ក្រុមមេធាវីការពារក្ដីឲ្យលោក កឹម សុខា បានបន្តអះអាងជាថ្មីនៅថ្ងៃនេះថា មេដឹកនាំអតីតបក្សប្រឆាំងរូបនេះ មិនទទួលស្គាល់នោះឡើយចំពោះសន្និសីទរយៈពេលពីរថ្ងៃ ដែលត្រូវបានរៀបចំឡើងដោយក្រុមអ្នកគាំទ្រអតីតមេដឹកនាំបក្សប្រឆាំង លោក សម រង្ស៊ី នៅឯសហរដ្ឋអាមេរិក។
ក្រុមអ្នកគាំទ្រលោក សម រង្ស៊ី អតីតមេដឹកនាំគណបក្សសង្គ្រោះជាតិ និងខ្លួនលោក សម រង្ស៊ី ផ្ទាល់ បានចូលរួមក្នុងសន្និសីទមួយ ដែលកំពុងតែដំណើរការទៅនៅថ្ងៃទី០១ ដល់ថ្ងៃទី០២ ខែធ្នូ ឆ្នាំ២០១៨នេះ នៅឯទីក្រុង Georgia ស្ថិតនៅលើទឹកដីសហរដ្ឋអាមេរិក។ នេះបើតាមវីដេអូដែលត្រូវបានបង្ហោះនៅលើទំព័រហ្វេសប៊ុករបស់លោក សម រង្ស៊ី នៅថ្ងៃនេះ។
ប៉ុន្តែ នៅឯកម្ពុជាវិញ ក្រុមមេធាវីតំណាងឲ្យលោក កឹម សុខា មេដឹកនាំគណបក្សសង្គ្រោះជាតិដែលត្រូវបានរំលាយចោលនោះ អះអាងនៅក្នុងសេចក្ដីថ្លែងការណ៍នៅថ្ងៃនេះថា មេបក្សប្រឆាំងដែលកំពុងជាប់ឃុំនៅក្នុងផ្ទះរូបនេះ ទាត់ចោល និងមិនគាំទ្រនោះឡើយ។
ក្រុមមេធាវីក៏បានអះអាងថែមទៀតថា លោក កឹម សុខា បង្ហាញជំហររបស់លោកបែបនេះ ដោយមិនស្ថិតក្រោមសម្ពាធ ឬការបង្ខិតបង្ខំពីបុគ្គលណាម្នាក់ឡើយ។
សហមេធាវីលោក កឹម សុខា អះអាងថា៖ «ទោះជាឯកឧត្ដម កឹម សុខា ស្ថិតក្រោមការត្រួតពិនិត្យតាមផ្លូវតុលាការក៏ដោយ ក៏ឯកឧត្ដម កឹម សុខា នៅតែមានសិទ្ធិក្នុងការតវ៉ា ការពារ ទាមទារ និងបដិសេធនូវអ្វីដែលប៉ះពាល់ដល់សិទ្ធិស្របច្បាប់របស់គាត់»។
លោក កឹម សុខា បានសម្រេចចាត់ក្រុមមេធាវីធ្វើជាអ្នកនាំពាក្យតំណាងរូបលោកនៅថ្ងៃនេះ ក្រោយពីមានភាពចម្រូងចម្រាស់ជុំវិញការថ្លែងរបស់អតីតមេដឹកនាំបក្សប្រឆាំង លោក សម រង្ស៊ី ដែលបានអះអាងថា រូបលោក និងលោក កឹម សុខា សុទ្ធតែមានជំហរតែមួយ។
លោក កឹម សុខា ត្រូវបានតុលាការរាជធានីភ្នំពេញសម្រេចផ្ទេរការឃុំខ្លួនពីពន្ធនាគារត្រពាំងផ្លុង មកការឃុំខ្លួននៅក្នុងគេហដ្ឋានរបស់លោកស្ថិតនៅខណ្ឌទួលគោក កាលពីខែកញ្ញាកន្លងមក ក្រោយពីលោកត្រូវបានចាប់ដាក់ឃុំខ្លួននៅក្នុងពន្ធនាគារត្រពាំងផ្លុងអស់រយៈពេលជាង ១ឆ្នាំក្រោយមក ក្រោមការចោទប្រកាន់ពីរដ្ឋាភិបាលថា «ក្បត់ជាតិ»៕