អង្គការសិទ្ធិមនុស្សតំបន់មួយ បានរិះគន់ចំពោះការកែប្រែច្បាប់របស់កម្ពុជានៅថ្ងៃនេះថា ធ្វើឡើងដើម្បីស្វែងរកការគាំទ្រពីសហគមន៍អន្តរជាតិតែប៉ុណ្ណោះ ហើយវានឹងមិនផ្ដល់លទ្ធផលវិជ្ជមានយូរអង្វែងនោះឡើយ។
រដ្ឋសភាកម្ពុជា ដែលមានតំណាងរាស្ត្រសុទ្ធតែជាសមាជិករបស់គណបក្សប្រជាជនកម្ពុជា បានអនុម័តលើសំណើវិសោធនកម្មមាត្រា ៤៥ថ្មីស្ទួន នៃច្បាប់គណបក្សនយោបាយ សម្រាប់បើកផ្លូវឲ្យថ្នាក់ដឹកនាំអតីតគណបក្សសង្គ្រោះជាតិ ១១៨រូប បានវិលត្រឡប់ចូលប្រឡូកក្នុងឆាកនយោបាយឡើងវិញ។
ប៉ុន្តែ តំណាងរាស្ត្រម៉ាឡេស៊ី លោក Charles Santiago ដែលជាប្រធានអង្គការសមាជិកសភាអាស៊ានដើម្បីសិទ្ធិមនុស្ស ហៅកាត់ថា APHR បានថ្លែងតាមសារអេឡិត្រូនិចនៅថ្ងៃនេះថា សំណើកែប្រែច្បាប់នេះ ត្រូវបានធ្វើឡើងសម្រាប់តែស្វែងរកការគាំទ្រពីសហគមន៍អន្តរជាតិតែប៉ុណ្ណោះ ហើយលោកថា វានឹងមិនផ្ដល់ផលវិជ្ជមានសម្រាប់និរន្តរភាពនយោបាយនៅកម្ពុជានោះឡើយ។
លោក Charles Santiago បានសរសេរតាមអ៊ីម៉ែលថា៖ «នេះ[ការអនុម័តសំណើច្បាប់]ពិតជាសញ្ញាមិនស្មោះត្រង់មួយធ្វើឡើងដោយលោក ហ៊ុន សែន និងរដ្ឋាភិបាលផ្ដាច់ការរបស់លោក ក្នុងបំណងស្វែងរកការគាំទ្រពីសហគមន៍អន្តរជាតិ […]។ វិសោធនកម្មច្បាប់នៅថ្ងៃនេះ នឹងជះឥទ្ធិពលតិចតួចប៉ុណ្ណោះសម្រាប់និរន្តភាពយូរអង្វែង»។
នៅក្នុងកិច្ចប្រជុំសភានៅព្រឹកថ្ងៃនេះ តំណាងរាស្ត្រមួយរូបរបស់គណបក្សកាន់អំណាច លោក ជាម យៀប ដែលអះអាងថាបានចុះហត្ថខាលើសំណើវិសោធនកម្មច្បាប់នេះ បានឡើងការពារក្នុងសភាថា ច្បាប់នេះមានបំណងពង្រឹងនីតិរដ្ឋ ធានាពីដំណើរការប្រជាធិបតេយ្យនៅកម្ពុជា មិនមែនធ្វើឡើងក្រោមសម្ពាធអន្តរជាតិដូចមជ្ឈដ្ឋានមួយចំនួនលើកឡើងនោះទេ។
គណបក្សសង្គ្រោះជាតិ ដែលឈ្នះបានអាសនៈសភា ៥៥នៅក្នុងការបោះឆ្នោតជាតិកាលពីឆ្នាំ២០១៣ និងឈ្នះបានអាសនៈក្រុមប្រឹក្សាឃុំសង្កាត់ ៥០០៧នៅទូទាំងប្រទេសនៅក្នុងការបោះឆ្នោតឃុំសង្កាត់កាលពីឆ្នាំ២០១៧នោះ ត្រូវបានតុលាការកំពូលសម្រេចរំលាយចោលកាលពីខែវិច្ឆិកា ឆ្នាំ២០១៧ ទៅតាមបណ្ដឹងរបស់ក្រសួងមហាផ្ទៃ ជុំវិញការចោទថា ពាក់ព័ន្ធនឹងអំពើក្បត់ជាតិ។
ជាងនេះទៅ ថ្នាក់ដឹកនាំ ១១៨រូបរបស់គណបក្សប្រឆាំងមួយនេះ ក៏ត្រូវបានតុលាការហាមឃាត់មិនឲ្យធ្វើនយោបាយរយៈពេល ៥ឆ្នាំផងដែរ ដែលធ្វើឲ្យពួកគេពុំអាចចូលរួមប្រកួតប្រជែងនៅក្នុងការបោះឆ្នោតជាតិកាលពីចុងខែកក្កដាកន្លងមកនេះនោះឡើយ។
ចំណាត់ការពីរដ្ឋាភិបាលទៅលើគណបក្សប្រឆាំងមួយនេះ បានជំរុញឲ្យសហរដ្ឋអាមេរិក ព្រមានពង្រីកទណ្ឌកម្មទិដ្ឋាការ និងបង្កកទ្រព្យសម្បត្តិដល់មន្ត្រីរដ្ឋាភិបាលមួយចំនួនបន្ថែមទៀត បើមិនបើកផ្លូវឲ្យគណបក្សប្រឆាំងដែលបានរំលាយកាលពីចុងឆ្នាំ២០១៧ បានធ្វើនយោបាយឡើងវិញ រួមទាំងមន្ត្រី ១១៨ទៀតដែលបានហាមឃាត់។
ចំណែកឯសហភាពអឺរ៉ុបវិញបានជូនដំណឹងទៅរដ្ឋាភិបាលកម្ពុជាអំពីការដំណើរការដកហូតប្រព័ន្ធអនុគ្រោះពន្ធសម្រាប់ការនាំចូលទំនិញពីប្រទេសកម្ពុជាដោយរួចផុតពីការបង់ពន្ធមានតម្លៃជិត ៧០០លានដុល្លារក្នុងមួយឆ្នាំ៕
