ក្រុមអង្គការស៊ីវិល បានចាប់ផ្ដើមយុទ្ធនាការ ១៦ថ្ងៃ ដើម្បីបញ្ឈប់ទម្រង់អំពើហិង្សាទៅលើស្រ្តីនៅឆ្នាំ២០១៨នេះ ក្រោមប្រធានបទ «បុរសដើម្បីបញ្ចប់អំពើហិង្សាលើស្ត្រី និងក្មេងស្រី» ខណដែលពួកគេអះអាងថា ស្ត្រី និងកុមារ នៅតែបន្តរងអំពើហិង្សាដដែល។
នាយិការអង្គការយេនឌ័រ និងអភិវឌ្ឍន៍នៅកម្ពុជា អ្នកស្រី រស់ សុភាព បានឲ្យដឹងថា អង្គការរបស់អ្នកស្រីនឹងរៀបចំយុទ្ធនាការប្រឆាំងអំពើហិង្សាលើស្ត្រី និងក្មេងស្រី នៅតាមបណ្តាខេត្តគោលដៅចំនួន ៣ រួមមានខេត្តព្រៃវែង កំពង់ឆ្នាំង និងខេត្តពោធិ៍សាត់។
អ្នកស្រី បញ្ជាក់ថា គោលបំណងនៃការរៀបចំយុទ្ធនាការនេះ ដើម្បីផ្សព្វផ្សាយដល់សាធារណៈ និងអាជ្ញាធរពាក់ព័ន្ធ បន្ថែមទៀតជុំវិញកិច្ចការពារ និងទប់ស្កាត់ទម្រង់អំពើហិង្សាលើស្រ្តី និងកុមារី។
អ្នកស្រី មានប្រសាសន៍ថា៖ «យើងនៅតែមានឃើញរូបភាពរំលោភបំពានសេពន្ថវៈរំលោភសេព ហើយសម្លាប់ទៀតហ្នឹង។ នៅខេត្តគោលដៅរបស់យើងដូចជា នៅកំពង់ឆ្នាំង ថ្មីៗហ្នឹង ដែលធ្វើឱ្យយើងមានការកង្វល់កាន់តែខ្លាំងឡើង។ ឥឡូវហ្នឹង យើងធ្វើយ៉ាងណា ដើម្បីឱ្យអាជ្ញាធរនៅតាមតំបន់ហ្នឹង មានការសហការ ហើយនិងការចូលរួមឱ្យបានពេញលេញនូវតួនាទីរបស់គាត់ »។
យុទ្ធនាការ ១៦ ថ្ងៃ ដើម្បីបញ្ចប់អំពើហិង្សាលើស្រ្តី និងកុមារី កាលពីឆ្នាំមុនៗ គឺមានភ្ជាប់ការបំពាក់បូពណ៌សផងដែរ។
អ្នកស្រី រស់ សុភាព បន្ថែមថា និមិត្តសញ្ញាបូពណ៌សនៅតែមាននៅតាមប័ណ្ណផ្សព្វផ្សាយនានា ប៉ុន្តែ សម្រាប់ការបំពាក់បូពណ៌សនៅឆ្នាំនេះ គឺមិនមានទេ។
អ្នកស្រីបន្តថា នៅឆ្នាំ២០១៨ ខាងបណ្តាញអង្គការអ្នកស្រីបានរៀបចំបដា និងមានអាវយឺតអមដោយពាក្យស្លោកផ្សេងៗ ដែលមានអត្ថន័យទាក់ទងការបញ្ចប់អំពើហិង្សាលើស្ត្រី ព្រមទាំងចុះផ្សព្វផ្សាយតាមមូលដ្ឋានផ្ទាល់ទៀតផង។
