មេដឹកនាំបក្សប្រឆាំងកំពុងជាប់ឃុំខ្លួននៅក្នុងផ្ទះ បានអំពាវនាវឲ្យមានការរួបរួមជាតិ ប៉ុន្តែ លោកនាយករដ្ឋមន្ត្រី ហ៊ុន សែន បានថ្លែងនៅថ្ងៃនេះថា បើមិនបង្កើតវប្បធម៌ទុកចិត្តគ្នាទេ ការបង្រួបបង្រួមជាតិ នឹងមិនអាចកើតមានបានឡើយ។
ក្នុងលិខិតមួយច្បាប់ដែលត្រូវបានផ្សព្វផ្សាយនៅលើទំព័រហ្វេសប៊ុករបស់លោកនោះ មេដឹកនាំអតីតបក្សប្រឆាំង លោក កឹម សុខា បានផ្ញើសារអបអរសាទរខួបលើកទី ៦៥ នៃទិវាបុណ្យឯករាជ្យជាតិ ៩ វិច្ឆិកា ១៩៥៣ -៩ វិច្ឆិកា ២០១៨។
លិខិតនេះ លើកឡើងថា ការទាមទារ និងការថែរក្សាការពារឯករាជ្យជាតិពិតប្រាកដទៅបាន គឺអាស្រ័យលើការរួបរួមជាតិ។ លិខិតនោះបានរៀបរាប់ទៀតថា ជាការពិតណាស់ កម្ពុជានឹងមិនអាចមានឯករាជ្យជាតិពិតប្រាកដបានឡើយ បើខ្មែរយើងបែកបាក់គ្នា។
មេធាវីការពារក្តីរបស់លោក កឹម សុខា រួមមានលោក ផែង ហេង លោក ផាន់ ច័ន្ទសាក់ លោក ចាន់ ចេន សុទ្ធតែប្រាប់ថា ពួកលោកនៅមិនទាន់ដឹងអំពីរឿងលិខិតនេះនៅឡើយទេ។
នេះជាលើកទីពីរហើយ ដែលលិខិតរបស់លោក កឹម សុខា ត្រូវបានផ្សព្វផ្សាយចេញជាសាធារណៈ បន្ទាប់ពីលោកត្រូវបានអាជ្ញាធរប្តូរការឃុំខ្លួនពីពន្ធនាគារត្រពាំងផ្លុងខេត្តត្បូងឃ្មុំ មកឃុំខ្លួននៅផ្ទះរបស់លោកនៅរាជធានីភ្នំពេញវិញ។
ប៉ុន្តែ លោកនាយករដ្ឋមន្ត្រីហ៊ុន សែន ថ្លែងនៅថ្ងៃនេះដែរថា បើមិនបង្កើតវប្បធម៌ទុកចិត្តគ្នាទេ ការបង្រួបបង្រួមជាតិ នឹងមិនអាចកើតឡើងនោះឡើយ។
លោក ហ៊ុន សែន ថ្លែងថា៖ «បើយើងបន្ធូបន្ថយឱ្យវា វាមិនព្រមបន្ធូបន្ថយឱ្យយើង តើយើងបន្ធូបន្ថយឱ្យធ្វើអី? ដាក់ឯងម៉ាម៉ាំងចប់ ម៉ាម៉ាំចប់។ បើអ្នកឯងចង់បានវប្បធម៌បង្រួបបម្រួម ឯងធ្វើឱ្យស្រួលទៅ ឯងធ្វើឱ្យគេទុកចិត្តទៅ។ បើឯងមិនចង់បានការសម្របម្រួលឯងធ្វើអាក្រក់ទៅ។ អាធ្វើអាក្រក់ហ្នឹងហើយ ដែលជាការផ្តល់សញ្ញាថា យើងមិនអត់ឱន ព្រោះ វាគ្មានជម្រើសណាផ្សេង»។
អ្នកស្រាវជ្រាវការអភិវឌ្ឍសង្គម លោក បណ្ឌិត មាស នី មានប្រសាសន៍ថា អ្នកនយោបាយទាំងពីរ ហាក់មើលឃើញពីចំណុចរួមគ្នាទាក់ទងឯករាជ្យជាតិ គឺទាមទារឱ្យមានការស្រុះស្រួលគ្នា ពិសេសការផ្សះផ្សាជាតិជារឿងសំខាន់។ លោកថា សារនយោយរបស់ លោកនាយករដ្ឋមន្ត្រី ហ៊ុន សែន វិញ ក៏មិនខុសដែរ ដោយថា ការរួបរួមគ្នាទៅបាន គឺទាល់តែមានការទុកចិត្តគ្នា និងស្មោះត្រង់ជាមួយគ្នា។
លោក មាស នី មានប្រសាសន៍បន្ថែមថា៖ «នៅពេលមានបញ្ហាអីមួយ មួយរត់ទៅពឹងម្ខាង មួយទៀតរត់ទៅពឹងម្ខាងទៀត។ អាហ្នឹង ក៏មិនមែនជាការផ្សះផ្សាជាតិដែរ ហើយការផ្ញើពាក្យវ៉ៃប្រហារគ្នាតាមបែបខ្លាំងៗ ធ្ងន់ពេកហ្នឹង ក៏មិនមែនជាការសាងទំនុកចិត្តគ្នាដែរ។ ប៉ុន្តែ ខ្ញុំគាំទ្រនូវចំណុចសំខាន់ដែលអ្នកទាំងពីរលើកឡើង ទីមួយ បើមិនមានការផ្សះផ្សាជាតិ វាមិនមានឯករាជ្យជាតិទេ ប៉ុន្តែ ការផ្សះផ្សាជាតិ ក៏ត្រូវការទុកចិត្តគ្នាដែរបាទ។ ប៉ុន្តែ រឿងសំខាន់តើអ្នកនយោបាយត្រូវត្រៀមអត្តចរឹក ត្រូវត្រៀមសកម្មភាពអីខ្លះដែលខ្លួនឯងត្រូវធ្វើដើម្បីឱ្យមានទំនុកចិត្តគ្នា អាហ្នឹងបានទៅរួចបាទ»។
យ៉ាងណាក៏ដោយ វប្បធម៌សន្ទនាត្រូវបានបង្កើតឡើងដោយលោកនាយករដ្ឋមន្ត្រី ហ៊ុន សែន និងអតីតប្រធានគណបក្សសង្គ្រោះជាតិ លោក សម រង្ស៊ី កាលពីឆ្នាំ២០១៤។ វប្បធម៌សន្ទនានេះ កើតឡើងក្រោយពីអតីតគណបក្សសង្រ្គោះជាតិព្រមចូលប្រជុំសភាតាមការចង់បានរបស់បក្សកាន់អំណាច ក្រោយពីអតីតបក្សប្រឆាំងធ្វើពហិកាជិត ១ឆ្នាំប្រឆាំងនឹងលទ្ធផលបោះឆ្នោតឆ្នាំ២០១៣ ប៉ុន្តែ វប្បធម៌សន្ទនានេះ បានបាត់បង់ទៅវិញ៕
