រដ្ឋមន្ត្រីក្រសួងពាណិជ្ជកម្មបានជំរុញប្រទេសឥណ្ឌាបង្កើតសាកលវិទ្យាល័យបណ្តុះបណ្តាលធនធានមនុស្សផ្នែកព័ត៌មានវិទ្យានិងកសិកម្ម ដោយថា ដើម្បីលើកស្ទួយសមត្ថភាពប្រកួតប្រជែងរបស់កម្ពុជា សំដៅទាក់ទាញការវិនិយោគផ្ទាល់ពីបរទេស និងការធ្វើពិពិធកម្ម(ពង្រីក) កំណើនសេដ្ឋកិច្ចជាតិ។
ក្នុងជំនួបទ្វេភាគីកម្ពុជាឥណ្ឌានៅទីស្តីការក្រសួងពាណិជ្ជកម្មនាព្រឹកម្សិលមិញ លោករដ្ឋមន្ត្រី ប៉ាន សូរស័ក្តិ បានស្នើសុំឥណ្ឌាជួយកៀងគរវិនិយោគិនមកសហការជាមួយក្រុមហ៊ុនក្នុងស្រុកដើម្បីបង្កើតសាកលវិទ្យាល័យ ដែលមានកម្មវិធីសិក្សាទាក់ទងព័ត៌មានវិទ្យានិងបច្ចេកទេសកសិកម្មទំនើបសម្រាប់និស្សិតកម្ពុជា។
លោក ប៉ាន សូរស័ក្តិ មានប្រសាសន៍ថា «ប្រទេសឥណ្ឌាមានភាពលេចធ្លោលើវិស័យបច្ចេកវិទ្យានិងមានកម្មវិធីសិក្សា ល្អៗទាក់ទងព័ត៌មានវិទ្យានិងកសិកម្ម ដូច្នេះសូមជួយនាំយកកម្មវិធីសិក្សាទាំងអស់នោះមកចែករំលែកដល់និស្សិតកម្ពុជាដើម្បីអភិវឌ្ឍន៍ប្រទេសនិងឆ្លើយតបតម្រូវការវិនិយោគិនបរទេស»។
ឯកអគ្គរដ្ឋទូតនៃសាធារណរដ្ឋឥណ្ឌាប្រចាំនៅកម្ពុជា អ្នកស្រី ម៉ានីកា ជែន បានសន្យានាំយកសំណើនេះទៅជម្រាបរដ្ឋាភិបាលនិងវិស័យឯកជនឥណ្ឌាឱ្យចូលមកបណ្តាក់ទុនលើវិស័យអប់រំនិងវិស័យកសិកម្ម ដើម្បីចូលរួមលើកស្ទួយសមត្ថភាពប្រកួតប្រជែងរបស់កម្ពុជានៅក្នុងប្រព័ន្ធពាណិជ្ជកម្មសាកល។
សម្រាប់ប្រធានអង្គការសេដាក លោក សម វិទូ យល់ថា មិនចាំបាច់ទេសម្រាប់បើកសកលវិទ្យាល័យកសិកម្មបន្ថែមព្រោះចំណាយថវិកាច្រើន ដោយថា អាចមានជាការស្នើសុំអ្នកជំនាញមកចូលបង្រៀននៅសាកលវិទ្យាដែលមានស្រាប់ជាការល្អជាង។
លោក សម វិទូ មានប្រសាសន៍ថា «រឿងមួយគឺសកលវិទ្យាល័យដែលមាន ចាស់ៗហ្នឹងសិស្សស្គាល់ច្រើនហើយ។ ទីពីរធ្វើការសហប្រតិបត្តិការគ្នាវិញ ការផ្លាស់ប្តូរសាស្ត្រាចារ្យ ការផ្លាស់ប្តូរទស្សនកិច្ចរបស់និសិត្សដើម្បីឲ្យពួកគាត់យល់ដឹង វាជាជាងការចំណាយលុយទៅលើការបើកសាកលវិទ្យាល័យមួយថ្មី ប៉ុន្តែបើសិនជាយើងយកលុយទាំងអស់ហ្នឹងមកគាំទ្រវិស័យសាធារណៈ វិស័យឯកជនវាជួយបានច្រើនជាង!»។
ទោះជាយ៉ាងណា អ្នកស្រី ម៉ានីកា ជែន ក៏មានបំណងអញ្ជើញវិស័យឯកជនកម្ពុជាទៅចូលរួមព្រឹត្តិការណ៍ពិព័រណ៍ពាណិជ្ជកម្មនិងជំនួបធុរកិច្ច សំខាន់ៗនៅក្នុងប្រទេសឥណ្ឌានាពេលខាងមុខផងដែរ។
