បណ្តាញស្ត្រី ចង់ឱ្យមានការយកចិត្តទុកដាក់ចំពោះស្ត្រីក្នុងវិស័យនយោបាយបន្ថែមទៀត ដោយថា ដើម្បីជាផ្នែកមួយជួយឱ្យមានភាពប្រសើរឡើងស្ថានភាពរបស់ស្ត្រី និងជាផ្នែកមួយជួយដល់សង្គមជាតិផងដែរ។
តំណាងស្រ្តី និងជាជំទប់ទី២ ឃុំដូនកែវ មកពីខេត្តសៀមរាបម្នាក់ អ្នកស្រី ឆាយ សាត មានប្រសាសន៍ថា នៅឃុំមួយនេះ សមាជិកក្រុមប្រឹក្សាឃុំមានចំនួន ៩នាក់ តែមានស្ត្រី ២នាក់ប៉ុណ្ណោះ។ អ្នកស្រីថា ចំនួនស្ត្រីតិចពេកធ្វើឱ្យមានបញ្ហាប្រឈមក្នុងការបំពេញការងារ ម្យ៉ាងសំឡេងស្ត្រីតិចពេកធ្វើឱ្យសំណើដែលលើកឡើងដោយស្ត្រី មិនត្រូវបានគេយកចិត្តទុកដាក់។
អ្នកស្រី ឱ្យដឹងថា៖ «យើងជាស្ត្រី គឺការងារច្រើន ហើយចុះនៅតាមភូមិក៏ដោយ គេផ្តោតយកតែស្ត្រី។ ម៉្លោះហើយតទៅមុខ បញ្ហាប្រឈម គឺបុរសមានភាពរើសអើងទៅលើស្ត្រីដែរចាស៎។ បានថា រើសអើង ព្រោះពេលបោះឆ្នោតម្តងៗ ស្ត្រីឈរឈ្មោះច្រើន តែមិនបានជាប់ជាស្ត្រី ជាប់តែបុរស»។
ថ្លែងប្រាប់អ្នកសារព័ត៌មានក្នុងពិធីប្រកាសបិទការអនុវត្តគម្រោងស្ត្រីក្នុងវិស័យនយោបាយ ប្រធានអង្គការសីលកា អ្នកស្រី ធីតា ឃឹះ មានប្រសាសន៍ថា ចំនួនស្ត្រីក្នុងក្របខណ្ឌអ្នកសម្រេចចិត្តគោលនយោបាយថ្នាក់ជាតិ និងថ្នាក់ក្រោមជាតិ មិនមានការកើនឡើងទេ។
អ្នកស្រីសង្កេតឃើញថា ពលរដ្ឋជាស្ត្រីធម្មតាវិញ ការយល់ដឹង និងការចូលរួមក្នុងសកម្មភាពនយោបាយរបស់ពួកគាត់កើនឡើង ប៉ុន្តែ អ្នកស្រីថា នៅមានឧបសគ្គជាច្រើនទាំងកត្តាសង្គម និងកត្តាគ្រួសារ ព្រមទាំងមានការរើសអើងផងដែរ។ អ្នកស្រីបន្តថា នៅពេលចំនួនថ្នាក់ដឹកនាំជាស្ត្រីមានចំនួនតិចតួច ធ្វើឱ្យការអនុវត្តគោលនយោបាយជាតិ មិនបានស្មើភាពគ្នា។
អ្នកស្រីមានប្រសាសន៍ថា៖ «ដូច្នេះ បើយើងឱ្យថ្នាក់ដឹកនាំច្រើនពេកទៅលើបុរស វាឃ្លោងដោយការអនុម័តកម្មវិធី ការអនុម័តថវិកាចំណាយទាំងប៉ុន្មាន វាឃ្លោង។ វាអត់ធ្លាក់ទៅក្នុងសង្គមទេ។ អីចឹងទៅ វាអត់បានទៅបង្កើនការអភិវឌ្ឍសង្គមជាតិ។ អីចឹង វាមានបញ្ហានៅកន្លែងហ្នឹង»។
តំណាងរាស្ត្រជាប់ឆ្នោតអាណត្តិទី ៦ មានចំនួន ១២៥រូប ក្នុងនោះស្រីមានចំនួន ១៩រូប។ ឧបនាយករដ្ឋមន្ត្រីមាន៩ រូប ស្រីមាន១ រូប ចំណែករដ្ឋមន្ត្រីនៅតាមក្រសួងមានចំនួន២៩ គឺមានស្ត្រីជារដ្ឋមន្ត្រីចំនួន៣ រូប។
ដោយឡែកសមាសភាពថ្នាក់ដឹកនាំថ្នាក់ក្រោមជាតិជាស្ត្រីវិញ ក្នុងចំណោមរាជធានីខេត្តចំនួន ២៥ គឺ មានអភិបាលខេត្តជាស្ត្រីតែ ១រូបប៉ុណ្ណោះ គឺអភិបាលខេត្តកោះកុង។
យោងតាមរបាយការណ៍ធនាគារពិភពលោកកាលពីឆ្នាំ២០១៦ ឱ្យដឹងថា ស្ត្រីនៅកម្ពុជាមានចំនួនជាង ៥១ភាគរយនៃចំនួនប្រជាជនសរុប ប៉ុន្តែថា កិច្ចការងារនយោបាយត្រូវបានដឹកនាំដោយបុរស។
របាយការណ៍ដែលចង់ក្រងដោយគម្រោង «ស្ត្រីក្នុងវិស័យនយោបាយ» បានលើកឡើងថាសំឡេងស្ត្រីក្នុងឆាកនយោបាយមានសភាពស្ងប់ស្ងាត់ ហើយតំណាងស្ត្រីក្នុងស្ថាប័នអំណាចនយោបាយគឺស្ថិតនៅក្នុងកម្រិតទាប។
របាយការណ៍ដដែលបង្ហាញថា ស្ត្រីប្រឈមបញ្ហាជាច្រើន ដែលរារាំងមិនឱ្យពួកគេចូលរួមពេញលេញក្នុងវិស័យនយោបាយ និងកិច្ចការសង្គម ដូចជាបញ្ហាភាពក្រីក្រ អនក្ខរកម្ម ការរើសអើង កង្វះការលើកទឹកចិត្ត និងកង្វះគោលនយោបាយជាក់លាក់ក្នុងការលើកកម្ពស់ និងផ្តល់ឱកាសដល់ស្ត្រី៕
