អង្គការអន្តរជាតិមួយបានវាយតម្លៃសេរីភាពនៃការប្រើប្រាស់អ៊ីនធឺណិតនៅកម្ពុជា គឺនៅតែមានការរឹតត្បិតនៅឡើយ នឹងបានធ្លាក់៣ពិន្ទុបើធៀបនឹងឆ្នាំមុន។
ក្នុងរបាយការណ៍របស់អង្គការ Freedom House ដែលមានចំណងជើងថា Freedom on net 2018 ឬសេរីភាពលើប្រព័ន្ធអ៊ីនធឺណិតឆ្នាំ២០១៨ បានផ្ដល់ពិន្ទុដល់កម្ពុជា ៥៥លើ១០០ ដែលជាប់ចំណាត់ថ្នាក់លេខ ៤៤លើ៦៥ប្រទេស លើសពីនេះទៀតFreedom House បានសង្កត់ធ្ងន់ថាប្រទេសកម្ពុជាបានធ្លាក់ចំណាត់ថ្នាក់ជាបន្តបន្ទាប់ចាប់ពីឆ្នាំ២០១៤មក ដែលពេលនោះកម្ពុជាទទួលបានពិន្ទុ ៤៧លើ១០០។
ក្នុងចំណាត់ថ្នាក់នេះប្រទេសកម្ពុជាស្ថិតក្នុងចំណាត់ថ្នាក់ជាប្រទេសដែលមានសេរីភាពអ៊ីនធឺណិតដោយផ្នែក ហើយបើធៀបទៅប្រទេសក្នុងតំបន់អាស៊ានកម្ពុជាស្ថិតក្រោមប្រទេសហ្វីលីពីន សាំងហ្គាពួរ ម៉ាឡេស៊ី និងឥណ្ឌូណេស៊ី។
របាយការណ៍នោះបានលើកថា សេរីភាពរបស់ប្រជាជនក្នុងការប្រើប្រាស់អ៊ីនធឺណិតកាន់តែប្រសើរ ដោយថាប្រជាជនកម្ពុជាកាន់តែច្រើននាពេលបច្ចុប្បន្នមានលទ្ធភាពប្រើប្រាស់ Smart Phone ដែលអាចចូលប្រើអ៊ីនធឺណិតបាន ខណៈក្រុមហ៊ុនផ្ដល់សេវាអ៊ីនធឺណិតកាន់តែច្រើនផងដែរ តែជាមួយការរីកចំរើននេះគេហទំព័រមួយចំនួនត្រូវបានរាំងខ្ទប់ ហើយមាតិកាមួយចំនួនខ្លះទៀតក៏ត្រូវបានរដ្ឋាភិបាលមានវិធានការច្រោះ ឬហាមឃាត់ផងដែរ។
របាយការណ៍ដដែលនោះបន្ថែមថា ក្រៅពីវិធានការទាំងនេះសិទ្ធិសេរីភាពបញ្ចេញមតិក្នុងបណ្ដាញសង្គមក៏ត្រូវបានរឹតត្បិតផងដែរ ដោយការប្រើប្រាស់ប្រព័ន្ធច្បាប់ព្រហ្មទណ្ឌប្រឆាំងទៅនឹងអ្នកបញ្ចេញមតិដែលមាននិន្នាការមិនស្របតាមរដ្ឋាភិបាល ហើយសកម្មភាពនេះគឺកាន់តែខ្លាំងក្លាបន្ទាប់ពីគណបក្សសង្គ្រោះជាតិត្រូវបានរំលាយ។
របាយការណ៍នោះលើកឡើងថា៖ « សេរីភាពអ៊ីនធឺណិតនៅក្នុងប្រទេសកម្ពុជាកាន់តែយ៉ាប់យ៉ឺនដោយសារតែការបង្ក្រាបយ៉ាងទូលំទូលាយទៅលើសង្គមស៊ីវិល និងសំឡេងរិះគន់។ ការរឹតបន្តឹងច្បាប់ថ្មីស្តីពីសេរីភាពនៃការបញ្ចេញមតិបានធ្វើឱ្យមានការកើនឡើងចំនួនមនុស្សដែលត្រូវបានឃាត់ខ្លួនដោយសារសកម្មភាពអ៊ីនធឺណិតរបស់ពួកគេខណៈដែលរដ្ឋាភិបាលកំពុងតែមានការត្រួតពិនិត្យខ្លួនឯងកាន់តែខ្លាំង» ។
