មេដឹកនាំជាន់ខ្ពស់គណបក្សកុម្មុយនីស្តវៀតណាម បានជំរុញឲ្យភាគីកម្ពុជា និងវៀតណាម រួមគ្នាបញ្ចប់ឯកសារការងារកំណត់ខ្សែបន្ទាត់ និងបោះបង្គោលព្រំដែនរវាងប្រទេសទាំងពីរនៅឆ្នាំក្រោយនេះ។ នេះបើតាមការចុះផ្សាយរបស់សារព័ត៌មានវៀតណាម។
សារព័ត៌មាន Vietnam News បានចុះផ្សាយកាលពីថ្ងៃសុក្រកន្លងមកនេះថា លោកនាយករដ្ឋមន្ត្រី ហ៊ុន សែន បានជួបពិភាក្សាជាមួយប្រធានាធិបតីវៀតណាម លោក ង្វៀន ភូជុង អំឡុងដំណើរទស្សនកិច្ចរយៈពេល ៤ថ្ងៃរបស់លោកនៅទីក្រុងហាណូយ។
សារព័ត៌មានដដែលនេះ បានចុះផ្សាយថា ក្នុងជំនួបនោះ លោក ង្វៀន ភូជុង បានជំរុញឲ្យរដ្ឋាភិបាលប្រទេសទាំងពីរ បញ្ចប់ឯកសារបោះបង្គោលព្រំដែន និងការងារកំណត់ខ្សែបន្ទាត់ព្រំដែននៅឆ្នាំ២០១៩ បន្ទាប់ពីសម្រេចបាន ៨៤ភាគរយហើយនោះ។
សារព័ត៌មានបានដកស្រង់សម្ដីមេដឹកនាំវៀតណាម ដែលបាននិយាយថា ការពន្លឿនបោះបង្គោលព្រំដែនរវាងប្រទេសទាំងពីរ គឺដើម្បីកសាងសន្ដិភាព មិត្តភាព កិច្ចសហប្រតិបត្តិការ និងការអភិវឌ្ឍនៅតំបន់ជាប់ព្រំដែនប្រទេសទាំងពីរ។
កម្ពុជា និងវៀតណាម មានព្រំដែនគោករួមគ្នាប្រវែង ១២៧០គីឡូម៉ែត្រ ដោយភាគីទាំងពីរបានព្រមព្រៀងគ្នាបោះបង្គោលសរុបចំនួន ៣១៤ ដើម្បីកំណត់ខ្សែបន្ទាត់ព្រំដែនរវាងគ្នា និងគ្នា។
ប៉ុន្ដែ ប្រធានគណៈកម្មាធិការព្រំដែនកម្ពុជា លោក វ៉ា គឹមហុង បានឲ្យ VOD ដឹងកាលពចុងខែវិច្ឆិកាកន្លងមកនេះថា ការបោះបង្គោលព្រំដែនជាមួយវៀតណាម មិនអាចបញ្ចប់នៅឆ្នាំ២០១៨ ដូចការគ្រោងទុកនោះទេ ដោយថា ការបោះបង្គោលព្រំដែនដែលនៅសេសសល់ចំនួន ១៦ភាគរយទៀត ចាំបាច់ត្រូវការភាគីបារំាងធ្វើជាអាជ្ញាកណ្តាល និងរង់ចាំផែនទីចម្លងរបស់ភាគីបារាំង ទើបអាចបោះបន្តបាន៕
