ក្នុងជំនួបដោយផ្ទាល់ក្នុងពិធីសម្ពោធរឿង«កូនពស់កេងកង» អ្នកនាង ឈួន សុវណ្ណឆៃ តារាចម្រៀងបានថ្លែងបញ្ជាក់ថា អ្នកនាងពេញចិត្តសម្ដែងភាពយន្តទម្រង់បុរាណមួយនេះយ៉ាងខ្លាំង ដោយក្នុងមួយរឿងនេះ អ្នកនាងបានចំណាយធនធានផ្ទាល់ខ្លួនលម្អខ្លួន បូករួមទាំងកាត់ឈុតអោយត្រូវនឹងសម័យកាលបុរាណផង អស់ប្រាក់ផ្ទាល់ខ្លួនលើសពីតម្លៃខ្លួនដែលទទួលបានរាប់មិនអស់។ អ្នកនាងបន្តទៀតថា អោយតែមានផលិតករស្នើអោយអ្នកនាងសម្ដែងភាពយន្តបែបទម្រង់បុរាណបែបនេះ គឺទោះជាអ្នកនាងត្រូវចំណាយអស់ពីលើច្រើនដង ហើយបានតម្លៃខ្លួនសឹងមិនរួចថ្លៃធ្វើខ្លួនមួយលើកៗប៉ុណ្ណា ក៏អ្នកនាងអត់ខ្វល់ដែរ សំខាន់គឺបានចូលរួម។
ខុសពីតារាភាគច្រើនដែលចង់បានការសម្ដែងអោយច្រើនដើម្បីពង្រីកកេរ្តិ៍ឈ្មោះផង និងដើម្បីទទួលបានចំណូលដាក់ហោប៉ៅផង សម្រាប់អ្នកនាង ឈួន សុវណ្ណឆៃ បានអះអាងថា អ្នកនាងសម្ដែងកុនមិនមែនដើម្បីបានលុយនោះទេ តែដើម្បីលើកស្ទួយវិស័យភាពយន្ត និងចង់បន្សល់ទុកស្នាដៃច្រើនជាង។ អ្នកនាងពោលថាមិនមានភាពយន្តណាមួយដែលអ្នកនាងទទួលសម្ដែងហើយក្នុងរយៈពេលចុងក្រោយ បានលុយអាចដាក់ហោប៉ៅនោះទេ ដោយសារតែអ្នកនាងចិត្តធំមិនចង់ឆិនឆៃសម្រាប់តួអង្គខ្លួនឯង ហើយអោយតែហ៊ានទទួលថតរឿងណា ក៏ចំណាយគ្រប់ផ្នែក មិនថាអលង្កា និងសំលៀកបំពាក់ជាដើម អស់លើសពីតម្លៃខ្លួនដែលទទួលបានច្រើនដង។
អ្នកនាងនិយាយថាកាលពីមុន អ្នកនាងទទួលថតភាពយន្តឆិនឆៃតាមអ្វីដែលខាងផលិតករបានតម្រូវពិតមែន ដោយសូម្បីតែខាងផលិតត្រៀមឈុត ឬគ្រឿងអលង្កាអោយស្លៀកយ៉ាងមិច ក៏តាមទាំងអស់ ដើម្បីអោយបានសល់លុយពីការទទួលបាន។ ប៉ុន្តែចាប់តាំងពីនាងអ្នកនាងបានក្លាយជាថៅកែជ្រូកមក អ្នកនាងមិនដែលបានលុយពីការថតកុន មកចាយ ឬឡូយឆាយទេ ដោយការទទួលថតមួយរឿង គឺហោចណាស់ក៏ចំណាយលុយក្នុងផ្ទះលើសពីតម្លៃខ្លួនដែលទទួលបានមិនក្រោមរាប់សិបដង។
អ្នកនាងបង្ហើប គ្រាន់តែចង់អោយត្រូវនឹងសាច់រឿង«កូនពស់កេងកង» គ្រាន់តែអ្នកនាងកុម្ម៉ង់គ្រឿងអលង្ការមាសអោយត្រូវនឹងសម័យកាលរហូតដល់ជាង៤៧តម្លឹង រួមមានខ្សែក្រវាត់ ក្រវិល ចិញ្ចៀន ខ្សែក និងកាបូបជាដើម។
អ្នកនាងនិយាយថា«ពីមុនយើងថតចេះតែបានលុយមែន ដោយសាររតែយើងអត់មានទិញអីថែមថយទេ ផលិតករអោយស្លៀកអី ពាក់អីយើងចេះតែតាមគាត់ តែឥឡូវមានណា គឺថាអោយតែដឹងថាផលិតករអោយស្លៀកឈុតទម្រង់យ៉ាងមិច ប្រើអលង្ការយ៉ាងមិច គឺយកលុយទៅកុម្ម៉ង់តែម្ដង ហើយឈុតទាំងហ្នឹងប្រើបានតែថតរឿងទេ តែធ្វើមិចបើយើងចង់ស្អាត»។
អ្នកនាងថាខ្លួនមិនមែនជាអ្នកមាននោះទេ ប៉ុន្តែដោយសារតែមានមុខរបរចិញ្ចឹមជ្រូកខ្លះ និងទិញផ្ទះលក់ផ្ទះមួយចំនួន ទើបអ្នកនាងលែងមានអារម្មណ៍ចង់បានលុយកាក់ពីវិស័យសិល្បៈ ហើយបានចាត់ទុកថាបន្តការងារសិល្បៈដើម្បីលើកស្ទួយទៅវិញ។ ជាក់ស្ដែងអ្នកនាងបានចំណាយថវិកាផ្ទាល់ខ្លួនជាច្រើនផលិតបទOriginal បែបខ្មែរ ដោយក្នុងការសម្ដែងភាពយន្តរឿង«កូនពស់កេងកង»អ្នកនាងក៏ប្រើធនធានលើសពីតម្លៃខ្លួនដែលត្រូវបានរាប់មិនអស់ ដើម្បីធ្វើខ្លួនអោយស្អាត និងត្រូវទម្រង់បុរាណ ដែលអ្នកនាងពោលថាដើម្បីលើកកម្ពស់សិល្បៈខ្មែរ។
អ្នកនាង ឈួន សុវណ្ណឆៃ បន្តថា អ្នកនាងសុខចិត្តទទួលច្រៀង និងសម្ដែងដោយមិនយកកម្រៃក៏បាន អោយតែទម្រង់សិល្បៈដែលអ្នកនាងចូលរួមជាការជួយសង្គម និងជួយលើកស្ទួយវិស័យវប្បធម៌ ដើម្បីទុកអោយកូនខ្មែរជំនាន់ក្រោយបានឃើញ។ អ្នកនាងប្រកាសថាខ្លួនស្រឡាញ់បំផុតគឺការសម្ដែងជាតួអង្គស្លៀកពាក់សម័យបុរាណ ដូច្នេះអោយតែបានសម្ដែងភាពយន្តបែបនេះ គឺទោះជាអស់ប៉ុន្មានក៏អ្នកនាងនឹងចាយលុយធ្វើខ្លួនអោយស្អាត ដើម្បីរួមចំណែកជួយដល់ផលិតករក្នុងសម្រិតសម្រាំងខ្លួន អោយសម និងត្រូវតាមបរិបទផងដែរ៕