បីជួបជុំគ្រួសារវិញបន្ទាប់ពីពួកគេមានការប្តេជ្ញាចិត្ត ថានឹងចិញ្ចឹមទារកដែលពួកគេបានពពោះជំនួស ដោយមិនបញ្ជូនទារកទាំងនោះទៅក្រៅប្រទេស។
ក្រុមគ្រួសារស្រ្តីស៊ីឈ្នួលពពោះជំនួសបានទទូចឲ្យតុលាការនិងស្ថាប័នពាក់ព័ន្ធទាំងអស់ជួយអន្តរាគមន៍ដោះលែងស្រ្តីទាំងនោះឲ្យមានសេរីភាពវិញ ដោយពួកគេអះអាងថា ពួកគេមិនបានដឹងការពពោះជំនួសជាអំពើខុសច្បាប់ ហើយសន្យាថានឹងមិនបញ្ជូនទារកទាំងអស់នោះទៅឲ្យជបរទេសដែលជួលពួកគេនោះទេ។
ស្រ្តីម្នាក់ឈ្មោះ ស្រីអូន អាយុ៥០ឆ្នាំ ជាម្តាយក្មេករបស់ស្រ្តីពពោះជំនួសបានប្រាប់ វីអូឌីថា បន្ទាប់ពីកូនប្រសាររបស់អ្នកស្រីត្រូវបានចាប់ខ្លួន ក្រុមគ្រួសារបានជួបនិងសន្យាដល់សមត្ថកិច្ចនិងមន្រ្តីអង្គការមេត្រីអន្តរជាតិ (AIM) ថាពួកគេនឹងចិញ្ចឹមទារកនេះឲ្យធំធាត់ ហើយស្នើឲ្យមានការដោះលែងក្រៅឃុំស្រ្តីជាម្តាយដែលពពោះជំនួស។
អ្នកស្រី ស្រីអូន បាននិយាយថា៖ « ខ្ញុំឆ្លើយថាពេលចេញក្រៅឃុំអញ្ចឹង កូនហ្នឹងខ្ញុំត្រូវស្រឡាញ់ដូចកូនបង្កើត ចៅបង្កើត ត្រូវស្រឡាញ់ក្មេងអញ្ចឹងទៅ»។
អ្នកស្រីបានបន្ថែមថា ពេលនេះទារកកើតបានពីរខែហើយ ក្រុមគ្រួសារពិតជាចង់ចិញ្ចឹមទារកពិប្រាកដមែន៖
«យើងឆ្លើយ មិនមែនជាការឆ្លើយឲ្យរួចតែពីដៃដើម្បីឲ្យកូនយើងបានចេញក្រៅឃុំនោះទេ អត់ទេនេះជាការឆ្លើយពិត គឺខ្ញុំស្រឡាញ់ក្មេងហ្នឹង ហើយកូនខ្ញុំវាក៏ស្រឡាញ់ដែរ»។
ការិយាល័យប្រឆាំងការជួញដូរមនុស្ស រាជធានីភ្នំពេញកាលពីខែមិថុនា ឆ្នាំ២០១៨ បានឃាត់ខ្លួនស្រ្តីពពោះជំនួស៣២នាក់ និងមនុស្ស៥នាក់ទៀតជាមេខ្យល់ ក្នុងនោះមានជនជាតិចិនម្នាក់។ បន្ទាប់ពីឃាត់ខ្លួនពួកគេត្រូវបានបញ្ជូនទៅមន្ទីរពេទ្យមួយក្នុងទីក្រុងភ្នំពេញដោយមានការការពារពីមន្រ្តីមណ្ឌលកែប្រែ២ (ម២). ស្រ្តីជាង១០នាក់បានសម្រាលកូន ហើយអ្នកខ្លះសម្រាលបានកូនភ្លោះ។
នាយកប្រតិបត្តិអង្គការមេត្រីអន្តរជាតិ ហៅកាត់ថា AIM ប្រចាំនៅកម្ពុជា លោក ដុន ប្រ៊ូស្ទ័រ (Don Brewster) បានមានប្រសាសន៍ថា អង្គការរបស់លោកកំពុងធ្វើការជាមួយគណៈកម្មាធិការជាតិប្រយុទ្ធប្រឆាំងការជួញដូរមនុស្ស ដើម្បីបណ្តុះបណ្តាលដល់ស្រ្តីទាំង៣២នាក់ ឲ្យយល់ពីបញ្ហការជួញដូរមនុស្ស និងការពពោះជំនួស ហើយអង្គការបានផ្តល់អាហារ និងការចំណាយផ្សេងៗ ដល់ស្រ្តីនិងទារកទាំងនោះ ដែលកំពុងនៅក្នុងមន្ទីរពេទ្យ។
