សាលាដំបូងខេត្តសៀមរាបកំពុងឃុំខ្លួនបណ្តោះអាសន្នជនជាតិចិន៩នាក់ ដោយបន្តនីតិវិធីស៊ើបអង្កេតលើសំណុំរឿងរបស់ពួកគេទាក់ទងនឹងការផ្សព្វផ្សាយរូបភាពអាសអាភាសកុមារ។
អ្នកនាំពាក្យសាលាដំបូងខេត្តសៀមរាប លោក យិន ស្រាង ប្រាប់ VOD នៅព្រឹកនេះថា ចៅក្រមស៊ើបសួរបានឃុំខ្លួន ជនជាតិចិន៩នាក់បណ្តោះអាសន្ននៅក្នុងពន្ធនាគារខេត្ត តាមការចោទប្រកាន់របស់តំណាងអយ្យការពីបទចែកចាយរូបភាពអាសអាភាសរបស់កុមារ ដោយបន្តនីតិវិធីស៊ើបហើយនឹងជំនុំជម្រះនៅថ្ងៃក្រោយ។
កាលពីថ្ងៃទី៨ ខែធ្នូ ឆ្នាំ២០១៨កន្លងទៅ សមត្ថកិច្ចខេត្តសៀមរាបបានឃាត់ខ្លួនជនជាតិចិន៩នាក់នៅបីទីតាំងផ្សេងគ្នាក្នុងខេត្តនេះ និងបានបញ្ជូនមកសាលាដំបូងកាលពីម្សិលមិញដើម្បីបន្តចាត់ការតាមច្បាប់។
របាយការណ៍របស់ក្រសួងមហាផ្ទៃចេញផ្សាយកាលពីខែកញ្ញាកន្លងទៅបានបង្ហាញថា ជនជាតិចិននៅកម្ពុជាមានចំនួន ២១ម៉ឺននាក់ ក្នុងនោះជនជាតិចិនកំពុងរស់នៅច្រើនជាងគេក្នុងខេត្តព្រះសីហនុមានចំនួន ៧៨ ០០០នាក់។
គិតត្រឹមខែធ្នូ ឆ្នាំ២០១៨ ជនជាតិចិនចំនួន៦០៨នាក់ ត្រូវបានអាជ្ញាធរកម្ពុជាបញ្ជូនទៅប្រទេសចិនវិញ ក្រោយពីពួកគេបានប្រព្រឹត្តបទល្មើសចំនួន២ប្រភេទ គឺបទល្មើសគំរាមជំរិត និងឆបោកតាមប្រព័ន្ធទូរគមនាគមន៍ (VOIP)៕