អ្នកស្រីបន្ថែមថា៖ «ខ្ញុំមើលឃើញថា មានបុរសមួយចំនួនធំដែលមានការកែប្រែ ជាពិសេសគាត់គិតថា គាត់ជាបុរស ហើយនៅពេលមានបុរសហ្នឹង គាត់ប្រព្រឹត្តអំពើហិង្សា គាត់មិនសប្បាយចិត្តដែរ»។
នាយិការអង្គការដដែលនេះ បញ្ជាក់ថា ប្រវត្តិយុទ្ធនាការពាក់បូពណ៌ស ដើម្បីជានិមិត្តរូបប្រឆាំងរាល់អំពើហិង្សាទៅលើស្ត្រីនៅលើពិភពលោកនេះបានកើតឡើងក្នុងអំឡុងទសវត្សរ៍ឆ្នាំ១៩៩០ នៅប្រទេសកាណាដា ដោយសាស្ត្រាចារ្យនៅមហាវិទ្យាល័យម្នាក់ ក្រោយពេលមានព្រឹត្តិការណ៍ហិង្សាសម្លាប់និស្សិតស្រីជាច្រើននាក់នៅក្នុងសាលារៀនមួយ ដែលបង្កឡើងដោយនិស្សិតប្រុស។
នាយិការអង្គការសីលការ អ្នកស្រី ធីតា ឃឹះ មានប្រសាសន៍ថា ស្ថានភាពស្រ្តីនៅពេលបច្ចុប្បន្ន មានប្រសើរឡើង ដោយថា ស្ត្រីហ៊ាននិយាយ នៅពេលមានការរំលោភបំពាន ឬមានអំពើហិង្សាកើតឡើង ប៉ុន្តែ អ្នកស្រីថា ហានិភ័យ និងភាពងាយរងគ្រោះរបស់ស្ត្រី និងកុមារី នៅតែជួបបញ្ហាប្រឈមដដែល។
អ្នកស្រី ធីតា ឃឹះ ប្រាប់ថា៖ «បន្ថែមការផ្សព្វផ្សាយ និងការអប់រំ គោរពទៅនឹងតួនាទី និងតួអង្គស្ត្រី ឱ្យស្មើទៅនឹងមនុស្សមនា និងការគោរពសិទ្ធិស្ត្រី ដូចទៅនឹងការគោរពសិទ្ធិមនុស្សដែលមាននៅក្នុងគ្រួសារនិងនៅក្នុងសង្គម»។
មន្ត្រីជាន់ខ្ពស់ទទួលបន្ទុកឃ្លាំមើលការរំលោភសិទ្ធិស្ត្រី និងកុមារ នៃអង្គការលីកាដូ កញ្ញា ណាប់ សុម៉ាលី ឱ្យដឹងថា កាលពីឆ្នាំ២០១៧កន្លងមក អង្គការនេះទទួលបានករណីអំពើហិង្សាក្នុងគ្រួសារមានចំនួន ៨៤ករណី បណ្តាលឱ្យជនរងគ្រោះជាស្ត្រីស្លាប់ចំនួន ១៤ករណី។ ចំណែកការរំលោភសេពន្ថវៈទៅលើស្ត្រី និងកុមារី មានចំនួន ១៥៧ករណី បណ្តាលឱ្យជនរងគ្រោះស្លាប់ចំនួន ៩នាក់ ក្នុងនោះកុមារីមានចំនួន ៦នាក់។
ដោយឡែកសម្រាប់រយៈពេល ១០ខែ ឆ្នាំ២០១៨ ករណីអំពើហិង្សាមានចំនួន ៥៨ករណី បណ្តាលឱ្យជនរងគ្រោះជាស្ត្រី ១០នាក់ស្លាប់ ហើយការរំលោភសេពន្ថវៈលើស្ត្រី និងកុមារីមានចំនួន ១២៧ករណី បណ្តាលឱ្យជនរងគ្រោះ៨ នាក់ស្លាប់ ក្នុងនោះក្មេងស្រីមានចំនួន ៣នាក់៕