មេដឹកនាំបក្សកាន់អំណាចលោកនាយករដ្ឋមន្ត្រី ហ៊ុន សែន បានប្រកាសថា លោកអាចជាមេដឹកនាំកម្ពុជាតែម្នាក់គត់ដែលមានភាពអត់ឱនច្រើនជាងគេ ប៉ុន្តែ លោកថា លោកមិនអាចអត់ឱនឲ្យជាថ្មីទៀតនោះឡើយ។
លោក ហ៊ុន សែន បានអះអាងបែបនេះនៅក្នុងសំណេរលើទំព័រហ្វេសប៊ុកផ្លូវការរបស់លោកនៅថ្ងៃនេះ ចំពេលដែលរដ្ឋាភិបាលដឹកនាំដោយគណបក្សប្រជាជនកម្ពុជា ប្រារព្ធពិធីរំលឹកខួប ៤០ឆ្នាំនៃការបង្កើតរណសិរ្សសាមគ្គីសង្គ្រោះជាតិ ២ ធ្នូ។
សំណេរហ្វេសប៊ុកលោក ហ៊ុន សែន បានពន្យល់នូវអ្វីដែលហៅថា សាមគ្គីភាព ហើយថា បក្សកាន់អំណាចរបស់លោកតែងតែប្រកាន់ខ្ជាប់នូវសាមគ្គីជាតិ ចាប់តាំងពីគណបក្សមួយនេះ ត្រូវបានបង្កើតឡើងកាលពីជិត ៧០ឆ្នាំមុនមកម៉្លេះ។
ខណៈដែលលោកពន្យល់ថា សាមគ្គីជាតិតម្រូវឲ្យមានការអត់ឱនឲ្យគ្នា លោក ហ៊ុន សែន ក៏បានអះអាងថា លោកអាចជាមេដឹកនាំតែម្នាក់គត់ដែលមានភាពអត់ឱនច្រើនជាងគេ ប៉ុន្តែ លោកមិនអាចអត់ឱនឲ្យជាលើកទីបីនោះឡើយ។
ទំព័រហ្វេសប៊ុកលោក ហ៊ុន សែន រៀបរាប់ថា៖ «នៅក្នុងចំណោមអ្នកដឹកនាំកម្ពុជាតាំងពីសម័យបុរាណមក ខ្ញុំប្រហែលជាអ្នកដឹកនាំតែមួយគត់ដែលមានការអត់ឱនឲ្យច្រើនជាងគេ។ អ្នកក្បត់ជាតិក្នុងសម័យមុន មានតែសេចក្ដីស្លាប់ប៉ុណ្ណោះ ប៉ុន្តែ ខ្ញុំវិញ មានតែលើកលែងទោសដល់អ្នកដែលដឹងកំហុស។ ខ្លះម្ដង ខ្លះរហូតដល់ទៅពីរដង។ ប៉ុន្តែ មិនអាចមានលើកទី៣ឡើយ»។
សំណេរនៅលើទំព័រហ្វេសប៊ុកលោក ហ៊ុន សែន មិនបានបញ្ជាក់ឈ្មោះបុគ្គលរូបណាដែលលោកធ្លាប់បានអត់ឱនឲ្យនោះឡើយ។
ប៉ុន្តែ លោក ហ៊ុន សែន បានស្នើទៅព្រះមហាក្សត្រ ព្រះបាទ នរោត្ដម សីហមុនី ឲ្យលើកលែងទោសដល់លោក សម រង្ស៊ី ចំនួន ២លើករួចមកហើយចាប់តាំងពីឆ្នាំ២០០៦មក។
លោក សម រង្ស៊ី ដែលជាគូប្រជែងនយោបាយនឹងលោក ហ៊ុន សែន នោះ ត្រូវបានព្រះមហាក្សត្រលើកលែងទោសលើកទីមួយ កាលពីខែកុម្ភៈ ឆ្នាំ២០០៦ និងលើកទី២ នៅក្នុងខែកក្កដា ឆ្នាំ២០១៣ ដែលការលើកលែងទោសទាំងនោះ សុទ្ធតែត្រូវបានធ្វើឡើងទៅតាមសំណើរបស់លោក ហ៊ុន សែន។
អតីតមេដឹកនាំបក្សប្រឆាំងរូបនេះ កំពុងរស់នៅនិរទេសខ្លួនឯង បន្ទាប់ពីរងបណ្ដឹងតាមផ្លូវតុលាការនៅកម្ពុជា ដែលប្ដឹងដោយក្រុមមេដឹកនាំបក្សកាន់អំណាច ចាប់តាំងពីចុងឆ្នាំ២០១៥មក។
បើទោះបីជាលោក ហ៊ុន សែន អះអាងអំពីការអត់ឱនដល់គូប្រជែងនយោបាយរបស់លោកក្ដី ប៉ុន្តែ នាយប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស Human Rights Watch បាននិយាយក្នុងរបាយការណ៍របស់ខ្លួនកាលពីដើមឆ្នាំ២០១៥ថា អស់រយៈពេល ៣ទសវត្សរ៍ លោក ហ៊ុន សែន បានប្រើប្រាស់ម្ដងហើយម្ដងទៀតនូវអំពើហិង្សានយោបាយ ការបង្ក្រាប និងអំពើពុករលួយ ដើម្បីរក្សាអំណាច៕