ក្នុងឱកាសបង្ហាញខ្លួននៅក្នុងប្រទេសកម្ពុជា កាលពីថ្ងៃទី២ធ្នូ តារាសម្ដែងជើងចាស់ល្បីល្បាញតាំងពីជំនាន់ឆ្នាំ៩០ជាង លោក យស បូវណ្ណៈ បានអះអាងថាលោកនឹងឡើងចុះស្រុកកំណើតមកថតរឿងដូចគ្នាអ្នកនឹងនាង អម្ពរ ទេវី ក្នុងពេលបន្តបន្ទាប់ បន្ទាប់ពីឃើញផលិតករ និងសិល្បៈជំនាន់ក្រោយច្រើននាក់ស្វាគមន៍ និងចង់ឃើញការសម្ដែងរបស់លោក ដូចគ្នានឹងចង់ឃើញការសម្ដែងរបស់អ្នកនាង អម្ពរ ទេវី ដែលចេញទៅរស់នៅស្ងប់ស្ងាត់លើទឹកដីអាមេរិកដូចគ្នា។ យ៉ាងណាមិញ លោកថា សម្រាប់ដំណើរចុះមកថតរឿងលើកដំបូងអោយផលិតកម្មមហាហង្សនៅក្នុងពេលនេះ គឺមិនមានគម្រោងទទួលសម្ដែងអោយផលិតករណាផ្សេងទេ ដោយសារតែលោកសុំច្បាប់ការងារនៅអាមេរិកបានតែ៣សប្ដាហ៍។
លោក យស បូវណ្ណៈ បានថ្លែងបញ្ជាក់នៅព្រលានយន្តហោះថា លោកត្រូវបានផលិតកម្មមហាហង្សទំនាក់ទំនងអោយចុះថតរឿងជាយូរមកហើយ ប៉ុន្តែដោយសារតែលោកមិនអាចចុះមក ហើយសាច់រឿងកន្លងមកហាក់មិនសូវត្រូវនឹងវ័យរបស់លោកផង ទើបលោកចេះតែមិនទាន់ទទួល និងបានត្រឹមតែថាចាំមានរឿងត្រូវនោះលោកនឹងចុះមកសម្ដែងអោយ។ យ៉ាងណាមិញ លោកថាផលិតករមហាហង្សបានផ្ញើសាច់រឿងមួយថ្មី គឺរឿង «លោកឪពុក» ដែលលោកគ្រាន់តែបានអានហើយ គឺចង់សម្ដែងតែម្ដង ទើបធ្វើអោយលោកយល់ព្រមទទួល នឹងស្នើអោយលោក អ៊ិន សុភិន ចាងហ្វាងផលិតកម្មរៀបចំពេលវេលាចុះថត។
លោក យស បូវណ្ណៈ ថាភាពយន្តខ្នាតធំដែលលោកសម្រេចចិត្តចុះមកថតអោយផលិតកម្មមហាហង្សនេះ គឺជាសាច់រឿងមួយដែលនិយាយពីជីវិតរបស់លោកឪពុក ដែលលោកប្រាប់ថាគ្រាន់តែបានដឹងពីសាច់រឿងគឺពេញចិត្តស្នូកដល់ថ្នាក់ធ្វើអោយលោកសម្រេចចិត្តថាត្រូវតែផ្អាកការងារនៅអាមេរិក ហើយមកថតអោយបានដើម្បីរំលេចស្នាដៃជាថ្មី។ លោកនឹងចំណាយពេលទទួលថតរឿងនេះចំនួន២០ថ្ងៃ ទើបលោកប្រកាសថា សម្រាប់គម្រោងមកកាន់ប្រទេសកម្ពុជាលើកនេះ គឺទំនងមិនបានដើរលេង ឬបង្ហាញមុខក្នុងសកម្មភាពសិល្បៈដែលមានអ្នកផ្សេងអញ្ជើញកើតទេ។
លោក យស បូវណ្ណៈ បញ្ជាក់ថា លោកបានចាកចេញពីប្រទេសកម្ពុជាអំឡុងឆ្នាំ១៩៩៤ ដោយក្នុងពេលនេះ លោកបានកសាងគ្រួសារនៅលើទឹកដីអាមេរិកក្នុងរដ្ឋកាលីហ្វ័រញ៉ា ហើយទទួលបានចំណងដៃកូនស្រី៣នាក់ ដោយនៅអាមេរិក លោកនៅតែទទួលច្រៀង និងសម្ដែងជាហូរហែរ ជាពិសេសក្នុងពេលសមាគមន៍ខ្មែរនៅអាមេរិករៀបចំកម្មវិធីវប្បធម៌ ឬសិល្បៈអបអរពិធីបុណ្យជាតិធំៗម្ដង។ លោកថាខានមកលេងស្រុកកំណើតប្រមាណជិត១០ឆ្នាំហើយ ហើយសម្រាប់ការសម្ដែងរឿងវិញ ក៏ខានមិនតិចជាង២៣ឆ្នាំនោះដែរ ទើបលោកភ្ញាក់ផ្អើលនៅពេលចុះមកដល់ព្រលានយន្តហោះភ្នំពេញ ហើយមានការស្វាគមន៍យ៉ាងកក់ក្ដៅពីតារាសិល្បៈជំនាន់ក្រោយ និងមហាជន៕
