មន្ត្រីនៃអគ្គនាយកដ្ឋានពន្ធដារ បានជំរុញទៅកាន់អង្គការសង្គមស៊ីវិលដែលមិនទាន់បានចុះបញ្ជីពន្ធដារនៅអគ្គនាយកដ្ឋានមួយនេះ ទៅចុះឈ្មោះមុនពេលដែលអនុក្រឹត្យចុះបញ្ជីដោយស្ម័គ្រចិត្តផុតសុពលភាពនាចុងឆ្នាំនេះ។
កាលពីដើមខែកុម្ភៈ ឆ្នាំ២០១៧ រដ្ឋាភិបាលបានសម្រេចចេញអនុក្រឹត្យមួយជំរុញដល់សហគ្រាសធុនតូច និងមធ្យម និងអង្គការក្រៅរដ្ឋាភិបាល ឲ្យទៅបំពេញបែបបទចុះបញ្ជីដោយស្ម័គ្រចិត្តនៅអគ្គនាយកដ្ឋានពន្ធដារចាប់ពីឆ្នាំ២០១៧ ដល់២០១៨។ បើតាមអនុក្រឹត្យនោះ ការខកខានមិនបានចុះបញ្ជីពន្ធដារ ត្រូវបានចាត់ទុកថាបានប្រព្រឹត្តអំពើរាំងស្ទះ ហើយក៏ប្រឈមនឹងវិធានការណ៍ផ្លូវច្បាប់ផងដែរ។
ក្នុងវេទិកាកិច្ចសន្ទនាស្ដីពី អង្គការសង្គមស៊ីវិល និងការស្វែងយល់អំពីកាតព្វកិច្ចសារពើពន្ធនាព្រឹកថ្ងៃទី១១ ធ្នូនេះ អនុប្រធាននាយកដ្ឋានគ្រប់គ្រង អ្នកជាប់ពន្ធតូចនិងមធ្យម នៃអគ្គនាយកដ្ឋានពន្ធដារ លោក ម៉ា បូរ៉ា បានជំរុញដល់អង្គការសង្គមស៊ីវិលណាដែលមិនទាន់បានចុះបញ្ជីបង់ពន្ធនៅអគ្គនាយកដ្ឋានពន្ធដារឲ្យរួសរាន់ចុះបញ្ជីឲ្យបានមុនថ្ងៃទី៣១ ធ្នូនេះ ដើម្បីជៀសវាងការពិន័យណាមួយនោះ។
លោកថា៖ « ថ្ងៃ៣១ហ្នឹងនៅតែ២០ថ្ងៃទៀតទេ! យើងគ្រាន់តែទៅដាក់ពាក្យនៅកន្លែង(អគ្គនាយកដ្ឋានពន្ធដារ)ទៅ យើងស្ថិតនៅក្នុងអ្នកមកដោយស្ម័គ្រចិត្តហើយ អញ្ចឹងត្រូវលើកលែងពន្ធអីខ្លះ ហើយមានកាតព្វកិច្ចពន្ធអីខ្លះគឺចាប់ពីពេលហ្នឹងតទៅ » ។
ទោះជាយ៉ាងណាលោកបានបដិសេធមិនឆ្លើយបន្ថែមទាក់ទងនឹងវិធានការណ៍របស់រដ្ឋនៅពេលអនុក្រឹត្យនេះអស់សុពលភាពនោះទេ។
នាយកប្រតិបត្តិគណៈកម្មាធិការសហប្រតិបត្តិការដើម្បីកម្ពុជាលោក សឿង សារឿន មានប្រសាសន៍ថា រហូតមកដល់ពេលនេះមិនមានអង្គការសង្គមស៊ីវិលច្រើនទេដែលបានចុះបញ្ជីនៅអគ្គនាយកដ្ឋានពន្ធដារនោះ។ លោកក៏បង្ហាញក្ដីបារម្ភថាវិធានការណាមួយចំពោះអង្គការសង្គមស៊ីវិលនៅពេលដែលអនុក្រឹត្យនេះអស់សុពលភាពនោះនឹងធ្វើឲ្យប៉ះពាល់ជាច្រើនដល់អង្គការទាំងនោះ និងការអភិវឌ្ឍរបស់កម្ពុជាផងដែរ។
លោកឲ្យជាយោបល់ថា រដ្ឋាភិបាលគួរបង្កើនការផ្សព្វផ្សាយឲ្យបានច្រើនពីករណីនេះ ហើយគួរតែពិចារណាពន្យារពេល៦ខែទៀត ដើម្បីឲ្យអង្គការសង្គមស៊ីវិលទាំងនោះបានទៅចុះបញ្ជីពន្ធដារ។
លោកថា៖ « ជំរុញ និងលើកទឹកចិត្តឲ្យពួកគាត់ឲ្យបានយល់ច្បាស់ ពុំនោះទេម្នាក់ៗគាត់ភ័យ។ អ្នកខ្លះមិនទាន់បានចុះបញ្ជីរហូតមកស្ថាប័នរបស់គាត់បង្កើតមកជិត២០ឆ្នាំមក។ ហើយបើតាមច្បាប់ពន្ធដារ ក្រោយពីបង្កើតរយៈពេល១៥ថ្ងៃគឺត្រូវតែប្រកាសចុះបញ្ជីពន្ធដារ។ ហើយមកដល់ឥឡូវយើងគិតទៅ ២០ឆ្នាំ ៥ឆ្នាំ ១០ឆ្នាំ បើសិនជាអនុវត្តន៍ការពិន័យហ្នឹងគឺពួកគាត់មិនមានអីបង់ទៅក្រសួងទេ មិនមានអីបង់ទៅរដ្ឋាភិបាលទេ អញ្ចឹងហើយពួកគាត់ខ្លាច ហើយការខ្លាចនេះហើយដែលធ្វើឲ្យប្រកាសមួយចំនួនមិនអាចអនុវត្តបានហ្នឹង » ។
បើតាមអគ្គនាយកដ្ឋានពន្ធដារ បច្ចុប្បន្នអង្គការសង្គមស៊ីវិលដែលប្រតិបត្តិនៅកម្ពុជាមានជិត៦ពាន់ស្ថាប័ន ខណៈមានតែអង្គការជាង១ពាន់ប៉ុណ្ណោះដែលបានចុះបញ្ជីបង់ពន្ធនៅអគ្គនាយកដ្ឋាន៕