សារព័ត៌មានវៀតណាមបានចុះផ្សាយថា បុរសខ្មែរម្នាក់ និងវៀតណាមម្នាក់ បានស្លាប់នៅក្នុងពេលស្ថិតក្រោមការឃុំខ្លួនរបស់សមត្ថកិច្ចថៃ ប៉ុន្តែ តម្រួតថៃត្រូវបានដាក់ពិន័យតិចតួចប៉ុណ្ណោះ។
សារព័ត៌មាន VN Express បានចុះផ្សាយកាលពីចុងសប្ដាហ៍កន្លងមកនេះថា នគរបាលអន្តោប្រវេសន៍ជាន់ខ្ពស់ ២រូប នៃការិយាល័យអន្តោប្រវេសន៍ថៃ នៅសង្កាត់សាថន ក្នុងក្រុងបាងកក បានត្រឹមតែទទួលទណ្ឌកម្មវិន័យតែប៉ុណ្ណោះ សម្រាប់ការស្លាប់បុរសជនជាតិខ្មែរឈ្មោះ សាគី វ័យ ៥៥ឆ្នាំ និងជនជាតិវៀតណាមឈ្មោះ Robat វ័យ ៧២ឆ្នាំ កាលពីថ្ងៃទី២៤ ខែតុលា។
បើតាមសារព័ត៌មានដដែលនេះ បុរសទាំង ២នាក់នោះ ត្រូវបាននគរបាលថៃចាប់ខ្លួនអំឡុងពេលប្រតិបត្តិការយ៉ាងធំមួយ បង្ក្រាបលើជនអន្តប្រវេសន៍ខុសច្បាប់ ហើយក៏ត្រូវបានដាក់ឃុំខ្លួនជាមួយមនុស្ស ១៣នាក់ផ្សេងទៀត។
ដោយបានដកស្រង់សេចក្ដីរាយការណ៍របស់សារព័ត៌មាន The Nation របស់ថៃផងនោះ សារព័ត៌មានវៀតណាម បានចុះផ្សាយបន្តថា ជនជាប់ឃុំម្នាក់ បានកត់សម្គាល់ឃើញថា បុរសខ្មែរ និងវៀតណាម ពុំបានដកដង្ហើមនោះឡើយ ហើយជំរុញឲ្យមានការប្រកាសអាសន្ន។
ការធ្វើកោសលវិច្ឆ័យ ត្រូវបានសមត្ថកិច្ចរៀបចំធ្វើឡើង ប៉ុន្តែ មូលហេតុនៃការស្លាប់បុរសទាំង ២នាក់នោះ មិនត្រូវបានគេប្រកាសឲ្យដឹងនោះឡើយ។
រីឯតម្រួតថៃ ២នាក់ ដែលឃ្លាំមើលជនជាប់ឃុំទាំង ២នាក់នោះ មិនត្រឹមតែមិនអាចធានាសុវត្ថិភាពដល់ជនជាប់ឃុំទេ ប៉ុន្តែ ក៏មិនបានរាយការណ៍ករណីនេះទៅអាជ្ញាធរថ្នាក់លើដែរ។
តម្រួតថៃទាំង ២នាក់នោះ ត្រូវបានផ្ទេរការងារឲ្យទៅបម្រើការនៅតាមតំបន់ព្រំដែន។
ជនអន្តោប្រវេសន៍មួយចំនួន បានស្លាប់ដោយសារមូលហេតុផ្សេងៗអំឡុងពេលឃុំខ្លួននៅក្នុងប្រទេសថៃនៅក្នុងរយៈពេលប៉ុន្មានឆ្នាំថ្មីៗនេះ។
ប្រទេសថៃនៅមិនទាន់ផ្ដល់សច្ចាប័នដល់អនុសញ្ញាជនភៀសខ្លួនឆ្នាំ១៩៥១ របស់អង្គការសហប្រជាជាតិនៅឡើយទេ ហើយប្រទេសនេះក៏មិនទទួលស្គាល់ស្ថានភាពជនភៀសខ្លួន និងអ្នកស្វែងរកសិទ្ធិជ្រកកោនផងដែរ៕
