អាជ្ញាធរដែនដី និងក្រសួងស្ថាប័នពាក់ព័ន្ធបានបង្កើតជាគណៈកម្មការមួយក្នុងការរៀបចំផែន ការនៅក្នុងខេត្តសៀមរាប ដើម្បីឲ្យក្លាយជាគោលដៅនៃការកំសាន្ត និងទាក់ទាញភ្ញៀវ ទេសចរ បរទេសឲ្យស្នាក់នៅកម្ពុជាបានយូរ។
តាមការចុះផ្សាយនៅក្នុងផេកហ្វេសប៊ុករបស់ក្រសួងទេសចរណ៍កាលពីថ្ងៃទី៣១ខែតុលាគឺគណៈកម្មការចម្រុះនេះប្រជុំម្តងរួចមកហើយកាលពីថ្ងៃទី៣០ខែតុលា ដែលមានសមាសភាព ចូលរួមពី លោក ថោង ខុន រដ្ឋមន្រ្តីក្រសួងទេសចរណ៍ជាប្រធានគណៈកម្មការ លោកស្រី ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈជាអនុប្រធាន និងលោក ឃឹម ប៊ុនសុង អភិបាលខេត្តសៀមរាបជាអនុប្រធាន។ ការប្រជុំលើកទី១ ដែលធ្វើឡើងនៅសាលាខេត្ត សៀមរាបនេះ នេះក៏មានការចូលរួមពីតំណាងក្រសួង-ស្ថាប័នពាក់ព័ន្ធ ដែលជាសមាជិកគណៈកម្មការ និងអាជ្ញាធរពាក់ព័ន្ធក្នុងខេត្តសៀមរាបដែរ។
គណៈកម្មការនេះ បង្កើតឡើងមានគោលបំណងរៀបចំផែនការមេសម្រាប់ការអភិវឌ្ឍវិស័យទេសចរណ៍ នៅក្នុងខេត្តសៀមរាប ដើម្បីសិក្សារៀបចំបង្កើតឱ្យមានផលិតផលទេសចរណ៍ថ្មីៗក្នុងខេត្តសៀមរាប សំដៅពន្យារពេលនៃការស្នាក់នៅរបស់ភ្ញៀវទេសចរអន្តរជាតិ។