លោក ដុន ប្រ៊ូស្ទ័រ បានបន្តថា ស្រ្តីទាំងនោះអាចដោះលែងក្រៅឃុំប្រសិនបើពួកគេមានឆន្ទៈ ក្នុងការចិញ្ចឹមទារកទាំងនោះ។
លោក ដុន ប្រ៊ូស្ទ័រ បានមានប្រសាសន៍ថា៖ «ពួកគេអាចនឹងត្រូវមានសេរីភាពក្រោយពីមានភស្តុតាងឬការវាយតំលៃជាក់លាក់ ថាពួកគេពិតជាចង់ចិញ្ចឹមថែទាំក្មេងទាំងនោះពិតប្រាកដ។ តែយើងមិនអាចប្រាកដបានទេថាពួកគេមានឆន្ទៈពិតប្រាកដដើម្បីចិញ្ចឹមបីបាច់ក្មេងទាំងនោះទេ ហេតុដូច្នេះទើបគណៈកម្មការជាតិប្រយុទ្ធប្រឆាំងការជួញដូរមនុស្សនិងអនីតិជន នឹងមានយន្តការណ៏ក្នុងការត្រួតពិនិត្យតាមដាន ប្រសិនបើពួកគេត្រូវទៅរស់នៅក្នុងសហគមន៏របស់ពួកគេវិញជាចាំបាច់ដើម្បីធានាថាក្មេងទាំងនោះមិនត្រូវបានពួកគេជួញដូរក្រោយពួកស្ត្រីទាំងនោះមានសេរីភាព»។
ស្ត្រីពពោះជំនួសម្នាក់ឈ្មោះក្រៅថា ម៉ាលី សម្រាលបានកូនប្រុសម្នាក់ ហើយកំពុងស្នាក់នៅក្នុងមន្ទីរពេទ្យ បានប្រាប់វីអូឌីថា អ្នកស្រីស្រឡាញ់និងមានភាពស្និទ្ធស្នាលជាមួយកូនប្រុសដែលទើបកើត ជាងកូនដំបូងរបស់អ្នកស្រី។ អ្នកស្រីនិងក្រុមគ្រួសារនឹងចិញ្ចឹមទារកនេះ ហើយប្តីនិងកូនកំពុងរង់ចាំនៅផ្ទះ ប៉ុន្តែអ្នកស្រីមិនទាន់ប្រកដថា ពេលណានឹងដោះលែងនោះទេ។
អ្នកស្រី ម៉ាលី បាននិយាយថា៖ «ពាក្យនេះដូចជាពិបាកម៉្លេះ! ខ្ញុំមិនដឹងថាពេលណាទេតែធ្លាប់ឮអ្នកយាមប្រាប់ថាភ្ជុំរួច តែឥឡូវមិនទាន់ឮដំណឹងអីទៀតផង»។
អនុប្រធានអចិន្ត្រៃយ៍របស់គណៈកម្មាធិការប្រឆាំងការជួញដូរមនុស្សនិងអនីតិជន លោកស្រី ជូ ប៊ុនអេង បានប្រាប់វីអូឌីថា មេធាវីការពារឲ្យស្រ្តីទាំង៣២នាក់កំពុងរៀបចំឯកសារដាក់ទៅតុលាការដើម្បីពិចារណាឲ្យបន្ធូរបន្ថយទោស ក៏ដូចជាដោះលែងក្រៅឃុំបណ្តោះអាសន្នផងដែរ ហើយអ្នកស្រីសង្ឃឹមថាតុលាការនឹងពិចារណាលើចំនុចទាំងនេះ។
លោកស្រី ជូ ប៊ុនអេង បញ្ជាក់ថា៖ «ខ្ញុំចង់និយាយថា នឹងឲ្យតុលាការពិចារណា គេនឹងមិនកម្រិតទោស ម៉ាកស៊ីម៉ូម (maximum) ដល់ថ្នាក់៧ឆ្នាំ ១៤ឆ្នាំនោះទេ មិនមែនថាគាត់រួចខ្លួននោះទេ។ អញ្ចឹងលក្ខខណ្ឌវាអាស្រ័យតុលាការពិចារណាទៅអ្វីដែលគាត់ប្រព្រឹត្តិ វាត្រូវមានទោសកម្រិតណា?»។
តុលាការក្រុងភ្នំពេញកាលពីថ្ងៃទី៥ ខែកក្កដា ឆ្នាំ២០១៨ បានសម្រេចចោទប្រកាន់ស្រ្តីស៊ីឈ្នួលពពោះជំនួស៣២នាក់ ដោយចោទពីបទ «ការជួញដូរមនុស្សដោយឆ្លងដែន» ដែលស្ថិតក្នុងមាត្រា ១៦ នៃច្បាប់ស្តីពីការបង្រ្កាបការជួញដូរមនុស្សនិងអំពើធ្វើអាជីវកម្ម។