អ្នកនាំពាក្យនិយ័តករទូរគមនាគមន៍កម្ពុជាលោក អ៊ឹម វុត្ថា បានបដិសេធចំពោះការវាយតម្លៃរបស់Freedom House នេះដោយថាអង្គការនេះចេញរបាយការណ៍តាមតែការនឹកឃើញរបស់ខ្លួន។ ទោះជាយ៉ាងណាលោកបានឆ្លើយតបថា ប្រជាជនកម្ពុជាមានសិទ្ធិសេរីភាពពេញលេញលើប្រព័ន្ធអ៊ីនធឺណិត ហើយអ្វីដែលរដ្ឋាភិបាលមានវិធានការកន្លងមកនេះគឺជាការអនុវត្តច្បាប់។
លោកថា៖ « តើមានវេបសាយប៉ុន្មានដែលរដ្ឋបានបិទនោះ អំបាញ់មិញនិយាយរឿងCambodia Daily មួយ Cambodia Daily មិនពាក់ព័ន្ធនឹងរឿងបិទសិទ្ធិទេ។ វាពាក់ព័ន្ធរឿងគាត់មិនបង់ពន្ធជូនរដ្ឋ គាត់ធ្វើពាណិជ្ជកម្មក្នុងប្រទេសមួយបែរជាមិនគោរពច្បាប់ អាហ្នឹងវាខុសនឹងច្បាប់ហ្នឹង! មិនមែនពាក់ព័ន្ធនឹងការបញ្ចេញមតិហ្នឹងណា។ ហើយសួរថាតើកម្ពុជាមានបិទមិនឲ្យប្រជាជនបញ្ចេញមតិតាមបណ្ដាញសង្គម ឬក៏ក្នុងវេបសាយ វេបអីឯណា? ប៉ុន្តែក្នុងការបញ្ចេញមតិនោះសូមកុំឲ្យទៅប៉ះពាល់ច្បាប់ប្រទេសដែលបានហាមឃាត់តែប៉ុហ្នឹងគឺចប់ហើយ » ។
ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថាការរកឃើញរបស់freedom House នេះគឺអាចទទួលយកបាន ខណៈលោកលើកឡើងថាចាប់តាំងពីឆ្នាំ២០១៤មក សិទ្ធិបញ្ចេញមតិរបស់ពលរដ្ឋនៅលើបណ្ដាញសង្គមហាក់ត្រូវបានរឹតត្បិតកាន់តែខ្លាំង។
លោកថា៖ « បញ្ហាអនុវត្តន៍ច្បាប់វាជារឿងមួយហើយ ក៏ប៉ុន្តែយើងត្រូវឲ្យនិយមន័យឲ្យបានច្បាស់លាស់ ទៅលើបទល្មើសក្នុងការអនុវត្តន៍ច្បាប់ ដូចជាបទល្មើសនៃការញ៉ុះញ៉ុងឬក៏បរិហារកេរ្តិ៍បរិហារបង្កាច់គេជាដើម ត្រូវឲ្យនិយមនៃឲ្យបានច្បាស់លាស់ថាអ្វីជាបទញ៉ុះញ៉ុងអ្វីជាបទបរិហារបង្កាច់កេរ្តិ៍ឲ្យបានច្បាស់លាស់។ បើមិនអញ្ចឹងទេ គឺការបកស្រាយច្បាប់គឺកាន់តែពន្លាតធំហើយប៉ះពាល់ដល់សិទ្ធិសេរីភាពបញ្ចេញមតិរបស់ពលរដ្ឋ » ។
លោក អំ សំអាត ឲ្យជាយោបល់ថារដ្ឋាភិបាលគួរតែទទួលយកចំណុចខ្វះខាតរបស់ខ្លួន និងកែលំអរនូវចំណុចខ្វះខាតទាំងនេះ ដើម្បីផ្តល់ជាប្រយោជន៍ដល់ពលរដ្ឋ ក៏ដូចជា មុខមាត់ខ្លួនក្នុងឆាកអន្តរជាតិផងដែរ។
បើតាមរបាយការណ៍ Freedom on net 2018 នេះប្រទេស៣ដែលជាមានចំណាត់ថ្នាក់សេរីភាពអ៊ីនធឺណិតល្អជាងគេមាន អ៊ីស្លង់ អេស្តូនី និងកាណាដា ខណៈប្រទេស ស៊ីរី អេត្យូពី អ៊ីរ៉ង់ និងចិន មានចំណាត់ថ្នាក់អាក្រក់បំផុត។
និយ័តករទូរគមនាគមន៍កម្ពុជាបានឲ្យដឹងថាបច្ចុប្បន្នប្រជាពលរដ្ឋខ្មែរជាង៧០ភាគរយនៃប្រជាជនសរុបជាង១៦លាននាក់មានលទ្ធភាពប្រើប្រាស់ប្រព័ន្ធអ៊ីនធឺណិត ក្នុងនោះគណនីហ្វេសប៊ុកមានជិត៧លានគណនី៕