អគ្គនាយកដ្ឋានកាំកុងត្រូលកម្ពុជា បានព្រមានចាត់វិធានការផ្លូវច្បាប់លើម្ចាស់ស្ថានីយប្រេងសាំងដែលលក់ប្រេងគ្មានគុណភាព និងបរិមាណ បន្ទាប់ពីវិធានការចុះកិច្ចសន្យាឲ្យម្ចាស់ស្ថានីយកែតម្រូវកំហុសខ្លួន ពុំមានប្រសិទ្ធភាព។
អគ្គនាយករងនៃអគ្គនាយកដ្ឋានកាំកុងត្រូល លោក ឌឹម ថេង បានឲ្យ VOD ដឹងថា ចាប់ពីពេលនេះតទៅ មន្ត្រីកាំកុងត្រូលនឹងសហការជាមួយព្រះរាជអាជ្ញារាល់ពេលចុះត្រួតពិនិត្យស្ថានីយប្រេងសាំងនានានៅកម្ពុជា ហើយនៅពេលដែលរកឃើញថា ម្ចាស់ស្ថានីយណាមួយប្រព្រឹត្តកំហុសនោះ គឺម្ចាស់ស្ថានីយនោះអាចប្រឈមនឹងផ្លូវច្បាប់ផងដែរ។
លោកថា៖ «ឥឡូវហ្នឹងដោយសារតែប្រហែលជាប្អូនបានដឹង ហើយក៏សារព័ត៌មានបានចុះផ្សាយច្រើនដែរថា អត់ឃើញមានចាត់វិធានការអី គឺអគ្គនាយកដ្ឋានកាំកុងត្រូល និងសហការជាមួយព្រះរាជអាជ្ញាតែម្ដងរាល់ពេលចុះទៅហ្នឹងព្រោះយើងបានផ្សាយដំណឹងនេះយូរហើយ! »។
អគ្គនាយកដ្ឋានកាំកុងត្រូល បានព្រមានបែបនេះ បន្ទាប់ពីមន្ត្រីកាំកុងត្រូលបានចុះត្រួតពិនិត្យ និងរកឃើញថា ម្ចាស់ស្ថានីយ៍ប្រេងមួយចំនួន បានលក់ប្រេងមិនគ្រប់បរិមាណ។
នាយកប្រតិបត្តិសម្ព័ន្ធគណនេយ្យភាពសង្គម លោក សន ជ័យ ជំរុញទៅអគ្គនាយកដ្ឋានកាំកុងត្រូល ឲ្យផ្សព្វផ្សាយឲ្យបានច្បាស់លាស់អំពីទោសទណ្ឌ និងច្បាប់សម្រាប់កាត់ទោសលើម្ចាស់ស្ថានីយ៍លក់ប្រេងមិនគ្រប់បរិមាណ។
លោកថា៖ «រហូតមកដល់ពេលនេះ យើងអត់ទាន់មានទិដ្ឋភាពច្បាប់ណាមួយដែលពន្យល់រឿងនេះឲ្យបានច្បាស់នោះទេ ដែលវាជាហេតុមួយដែលធ្វើឲ្យអ្នករកស៊ីខិលខូចខ្លះមានឱកាស និងរកស៊ីខិលខូចហ្នឹងតាមគ្នា»។
ប្រធានក្រុមអ្នកច្បាប់អម្រិន្ទ លោកមេធាវី សុក សំអឿន គាំទ្រឲ្យមានវិធានការច្បាប់ទៅលើម្ចាស់ស្ថានីយ៍ប្រេងឥន្ធនៈនានា ដែលក់ប្រេងមិនគ្រប់បរិមាណ តាមរយៈការវិធានការផាកពិន័យ។
លោកថា៖ «យើងមើលដែលថា ជាចេតនា ឬក៏អចេតនា ហើយបើយើងនិយាយថា ខ្វះនោះ គឺខ្វះប៉ុន្មាន បើខ្វះបន្តិចបន្តួច វាមិនមែនជាចេតនាកេងបន្លំទេ គាត់មានទៅខុសស្អី! […] ប្រសិនជាផាកពិន័យ អូខេ! ខ្ញុំគាំទ្របើដល់ថ្នាក់ដល់ជាប់គុកច្រវាក់ខ្ញុំមិនគាំទ្រទេ»។
អគ្គនាយកដ្ឋានកាំកុងត្រូល បានរកឃើញស្ថានីយ៍ប្រេងឥន្ធនៈ ១១កន្លែងនៅក្នុងខេត្តតាកែវ បានលក់ប្រេងមិនគ្រប់បរិមាណ ឬក៏មិនអនុលោមតាមគុណភាព កាលពីថ្ងៃម្សិលមិញនេះ៕