មន្ទីរពេទ្យមិត្តភាពខ្មែរ-សូវៀត(ពេទ្យរុស្សី)ឲ្យដឹងនៅថ្ងៃសៅរ៍នេះថា អតីតប្រធានមន្ទីរសន្តិសុខ«ស២១» លោក កាំង ហ្គេចអៀវ ហៅឌុច នឹងចេញពីពេទ្យទៅកន្លែងឃុំឃាំងនៅពន្ធនាគារក្នុងខេត្តកណ្តាលវិញនៅសប្តាហ៍ក្រោយ បន្ទាប់ពីស្ថានភាពជំងឺបានធូរស្រាល។
អនុប្រធានមន្ទីរពេទ្យមិត្តភាពខ្មែរ-សូវៀត(ពេទ្យរុស្សី) លោក វេជ្ជបណ្ឌិត ចាន់ វិចត្រ ឲ្យVODដឹងនៅព្រឹកនេះថា ស្ថានភាពសុខភាពឌុចបានធូរច្រើនហើយ ដោយថាគាត់អាចដកដង្ហើមវិញបានស្រួល និងដូរពីការព្យាបាលដោយថ្នាំចាក់មកថ្នាំលេបវិញ។
លោក វេជ្ជបណ្ឌិត ចាន់ វិចត្រ បញ្ជាក់ថានៅសប្តាហ៍ក្រោយនេះ ឌុច អាចត្រឡប់ទៅពន្ធនាគារវិញបានហើយ។
លោក កាំង ហ្គេចអៀវ ត្រូវបានបញ្ជូនទៅសង្គ្រោះនៅមន្ទីរពេទ្យជ័យជំនះក្នុងក្រុងតាខ្មៅ ខេត្តកណ្ដាល កាលពីថ្ងៃទី២០ ខែតុលា និងត្រូវបានបញ្ជូនបន្តទៅកាន់មន្ទីរពេទ្យមិត្តភាពខ្មែរសូវៀត បន្ទាប់ពីឃើញថាលោកឌុច មានជំងឺរាក និងពិបាកដកដង្ហើម។
ឌុចបច្ចុប្បន្នអាយុ៧៦ឆ្នាំ ត្រូវបានអង្គជំនុំជម្រះតុលាការកំពូល កាលពីថ្ងៃទី៣ កុម្ភៈ ឆ្នាំ២០១២ សម្រេចតម្កល់ពិរុទ្ធភាពរបស់លោកសម្រាប់ឧក្រិដ្ឋកម្មប្រឆាំងនឹងមនុស្សជាតិ និងការបំពារបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ ហើយបានសម្រេចផ្ដន្ទាទោសដោយដាក់ពន្ធនាគារអស់មួយជីវិត៕
