ភាពយន្តខ្មែរ រឿង«ឃ្លាតទៅសែនឆ្ងាយ» ដែលផលិតដោយ លោក ឆាយ បូរ៉ា កំពុងស្ថិតក្នុងព្រឹត្តិការណ៍មហោស្រពភាពយន្តអន្តរជាតិនៅក្នុងប្រទេសហ្វីលីពីន ដោយមានការគាំទ្រពីផលិតករបរទេសមូយចំនួន ប៉ុន្តែការដាក់បញ្ចាំងលក់សំបុត្រជាថ្មីក្នុងស្រុកក្នុងពេលទន្ទឹមគ្នានោះ មិនសូវទទួលបានជោគជ័យនោះឡើយ។
ផលិតករខ្មែរ លោក ឆាយ បូរ៉ា បានថ្លែងបញ្ជាក់ពីប្រទេសហ្វីលីពីនកាលពីល្ងាចថ្ងៃទី២៥ ខែវិច្ឆិកា ថា ក្រោយពីខាងគណកម្មការផ្ដល់សិទ្ធិអោយលោកដាក់បង្ហាញភាពយន្តរឿង«ឃ្លាតទៅសែនឆ្ងាយ» ភាពយន្តរបស់លោកទទួលបានការចាប់អារម្មណ៍យ៉ាងខ្លាំង ដោយត្រូវបានផលិតករជាជនបរទេសសរសើរថា លោកអាចផលិតរឿងបានល្អ មានស្ដង់ដារអាចទទួលយកបាន ប៉ុន្តែចំណាយថវិកាមិនលើសពី១០ម៉ឺនដុល្លារ ដែលខាងផលិតករក្រៅស្រុកគេអះអាងថាមិនអាចផលិតបាន។
លោកថា បណ្ដាប្រទេសដែលបានចូលរួមយល់ថាភាពយន្តរឿង «ឃ្លាតទៅសែនឆ្ងាយ» ដែលលោកយកទៅបង្ហាញតំណាងជាតិ ជាភាពយន្តល្អ មានខ្លឹមសារជាតិ ហើយជាស្នាដៃដែលមានលក្ខណៈប្រវត្តិសាស្ត្រដែលមានតម្លៃជាតិអោយបរទេសបានស្គាល់កាន់តែច្បាស់ពីកម្ពុជាផងដែរ។ អញ្ចឹងហើយ ទើបប្រទេសចំនួន៣គឺសិង្ហបុរី ម៉ាឡេស៊ី និងឥណ្ឌូនេស៊ី បានទំនាក់ទំនងសុំសិទ្ធិដើម្បីសុំភាពយន្តនេះ អោយដាក់បញ្ចាំងនៅក្នុងប្រទេសរបស់គេ ដោយដាក់បញ្ចាំងអោយពលរដ្ឋគេបានទស្សនាជាសាធារណៈនៅលើកញ្ចក់ទូរទស្សន៍។
លោកចាត់ទុកថា កិច្ចចរចារស្នើអោយស្នាដៃរបស់លោកបានបង្ហាញនៅក្នុងប្រទេសទាំង៣ គឺជាអ្វីដែលលោកចង់បាន ដោយសារតែក្នុងចំណោមភាពយន្តភាគច្រើនដែលបានបង្ហាញ មិនសុទ្ធតែមានភាពយន្តដែលយកទៅបង្អួតនោះ ត្រូវបានបណ្ដាប្រទេសដែលចូលរួមចាប់អារម្មណ៍ទិញយក ឬសុំសិទ្ធិដើម្បីយកផ្សព្វផ្សាយនៅក្នុងប្រទេសរបស់គេឡើយ ជាពិសេសប្រទេសទំនើបដូចជាសិង្ហបុរី និងម៉ាឡេស៊ី ដែលភាពយន្តរបស់គេក៏ខ្លាំងមិនធម្មតា។
យ៉ាងណាមិញ លោក ឆាយ បូរ៉ា បានសារភាពថា ភាពយន្តរបស់លោកទទួលបានផលវិជ្ជមានតែក្នុងចំណោមអ្នកចេះមើលកុន និងក្រសែភ្នែកជនបរទេសប៉ុណ្ណោះ ប៉ុន្តែសម្រាប់ទីផ្សារក្នុងស្រុកលោកថា មិនសូវទទួលលទ្ធផល បើទោះជាភាពយន្តនេះធ្លាប់ឈ្នះពានដល់ទៅ៧ក្នុងចំណោម៩ កាលពីឆ្នាំ២០១៥ ក្នុងមហោស្រពភាពយន្តថ្នាក់ជាតិ ខណៈដែលរឿងមួយនេះ ក៏មានការទទួលស្គាល់ និងល្បីល្បាញនៅក្រៅប្រទេសជាច្រើនឆ្នាំមកហើយ។
លោក ឆាយ បូរ៉ា បានសម្រេចចិត្តដាក់បញ្ចាំងភាពយន្តនេះ និងលក់សំបុត្រជាថ្មីកាលពីថ្ងៃទី២១ ខែវិច្ឆិកា ប៉ុន្តែលោកថា ទទួលបានការគាំទ្រតិចណាស់ គឺតិចជាងការរំពឹងទុក ដោយលោកបានហៅលទ្ធផលដែលបានស្ដែងឡើងថា ខ្វះការលើកទឹកចិត្តពីអ្នកគាំទ្រខ្មែរក្នុងស្រុក ដែលលោកយល់ថាភាពយន្តនេះគួរតែកូនខ្មែរភាគច្រើនបានទស្សនា។
យ៉ាងណាមិញ លោកថាមិនបាក់ទឹកចិត្តចំពោះការផលិតភាពយន្តដែលមានស្ដង់ដារបែបនេះទៀតឡើយ ដោយលោកនឹងរក្សាជំហរផលិតភាពយន្តអោយមានគុណភាព ជាជាងផលិតរឿងតម្រូវតែទីផ្សារអ្នកមើលមួយក្ដាប់តូច ដូចជាផលិតបែបកំប្លែង និងរឿងខ្មោច ដែលលោកបញ្ជាក់ថាមិនមានទីផ្សារនៅខាងក្រៅនោះ។ លោកថាផលិតករភាគច្រើនកំពុងបាក់ទឹកចិត្តមិនចង់ផលិតភាពយន្តដែលមានគុណភាពនោះទេ ប៉ុន្តែបើលោកក៏ធ្វើព្រោះតែចង់បានផលចំណេញក្នុងស្រុក គឺមិនខុសពីរួមគ្នាផលិតភាពយន្តដែលមើលតែបានតែអ្នកគាំទ្រមួយចង្កោមតូច ហើយគ្មានការទទួលស្គាល់ពីមជ្ឈដ្ឋានខាងក្រៅដដែលជាដដែលឡើយ៕