ជ័យលាភីលេខ២ ផ្នែកភាពយន្តខ្នាតខ្លីក្នុងមហោស្រពភាពយន្តជាតិលើកទី២ រឿង «នារីសក់ខ្លី» ជំរុញឲ្យមានសន្តិភាពបន្ថែមទៀត តាមរយៈការទប់ស្កាត់ការរំលោភបំពានផ្លូវភេទនៅពេលបច្ចុប្បន្ននេះ។
ថ្លែងក្នុងព្រឹត្តិការណ៍ផ្តួចផ្តើមគំនិតប្រឆាំងអំពើហិង្សាផ្លូវភេទ នៅនិវេសនដ្ឋាន នៃអគ្គរាជទូតចក្រភពអង់គ្លេស កាលពីយប់មិញ អ្នកដឹកនាំ និងអ្នកនិពន្ធភាពយន្តរឿង «នារីសក់ខ្លី» ដែលទើបត្រឡប់មកពីចូលរួមកម្មវិធីជួបជុំអ្នកផលិតភាពយន្តវ័យក្មេងនៅប្រទេសទេសអង់គ្លេស លោក ស្វាយ លីម៉េង លើកឡើងថា លោកមានឱកាសបានជជែកជាមួយបុគ្គលល្បីៗអំពីបញ្ហារំលោភបំពានផ្លូវភេទនៅកម្ពុជា។
លោក លីម៉េង បន្តថា លោកបានរំលឹកពីរឿងរំលោភសម្លាប់កុមារីពីររូបនៅខេត្តកំពង់ឆ្នាំងផងដែរ ដោយថា ក្នុងកាលៈទេសៈដែលកម្ពុជាកំពុងមានសន្តិភាព រឿងបែបនេះមិនគួរកើតមានឡើងឡើយ។ លោក លីម៉េង បានអំពាវនាវឲ្យទប់ស្កាត់ ឬនិយាយពីរឿងនេះដើម្បីឆ្ពោះទៅកសាងសន្តិភាពផ្លូវកាយ ផ្លូវចិត្ត និងផ្លូវភេទក្នុងសង្គមជាតិទាំងអស់គ្នា។
ម្ចាស់ជ័យលាភីភាពយន្តខ្នាតខ្លីរឿង «នារីសក់ខ្លី» ដែលនិយាយទាក់ទងពីការរៀបការដោយបង្ខំក្នុងសម័យខ្មែរក្រហម ត្រូវបានអញ្ជើញឲ្យចូលរួមក្នុងកម្មវិធីមហោស្រពភាពយន្តស្តីពីការផ្តួចផ្តើមគំនិតប្រឆាំងអំពើហិង្សាផ្លូវភេទ(PSVI Film Festival: Fighting Stigma through Film) នៅប្រទេសអង់គ្លេសកាលពីសប្តាហ៍មុន។
គួរបញ្ជាក់ដែរថា គំនិតផ្តួចផ្តើមប្រឆាំងអំពើហិង្សាផ្លូវភេទ(PSVI) មានគោលបំណងលើកកម្ពស់ការយល់ដឹងអំពីវិសាលភាពនៃអំពើហឹង្សាផ្លូវភេទលើស្ត្រី កុមារី បុរស និងក្មេងប្រុសនៅក្នុងស្ថានភាពនៃជម្លោះប្រដាប់អាវុធ និងប្រមូលផ្តុំសកម្មភាពសកលដើម្បីបញ្ចប់ការរំលោភសិទ្ធិមនុស្សនេះ។ PSVI ត្រូវបានសហការបង្កើតដោយអតីតរដ្ឋមន្ត្រីការបរទេសអង់គ្លេស លោក William Hague និងប្រេសិតពិសេសនៃឧត្តមស្នងការអង្គការសហប្រជាជាតិសម្រាប់ជនភៀសខ្លួននិងជាតារាភាពយន្តហូលីវូត អ្នកស្រី Angelina Jolie។
កាលពីខែកក្កដា របាយការណ៍របស់សម្ព័ន្ធបងប្អូនស្រី ជាបណ្តុំអង្គការចំនួន៤ បង្ហាញថា អំពើហិង្សាផ្លូវភេទយ៉ាងតិច ១ករណីកើតឡើងក្នុងមួយថ្ងៃនៅក្នុងប្រទេសកម្ពុជា ហើយបានកើតឡើងចំពោះកុមារអាយុក្រោម ១៥ឆ្នាំ។ របាយការណ៍បញ្ជាក់ថា ជនល្មើសសុទ្ធតែធ្លាប់មានទំនាក់ទំនងជាមួយជនរងគ្រោះ ដូចជា សាច់ញាតិ មិត្តភ័ក្តិ ឬសង្សារជាដើម។
របាយការណ៍អង្គការលីកាដូកាលពីឆ្នាំ២០១៧កន្លងមក ឱ្យដឹងថា អង្គការនេះទទួលបានករណីអំពើហិង្សាក្នុងគ្រួសារមានចំនួន ៨៤ករណី បណ្តាលឱ្យជនរងគ្រោះជាស្ត្រីស្លាប់ចំនួន ១៤ករណី។ ចំណែកការរំលោភសេពន្ថវៈទៅលើស្ត្រី និងកុមារី មានចំនួន ១៥៧ករណី បណ្តាលឱ្យជនរងគ្រោះស្លាប់ចំនួន ៩នាក់ ក្នុងនោះកុមារីមានចំនួន ៦នាក់។
ដោយឡែកសម្រាប់រយៈពេល ១០ខែ ឆ្នាំ២០១៨ ករណីអំពើហិង្សាមានចំនួន ៥៨ករណី បណ្តាលឱ្យជនរងគ្រោះជាស្ត្រី ១០នាក់ស្លាប់ ហើយការរំលោភសេពន្ថវៈលើស្ត្រី និងកុមារីមានចំនួន ១២៧ករណី បណ្តាលឱ្យជនរងគ្រោះ៨ នាក់ស្លាប់ ក្នុងនោះក្មេងស្រីមានចំនួន ៣នាក់៕