តាំងពីបានប្រឡូកក្នុងអាជីពសិល្បៈ គេកត់សម្គាល់ថាអ្នកនាង ចាន់ ផល្លា លេចធ្លោគួរអោយកត់សម្គាល់ក្នុងអាជីពជាពិធីការិនី ដោយក្រៅពីមានសំឡេងស្រួយស្រេះខុសដាច់ពីពិធីការិនីទាំងឡាយ អ្នកនាងក៏មានចរឹតស្រគត់ស្រគំបែបខ្មែរ និងមានត្រេមុខធម្មជាតិស្រស់ស្អាតផង។ ប៉ុន្តែនៅក្នុងពេលនេះ អ្នកនាងបែរជាប្រកាសផ្លាស់ប្ដូរអាជីពវិញម្ដង បើទោះជាមិនទាន់ដឹងថានឹងជួយអោយអ្នកនាងទទួលបានជោគជ័យដូចគ្នាអាជីពពិធីការិនី។
អ្នកនាង ចាន់ ផល្លា ថារយៈពេលច្រើនឆ្នាំ តាំងពីអ្នកនាងក្លាយជាតារាសិល្បៈ អ្នកនាងមិនធ្លាប់បានទទួលសម្ដែងទាល់តែសោះ ដោយសារតែមានគេទាក់ទង ហើយអ្នកនាងមិនទទួលព្រោះគិតថាមិនមានសមត្ថភាព។ អ្នកនាងទើបតែដាច់ចិត្តសម្ដែងក្នុងបទចម្រៀងថ្មីមួយរបស់ផលិតកម្មថោន ក្រោមការអញ្ជើញរបស់ផលិតករលោក មាស សុខរតនៈប៉ុណ្ណោះ ហើយក៏ឃើញថាមិនមានអ្វីលំបាកនោះទេ ថ្វីដ្បិតតែអ្នកនាងមិនធ្លាប់បានសម្ដែង។
អ្នកនាងនិយាយថា៖ «កន្លងមកខ្ញុំធ្លាប់តែធ្វើពិធីការិនី និងរាំពេលចូលឆ្នាំអីហ្នឹងគេប៉ុណ្ណោះ សម្រាប់រឿងសម្ដែងគឺអត់ដែលសោះហ្មង ចឹងបានខ្ញុំប្រាប់បងអ្នកដឹកថា បើខ្ញុំសម្ដែងមិនល្អកុំប្រកាន់ តែពួកគាត់ថាអត់អីទេ ហើយសរសើរថាខ្ញុំលេងបាន!»។
ក្នុងឈុតបទចម្រៀងនោះ អ្នកនាងថាផលិតករតម្រូវអោយអ្នកសម្ដែងជាម្ដាយដែលត្រូវបង្ហូរទឹកភ្នែករហូត ដោយសារតែប្ដីស្លាប់ចោល ហើយត្រូវអោបធាតុជាប់រហូត។ អ្នកនាងថាខ្លួនមិននឹកស្មានថាអាចយំបានយ៉ាងស្រួលតាមការចង់បានរបស់ផលិតករដល់ម្លឹងនោះទេ ទើបថាការសម្ដែងមិនមែនជារឿងដែលអ្នកនាងសម្ដែងមិនបានកើតនោះទេ ដោយអ្នកនាងប្រកាសថាស្ដាយ ព្រោះតែពេលកន្លងមកចេះតែប្រកែក ហើយមិនទុកចិត្តខ្លួនឯង។
អ្នកនាង ចាន់ ផល្លា បញ្ជាក់ថា អ្នកនាងនឹងសម្រេចចិត្តទទួលការសម្ដែងទាំងភាពយន្ត និងបទចម្រៀង ដោយអ្នកនាងមិនខ្លាចសម្រាប់ឈុតឆាកដែលខាងផលិតករ នឹងតម្រូវនោះទេ មិនថាការសម្ដែងនោះ ត្រូវអោយយំ ឬអោយធ្វើតួអ្វីក៏ដោយ។
អ្នកនាងនិយាយថា៖ «កាលពីមុនចេះតែខ្លាចថាលេងអត់កើត តែដល់ពេលបានសម្ដែងម្ដងចឹង គឺថាអត់ខ្លាចទេ! អោយតែមានអ្នកណាហៅសម្ដែង ទទួលអោយច្រើនតែម្ដង»។
អ្នកនាងមិនទាន់ដឹងថាការប្រកាសផ្លាស់ប្ដូរអាជីពរបស់ខ្លួនទទួលបានការចាប់អារម្មណ៍កម្រិតណានោះទេ ប៉ុន្តែក្រោយសម្រេចចិត្តទទួលយកការសម្ដែង អ្នកនាងរំពឹងថានឹងមានអ្នកទាក់ទងអោយសម្ដែងបន្តបន្ទាប់ បន្ទាប់ពីបទចម្រៀងរបស់លោក ពេជ្រ ថាណា ដែលអ្នកនាងបានសម្ដែងលើកដំបូងនៅខេត្តបាត់ដំបង នឹងចេញជាMV ឆាប់ៗ។
អ្នកនាងថាខ្លួននៅតែស្រឡាញ់អាជីពពិធីការិនី ប៉ុន្តែដោយសារតែអ្នកនាងក៏មានភារៈមិនសូវទំនេរ ទើបមិនហ៊ានចុះកុងត្រាជាមួយទូរទស្សន៍ណាមួយ ដោយទទួលធ្វើតែក្នុងកម្មវិធីខាងក្រៅ និងកម្មវិធីសប្បុរសធម៌។ អ្នកនាងថាខ្លួនបន្តអាជីពសិល្បៈទាំងពិធីការិនី និងសម្ដែង មិនមែនដើម្បីប្រជែងភាពល្បីទៀតទេ ប៉ុន្តែគ្រាន់តែចង់ប្រឡូកលេងៗកុំអោយមហាជនភ្លេចមុខ និងចង់សាកសម្ដែងវិញម្ដង អោយយល់ដឹងបានច្រើនមុខប៉ុណ្ណោះ៕