មានការភ្ញាក់ផ្អើលមិនតិចទេ បន្ទាប់ពីលោក ឆាយ បូរ៉ា ម្ចាស់ផលិតកម្មដើមត្នោត ដែលត្រូវគេស្គាល់ថាជាប្រធានសមាគមន៍ភាពយន្តកម្ពុជា ក្រោមការបោះឆ្នោតផ្លូវការកាលពីអំឡុងខែធ្នូ ឆ្នាំ២០១៧ ស្រាប់តែប្រកាសផ្លូវការថាលោកនឹងលាចេញពីតំណែង ដោយបានទាំងប្រកាសថា នឹងមិនអាចបន្តអោយដល់ចប់អាណត្តិដែលទើបឡើងអង្គុយនោះផង។ ជាមួយនឹងការប្រកាសលាឈប់ដោយរំលេចនូវចម្ងល់នេះ លោកបានផ្ដល់កិច្ចសម្ភាសន៍ពាក់ព័ន្ធមូលហេតុនៃការសម្រេចចិត្ត។
លោក ឆាយ បូរ៉ា និយាយថាលោកពិតជាសម្រេចចិត្តច្បាស់ណាស់មុននឹងឈានដល់ការប្រកាសជាសាធារណៈ ដោយបានបញ្ជូនការសម្រេចចិត្តរបស់ខ្លួនតាមក្រុមសំខាន់ៗដើម្បីអោយមានការដឹងឮផង កាលពីរសៀលថ្ងៃទី១១ វិច្ឆិកា។ លោកថាមានបញ្ហាច្រើនដែលលោកមិនចង់បរិយាយ តែអ្វីដែលលោកមិនអាចបន្តដំណើរក្នុងតំណែងជាប្រធានសមាគមន៍អោយបានចប់អាណត្តិ គឺមានហេតុផល។
លោកបានត្រឹមតែបង្ហើបអោយដឹងពីតម្រុយនៃបញ្ហាតិចតួច គឺបណ្ដាលមកពីលោកមិនអាចសម្រេចនូវអ្វីដែលបានគម្រោងទុកតាមការចង់បាន ដែលលោកយល់ថាបើបន្តកាន់តំណែងជាប្រធាននៅក្នុងសមាគមនេះទៀត គឺពិតជាមិនធ្វើអោយលោកស្រឡះចិត្ត។ ក្នុងនោះហេតុផលដែលលោកកាន់តែរយាលលើការគ្រប់គ្រងផលិតកម្មចាប់តាំងពីបានក្លាយជាប្រធានសមាគម ក៏ជាហេតុផលធំមួយ ដែលចាំបាច់ត្រូវតែអោយលោកដកខ្លួន។
លោក ឆាយ បូរ៉ា និយាយថា៖ «បើនិយាយទៅគឺមានបញ្ហាច្រើន មុននឹងខ្ញុំសម្រេចចិត្តលាឈប់ពីប្រធានសមាគមហ្នឹង ប៉ុន្តែបញ្ហាសំខាន់គឺខ្ញុំមិនចង់បន្តកាន់តំណែងទាំងកិច្ចនេះក៏មិនសម្រេច ហើយកិច្ចការនោះក៏សម្រេច ក្នុងពេលដែលផលិតកម្មដើមត្នោតរបស់ខ្ញុំ គឺអត់មានអ្នកគ្រប់គ្រងច្បាស់លាស់ ដោយសារតែខ្ញុំរវល់តែតំណែងប្រធានហ្នឹង!»។
លោកប្រកាសថាខ្លួនបានជូនដំណឹងទៅកាន់គណកម្មការសមាគមរួចរាល់អស់ហើយ ដោយលោកនឹងប្រគល់ភារកិច្ច និងកាតព្វកិច្ចអោយក្រុមគណកម្មការ ដើម្បីផ្ដល់សិទ្ធិអោយគណកម្មការជ្រើសតំណែងប្រធានបណ្ដោះអាសន្ន ឬអាចមានការបោះឆ្នោតជាថ្មី ផ្អែកតាមការសម្រេចរបស់សមាគម។
លោក ឆាយ បូរ៉ា បញ្ជាក់ថាលោកបានដឹកនាំសមាគមនេះចំនួន៣ឆ្នាំមកហើយ ហើយក៏គ្រប់គ្រាន់នោះដែរ ដែលលោកនឹងត្រូវទម្លាក់ការងារទាំងមូលអោយទៅបុគ្គលផ្សេងវិញ ដោយលោកមិនអាចបន្តតំណែងមួយនេះទៀតឡើយ បើទោះជាសមាគមភាពយន្តកម្ពុជានៅត្រូវការកម្លាំងរបស់លោក។
យ៉ាងណាមិញ លោកថាខ្លួននឹងនៅជាសមាជិករបស់សមាគមរហូតដល់ចប់៣ឆ្នាំបន្ត ដោយមិនមែនលាចេញពីតំណែងប្រធានហើយដាច់ទំនាក់ទំនងមិនជួយការងារទាំងស្រុងនោះទេ។
