ប៉ូលិសអន្តោប្រវេសន៍ថៃមិនអនុញ្ញាតឲ្យមេធាវីជួបប្រធានសហជីពខ្មែរមួយរួបដែលចាប់ខ្លួនកាពីសប្តាហ៍មុនតាមសំណើរបស់រដ្ឋាភិបាលកម្ពុជា ដែលជាប់ពាក់ព័ន្ធការផលិតវីដេអូឯកសារអំពីការជួញដូរមនុស្ស។
យោងតាមអ្នកស្រី ឡុង គីមហ៊ាង ជាភរិយារបស់លោក រ៉ាត់ រដ្ឋមុនី បានឲ្យដឹងថា ប៉ូលិសអន្តោប្រវេសន៍ថៃមិនអនុញ្ញាតឲ្យមេធាវីជួបប្តីរបស់អ្នកស្រីនោះទេ កាលពីរសៀលថ្ងៃទី១១ ខែធ្នូ ឆ្នាំ២០១៨នេះ ដោយអះអាថា ករណីនេះជាករណីពិសេស។
អ្នកស្រី គីហ៊ាង បាននិយាយថា៖ «ពួកគេនិយាយថា ករណីពិសេសដោយត្រូវការអនុញ្ញាតពីថ្នាក់លើ»។
ប្រធានសហជីពកម្មករសំណង់លោក រ៉ាត់ រដ្ឋមុនី ត្រូវបានប៉ូលិសថៃចាប់ខ្លួនកាលពីថ្ងៃទី៧ ខែធ្នូ ឆ្នាំ២០១៨ នៅក្នុងទីក្រុងបាកក ប្រទេសថៃ តាមសំណើរបស់រដ្ឋាភិបាលកម្ពុជា ដោយជាប់ពាក់ព័ន្ធការផលិតវីដេអូឯកសារមានចំណងជើងថា «ម្តាយខ្ញុំ លក់ខ្ញុំ» របស់សារព័ត៌មានរុស្ស៊ី (RT)។
វីដេអូឯកសារ «ម្តាយខ្ញុំ លក់ខ្ញុំ» និយាយអំពីស្រ្តីខ្មែរលក់កូនស្រីខ្លួនឯង ដោយសារជីវភាពខ្វះខាត និងរៀបរាប់ពីស្ថានភាពនៃការប្រកបអាជីវកម្មផ្លូវភេទនៅកម្ពុជា។ក្រោយពីការផ្សព្វផ្សាយវីដេអូនេះសមត្ថកិច្ចកម្ពុជាបកស្រាយថា វីដេអូនេះជារឿងប្រឌិតឡើង ដែលធ្វើឲ្យប៉ះពាល់កិត្តិយសដល់ប្រទេសកម្ពុជា ហើយក្រោយមកបានបើកការស៊ើបអង្កេតរកអ្នកជាប់ពាក់ព័ន្ធក្នុងការផលិតវីដេអូ។
កាលពីម្សិលមិញអង្គការឃ្លាំមើលសិទ្ធិមនុស្ស (HRW) បានស្នើទៅរដ្ឋាភិបាលថៃកុំបញ្ជូនប្រធានសហជីពរូបនេះមកកម្ពុជាវិញ ដោយបារម្ភពីការកាត់ទោសក្រោមហេតុផលនយោបាយ និងការឃុំខ្លួនមិនត្រឹមត្រូវ។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន មិនអាចទាក់ទងសុំការអត្ថាធិប្បាយបានទេ។