មេដឹកនាំបក្សប្រឆាំងដែលត្រូវបានរំលាយចោលនោះ បានសម្រេចអនុញ្ញាតឲ្យក្រុមមេធាវីរបស់លោក ធ្វើជាអ្នកនាំពាក្យសម្រាប់បង្ហាញជំហរ និងទស្សនៈរបស់លោកទៅកាន់សាធារណជន ខណៈដែលរូបលោកស្ថិតនៅក្រោមការឃុំខ្លួនក្នុងផ្ទះ។
ទំព័រហ្វេសប៊ុកផ្លូវការរបស់មេដឹកនាំអតីតគណបក្សសង្គ្រោះជាតិ លោក កឹម សុខា បានបង្ហោះសារនៅថ្ងៃនេះថា មេដឹកនាំអតីតបក្សប្រឆាំងរូបនេះ បានផ្ដល់សិទ្ធិទៅក្រុមមេធាវីរបស់លោក ឲ្យធ្វើជាអ្នកនាំពាក្យ ដើម្បីបង្ហាញជំហររបស់លោក បន្ទាប់ពីលោកបានជួបពិភាក្សាជាមួយពួកគេ។
ទំព័រហ្វេសបុកលោក កឹម សុខា សរសេរថា៖ «ខ្ញុំមានសិទ្ធិឲ្យមេធាវីរបស់ខ្ញុំនាំពាក្យនិងបង្ហាញពីឆន្ទៈខ្ញុំដែលជាកូនក្តីជាផ្លូវការស្របតាមបញ្ញត្តិច្បាប់»។
រូបថតមួយសន្លឹកនៅលើទំព័រហ្វេសប៊ុករបស់លោក បានបង្ហាញលោក កឹម សុខា អង្គុយនៅតុរួមគ្នាជាមួយក្រុមមេធាវីលោក ផែង ហេង អ្នកស្រី ម៉េង សុភារី និងលោក ចាន់ ចេន។
លោកមេធាវី ផែង ហេង បានប្រាប់វីអូឌីតាមបណ្ដាញសង្គមនៅថ្ងៃអាទិត្យនេះថា លោកពិតជាបានជួបពិភាក្សាជាមួយលោក កឹម សុខា នៅព្រឹកថ្ងៃនេះមែន។
លោកមេធាវីរូបនេះបានឲ្យដឹងថា មេធាវីទាំង ៤រូប ក្នុងនោះមានទាំងលោកមេធាវី ផាន់ ច័ន្ទស័ក្តិ ផងដែរ សុទ្ធតែអាចនិយាយជំនួសលោក កឹម សុខា។
លោក ផែង ហេង ថ្លែងប្រាប់ថា៖ «បាទ! បួននាក់ហ្នឹង មានសិទ្ធិដូចគ្នា។ នរណាក៏អាចនិយាយក្នុងនាមគាត់បានដែរ ឲ្យតែគាត់ពឹងពាក់»។
លោក កឹម សុខា បានសម្រេចចាត់ក្រុមមេធាវីធ្វើជាអ្នកនាំពាក្យតំណាងរូបលោកបែបនេះ ក្រោយពីមានភាពចម្រូងចម្រាស់ជុំវិញការថ្លែងរបស់អតីតមេដឹកនាំបក្សប្រឆាំង លោក សម រង្ស៊ី ដែលបានអះអាងថា រូបលោក និងលោក កឹម សុខា សុទ្ធតែមានជំហរតែមួយ។
លោក កឹម សុខា ត្រូវបានតុលាការរាជធានីភ្នំពេញសម្រេចផ្ទេរការឃុំខ្លួនពីពន្ធនាគារត្រពាំងផ្លុង មកការឃុំខ្លួននៅក្នុងគេហដ្ឋានរបស់លោកស្ថិតនៅខណ្ឌទួលគោក កាលពីខែកញ្ញាកន្លងមក ក្រោយពីលោកត្រូវបានចាប់ដាក់ឃុំខ្លួននៅក្នុងពន្ធនាគារត្រពាំងផ្លុងអស់រយៈពេលជាង ១ឆ្នាំក្រោយមក ក្រោមការចោទប្រកាន់ពីរដ្ឋាភិបាលថា «ក្បត់ជាតិ»៕