ប្រធានគណៈកម្មាធិការព្រំដែនកម្ពុជា លោក វ៉ា គឹមហុង អះអាងថា ការបោះបង្គោលព្រំដែនជាមួយវៀតណាម មិនអាចបញ្ចប់នៅឆ្នាំ២០១៨ ដូចការគ្រោងទុកនោះទេ ដោយថា ការបោះបង្គោលដែលនៅសេសសល់១៦ភាគរយទៀត ត្រូវការភាគីបារំាងធ្វើជាអាជ្ញាកណ្តាលទើបអាចបន្តបោះបាន។
ក្រសួងការបរទេសកម្ពុជា ឲ្យដឹងតាមរយៈសេចក្តីប្រកាសព័ត៌មាន ចុះថ្ងៃទី២៧ ខែវិច្ឆិកា ថា ក្នុងជំនួបរវាងរដ្ឋមន្ត្រីការបរទេសកម្ពុជានិងវៀតណាម ដែលធ្វើឡើងនៅប្រទេសវៀតណាម ភាគីទាំងពីរបានវាយតម្លៃខ្ពស់ ចំពោះសមិទ្ធិផលបោះបង្គោលព្រំដែនគោកនៃប្រទេសទាំងពីរដែលសម្រេចបាន៨៤%។
ក្រសួងការបរទេស លើកឡើងក្នុងសេចក្តីប្រកាសព័ត៌មានដដែលនេះទៀតថា៖
«ភាគីទាំងពីរបានប្តេជ្ញាចិត្តថា នឹងខិតខំដោះស្រាយការងាររាំងស្ទះនានា ដើម្បីឈានទៅសម្រេចការងារសេសសល់១៦% ដែលមិនទាន់ឯកភាពគ្នា»។
រដ្ឋាភិបាលកម្ពុជានិងវៀតណាម ធ្លាប់បានប្ដេជ្ញាថា ការកំណត់ខ័ណ្ឌសីមា នឹងត្រូវបញ្ចប់នៅឆ្នាំ២០១៨នេះ ដោយថា ដើម្បីកសាងខ្សែក្រវ៉ាត់ព្រំដែន ជាតំបន់សន្តិភាព។
ប្រធានគណៈកម្មាការព្រំដែនកម្ពុជា លោក វ៉ា គឹមហុង ឲ្យ VOD ដឹងនៅថ្ងៃសុក្រនេះថា រហូតដល់២០១៨នេះ ការបោះបង្គោលបាន៨៤% លើចំនុចដែលបានឯកភាពគ្នា តែសល់១៦%ទៀត ដែលមិនទាន់ព្រមព្រៀងគ្នា ដោយថារង់ចាំផែនទីចម្លងពីភាគីបារាំង។
លោកថា៖ «វាមិនត្រូវគ្នា ខ្មែរយើងបកថាអញ្ចេះ ដល់គេបកថាអញ្ចុះ។ អញ្ចឹងបានជាយើងយកអាជ្ញាកណ្តាល ដែលជាគ្រូបង្រៀន [បារាំង]មកបក ឬគូចម្លងផែនទី តែប៉ុណ្ណឹង ១៦ភាគរយហ្នឹង។ យើងឯកភាពគ្នាឲ្យបារាំងជួយ បើបារាំងមិនទាន់មកផង មិនដឹងថ្ងៃណាចប់។ យើង តែងតែរក្សាសុទិដ្ឋិនិយម មិនគិតថាមិនចេញទេ គិតថាចេញ»។
កាលពីខែវិច្ឆិកា ឆ្នាំ២០១៦ នាយករដ្ឋមន្ត្រី ហ៊ុន សែន និងនាយករដ្ឋមន្ត្រីវៀតណាម លោក ង្វៀង សួនហ្វុក ក្នុងកិច្ចប្រជុំមួយនៅខេត្តសៀមរាប បានឯកភាពគ្នាស្នើសុំការជួយពីប្រទេសបារាំងឲ្យផ្តល់ក្រុមអ្នកជំនាញបច្ចេកទេសដើម្បីជួយបំលែងផែនទីដែលមានស្រាប់ពីខ្នាត១លើ១០០ពាន់ មកខ្នាត១លើ៥០ពាន់វិញ។
បើតាមប្រធានគណៈកម្មាការព្រំដែនកម្ពុជា ទីតាំងដែលភាគីទាំងពីរមិនឯកភាពគ្នានោះ ស្ថិតនៅតំបន់ដាក់ដាំ និងដាក់ហ៊ូត ក្នុងខេត្តមណ្ឌលគីរី និងមួយកន្លែងទៀត គឺក្នុងឃុំប៉កញៃ ស្រុកអូយ៉ាដាវ ខេត្តរតនគីរី ។
សមាជិកឃ្លាំមើលកម្ពុជា លោក រ៉ុង ឈុន និយាយថា ការកំណត់ខ្សែបន្ទាត់ព្រំដែន ទាំងគ្មានការឯកភាពជាតិដូចបច្ចុប្បន្ន នឹងមិនធ្វើឲ្យព្រំដែនក្លាយជាតំបន់មានសន្តិភាពទេ។ លោកថា រដ្ឋាភិបាលគួរព្យួរចំនុចសេសសល់ ហើយវិលមកពង្រឹងផ្ទៃក្នុងជាតិ ទើបអាចទប់ទល់នឹងមហិច្ឆិតាឈ្លានពានរបស់បរទេសបាន។
លោកថា៖ «តាមដែលខ្ញុំឃ្លាំមើលនូវដំណើរការនៃការបោះបង្គោលព្រំដែនរវាងកម្ពុជា យួន យើងបានប្រតិកម្មជាច្រើនជុំវិញបញ្ហាទាំងអស់ហ្នឹងដែលធ្វើការបោះបង្គោលរំលោភលើរដ្ឋធម្មនុញ្ញត្រង់មាត្រា២។ ពីព្រោះមាត្រា២ បានកំណត់យកផែនទី១លើ១០០ពាន់ ប៉ុន្តែការបោះបង្គោលកន្លងមកនេះ បោះតាមសន្ធិសញ្ញាបំពេញបន្ថែមខ្នាត១លើ៥០ពាន់។ អញ្ចឹងហើយបានធ្វើឲ្យកម្ពុជាយើងខាតបង់ជាបន្តបន្ទាប់»។
កម្ពុជា និងវៀតណាម មានព្រំដែនគោករួមគ្នាប្រវែង១២៧០គីឡូម៉ែត្រ។ ភាគីទាំងពីរបានព្រមព្រៀងគ្នា បោះបង្គោលសរុបចំនួន៣១៤ ដើម្បីកំណត់ខ្សែបន្ទាត់ព្រំដែនរវាងគ្នានិងគ្នា៕