រដ្ឋាភិបាលកម្ពុជា កំពុងតាមដានវាយតម្លៃទៅលើការវាយប្រហារដោយក្រុមអនាមិកលើបណ្ដាញអ៊ីនធឺណិតនៅកម្ពុជាជិតមួយសប្ដាហ៍មកនេះ មុននឹងសន្និដ្ឋានបញ្ចប់នាសប្ដាហ៍ក្រោយ។
ជាង១សប្ដាហ៍មកនេះ សេវាអ៊ីនធឺណិតនៅកម្ពុជា បានរអាក់រអួល ហើយក្រុមហ៊ុនផ្គត់ផ្គង់សេវាអ៊ីនធឺណិតនៅកម្ពុជា បានប្រកាសថា បណ្ដាញអ៊ីនធឺណិតកម្ពុជា រងការវាយប្រហារពីក្រុមហ៊ែកឃ័រតាមរយៈមេរោគកុំព្យូទ័រមួយប្រភេទហៅថា DDoS។
អ្នកនាំពាក្យក្រសួងប្រៃសណីយ៍ និងទូរគមនាគមន៍ លោក ខូវ មករា បានឲ្យ VOD ដឹងថា ការវាយប្រហារនេះបានស្ងប់ស្ងាត់ហើយកាលពីម្សិលមិញ ខណៈក្រុមការងារក្រសួងកំពុងវាយតម្លៃទៅលើការវាយប្រហារនេះ មុននឹងចេញសេចក្ដីសន្និដ្ឋានមួយនាពេលខាងមុខ។
លោកថា៖ «យើងអត់ដឹងថា អ្នកណាជាអ្នកវាយប្រហារ យើងអត់ទាន់បានកំណត់ទេ ហើយវាយប្រហារក្នុងគោលបំណងអីរបស់គាត់ហ្នឹង ក៏យើងអត់ដឹងដែរ តែប្រភេទ DDoS ហ្នឹង ផលប៉ះពាល់របស់វា គឺធ្វើឲ្យសេវាមានការរអាក់រអួល»។
យោងតាមគេហទំព័រការិយាល័យឆ្លើយតបបញ្ហាបន្ទាន់នៃកុំព្យូទ័រ camcert.gov.kh បានឲ្យដឹងថា ការវាយប្រហារ DDoS ជាការវាយប្រហារលើសេវាកម្មអ៊ីនធឺណិត ដើម្បីធ្វើការរំខានដល់សេវាកម្ម ដើម្បីឱ្យអ្នកប្រើប្រាស់ផ្សេងទៀតមិនអាចប្រើបាន ឬភ្ជាប់ដំណើរការបាន ខណៈវិធានការទប់ស្កាត់ការរំខាននេះ ក្រុមហ៊ុនផ្គត់ផ្គង់សេវាអ៊ីនធឺណិត ត្រូវមានការវិភាគចរាចរណ៍ និងការរាំងខ្ទប់ ការបិទចន្លោះវាយប្រហារ និងបង្ការតាមរយៈ IP របស់ប្រព័ន្ធអ៊ីនធឺណិត។
ទោះជាយ៉ាងណា វិធាននេះមានតម្លៃថ្លៃដែលធ្វើឲ្យក្រុមហ៊ុនសេវាអ៊ីនធឺណិតមួយចំនួនគ្មានលទ្ធភាពប្រើប្រាស់។
ក្នុងសេចក្ដីប្រកាសព័ត៌មានកាលពីដើមសប្ដាហ៍នេះ ក្រុមហ៊ុនប្រតិបត្តិករអ៊ីនធឺណិតនៅកម្ពុជា EZECOM បានលើកឡើងថា ការវាយប្រហារពីសំណាក់មេរោគ DDoS នៅក្នុងសប្ដាហ៍នេះ ជាការវាយប្រហាររបស់ក្រុមអនាមិកដ៏ធំបំផុតដែលមិនធ្លាប់មាននៅកម្ពុជានាពេលកន្លងមក។
យោងតាមក្រសួងប្រៃសណីយ៍ និងទូរគមនាគមន៍ បច្ចុប្បន្នមានក្រុមហ៊ុនបម្រើសេវាអ៊ីនធឺណិតមានជាង៣០ប្រតិបត្តិករ ខណៈបច្ចុប្បន្នប្រជាពលរដ្ឋខ្មែរជាង៧០ភាគរយនៃប្រជាជនសរុបជាង១៦លាននាក់មានលទ្ធភាពប្រើប្រាស់ប្រព័ន្ធអ៊ីនធឺណិត៕
