លោកនាយករដ្ឋមន្ត្រី ហ៊ុន សែន ក្នុងនាមតំណាងឱ្យប្រទេសកម្ពុជាលើកឡើងថា កម្ពុជា មានជំនឿយ៉ាងមុតមាំថា ចិន គឺជាដៃគូយុទ្ធសាស្ត្រមួយ ដោយមិនអាចខ្វះបានរបស់អាស៊ាន ទោះបីស្ថិតនៅក្នុងកាលៈទេសៈណាក៏ដោយ។
ការលើកឡើងនេះ នៅក្នុងកិច្ចប្រជុំកំពូលអាស៊ាន-ចិន លើកទី២១ នៅប្រទេសសិង្ហបុរី ដែលមានការចូលរួមពីបណ្ដាប្រមុខរដ្ឋ ប្រមុខរដ្ឋាភិបាលនៃប្រទេសអាស៊ាន និងពីនាយករដ្ឋមន្រ្តីចិន លោក លី ខឺឈាង នៅព្រឹកថ្ងៃទី១៤ ខែ វិច្ឆិកា។ នេះបើយោងតាមទំព័រហ្វេសប៊ុករបស់លោក ហ៊ុន សែន នៅថ្ងៃនេះ។
លើសពីនេះ លោកនាយករដ្ឋមន្ត្រីហ៊ុន សែន សង្ឃឹមថាទំនាក់ទំនង អាស៊ាន-ចិន នឹងកាន់តែស្ថិតស្ថេរជ្រាលជ្រៅក្នុងស្មារតីតម្កល់ផលប្រយោជន៍រួមនិងការអភិវឌ្ឍប្រកបដោយចីរភាពជូនប្រជាជាតិទាំងអស់។
កិច្ចប្រជុំកំពូលអាស៊ានលើកទី៣៣ និងកិច្ចប្រជុំពាក់ព័ន្ធផ្សេងៗមួយចំនួនទៀត គឺរៀបចំឡើង នៅប្រទេស សិង្ហបុរី ដែលមានរយៈពេល៣ថ្ងៃ ចាប់ពីថ្ងៃទី ១៣ ដល់ថ្ងៃទី ១៥ វិច្ឆិកាឆ្នាំ២០១៨។
អាស៊ាន មកពីពាក្យពេញជាភាសាខ្មែរថា សមាគមប្រជាជាតិអាស៊ីអាគ្នេយ៍ បង្កើតឡើងកាលពីថ្ងៃទី ៨ ខែសីហា ឆ្នាំ១៩៦៧ ដោយប្រទេសចំនួន៥ រួមមាន ម៉ាឡេស៊ី ឥណ្ឌូនេស៊ី ហ្វីលីពីន សិង្ហបុរី និងប្រទេសថៃ នាទីក្រុងបាងកក ប្រទេសថៃ។
ប្រទេសកម្ពុជា បានចូលជាសមាជិកអាស៊ានចុងក្រោយគេ កាលពីថ្ងៃទី ៣០ មេសា ឆ្នាំ ១៩៩៩ហើយបច្ចុប្បន្នប្រទេសជាសមាជិកអាស៊ាន គឺមានចំនួន១០ប្រទេស ៕