អតីតអ្នកថតរូបនៅគុកទួលស្លែងរបស់របបខ្មែរក្រហម បានឲ្យដឹងថា លោកនឹងប្រមូលស្នាមមេដៃអ្នកគាំទ្រឲ្យបានគ្រប់ចំនួន ហើយដាក់ទៅក្រសួងមហាផ្ទៃ ដើម្បីបង្កើតគណបក្សនយោបាយមួយជាផ្លូវការ។
អតីតអ្នកថតរូបគុកទួលស្លែង ឬមន្ទីរឃុំឃាំង ស-២១ លោក ញ៉ែម អេន បានស្នើសុំបង្កើតគណបក្សនយោបាយថ្មីមួយដាក់ឈ្មោះថា «គណបក្សពលកររុងរឿង» កាលពីចុងខែតុលាកន្លងមកនេះ។ នេះបើតាមលិខិតមួយច្បាប់ដែលរដ្ឋមន្ត្រីក្រសួងមហាផ្ទៃ លោក ស ខេង ឆ្លើយតបទៅនឹងស្ថាប័នបក្សរូបនេះកាលពីថ្ងៃទី២ ខែវិច្ឆិកា។
បើតាមលិខិតដដែលនោះ លោក ស ខេង បានអនុញ្ញាតឲ្យលោក ញ៉ែម អេន បង្កើតគណបក្សនយោបាយហើយ ប៉ុន្តែ តម្រូវឲ្យបំពេញលក្ខខណ្ឌនានា មុននឹងអាចធ្វើសកម្មភាពបាន។
លោក ញ៉ែម អេន បានប្រាប់វីអូឌីនៅថ្ងៃនេះថា សម្រាប់នីតិវិធីបន្ត លោកនឹងប្រមូលស្នាមមេដៃពីអ្នកគាំទ្រឲ្យបានគ្រប់ចំនួន សម្រាប់ដាក់ទៅក្រសួងមហាផ្ទៃ មុននឹងធ្វើសមាជបក្សជាផ្លូវការ។
អតីតអ្នកថតរូបនៅគុកទួលស្លែងរូបនេះ អះអាងថា គណបក្សពលកររុងរឿងរបស់លោក ត្រៀមខ្លួនសម្រាប់ចូលរួមប្រកួតប្រជែងក្នុងការបោះឆ្នោតនៅឆ្នាំ២០២២ និងឆ្នាំ២០២៣ ជាមួយគោលបំណងប្រែក្លាយកម្ពុជាទៅជាប្រទេសនីតិរដ្ឋ និងប្រកបដោយលទ្ធិប្រជាធិបតេយ្យសេរីពហុបក្សពិតប្រាកដ។
លោកមានប្រសាសន៍ថា៖ «ប្រកាន់គោលជំហលិទ្ធិប្រជាធិបតេយ្យសេរីពហុបក្ស ដើម្បីដំណោះស្រាយរកចំណុចរសើប ចំណុចអវិជ្ជមានរបស់រដ្ឋាភិបាល ធ្វើមិនបានដូចជា បញ្ហាផ្សេងៗទៀត ខ្ញុំនឹងកែទម្រង់។ គណបក្សខ្ញុំនេះ ប្រសិនបើដំណើរការហើយ ខ្ញុំអត់មានគោលបំណងទៅដុតផ្ទះនរណាទេ។ សំខាន់គោលបំណងរបស់គណបក្ស គឺដើម្បីយកសិទ្ធិសេរីភាព អញ្ចឹងបានយកឈ្មោះដាក់ថា ពលករ គឺតំណាងឱ្យកម្មករ កសិករ ពលករតែម្តង»។
កើតនៅក្នុងឆ្នាំ១៩៦១ លោក ញ៉ែម អេន ត្រូវបានគេរកឃើញថា ជាអតីតក្រុមតស៊ូរបស់ខ្មែរក្រហម ដែលបានចូលរួមចលនាតស៊ូក្នុងព្រៃជាមួយក្រុមលោក ខៀវ សំផន ហ៊ូ យន់ ហ៊ូ នឹម កាលពីឆ្នាំ១៩៧១ ដល់ឆ្នាំ១៩៧៥ ក្នុងចលនាកុមារឈានមុខ មានតួនាទីដឹកជញ្ជូនគ្រាប់ទៅសមរភូមិ។
នៅឆ្នាំ១៩៧៥ លោកត្រូវបានខាងអង្គការចាត់តាំងឱ្យមកកាន់រាជធានីភ្នំពេញ និងបញ្ជូនទៅប្រទេសចិន ដើម្បីទទួលការបណ្តុះបណ្តាលជំនាញថតកុន។ ក្រោយមកនៅឆ្នាំ១៩៧៦ អង្គការក៏បានចាត់តាំងលោកឲ្យធ្វើជាអ្នកថតរូបនៅមន្ទីរសន្តិសុខ ស-២១ ឬ ហៅថាគុកទទួលស្លែងរហូតដល់ឆ្នាំ១៩៧៩។
បន្ទាប់ពីរបបខ្មែរក្រហមត្រូវបានដួលរលំ លោកបានចូលរួមជាមួយចលនាតស៊ូខ្មែរក្រហមបន្តទៀតរហូតដល់ឆ្នាំ១៩៩៥ ទើបលោកផ្ដាច់ខ្លួន និងចុះចូលជាមួយរដ្ឋាភិបាល។
នៅឆ្នាំ២០០៥ លោកបានតំណែងជាអភិបាលរងស្រុកអន្លង់វែង ខេត្តឧត្តរមានជ័យ រហូតដល់ឆ្នាំ២០១៤។ នៅឆ្នាំដដែលនោះ លោកបានចុះចូលជាមួយគណបក្សសង្រ្គោះជាតិរហូតដល់ឆ្នាំ២០១៥ មុននឹងលោកចូលរួមជាមួយគណបក្សអំណាចខ្មែររបស់លោក សួន សេរីរដ្ឋា នៅឆ្នាំ២០១៦។
រួមរស់ជាមួយគណបក្សអំណាចខ្មែរបានជិត ១ឆ្នាំ លោក ញ៉ែម អេន ក៏ចេញទៅបង្កើតគណបក្សថ្មីមួយឈ្មោះថា គណបក្សគ្រួសារខ្មែរ នៅឆ្នាំ២០១៧ ប៉ុន្តែ គណបក្សនេះត្រូវបានក្រសួងមហាផ្ទៃសម្រេចលុបចោលទៅវិញ ដោយសារតែមិនបំពេញតាមលក្ខខណ្ឌច្បាប់។
នៅឆ្នាំ២០១៧ដដែល រហូតដល់មុនថ្ងៃលោកបង្កើតគណបក្សពលកររុងរឿង លោកបានមកចូលរួមជីវិតនយោបាយជាមួយគណបក្សខ្មែរសាធារណរដ្ឋ ដឹកនាំដោយលោក លន់ រិទ្ធិ កូនប្រុសរបស់មេដឹកនាំរបបសាធារណរដ្ឋខ្មែរ លោក លន់ នល់៕
