មន្ត្រីក្រសួងការងារ អះអាងថា នឹងចាត់វិធានការរាល់ជនបរទេសទាំងឡាយណាដែលអាជ្ញាធរកម្ពុជារកឃើញថាបានបំពេញការងារដោយខុសច្បាប់។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ឱ្យដឹងតាមរយៈប្រព័ន្ធទំនាក់ទំនងតេឡេក្រាមនៅថ្ងៃនេះ ថារាល់ជនបរទេសដែលធ្វើការងារដោយខុសច្បាប់ គឺត្រូវរងការផាកពិន័យជាប្រាក់ បន្ថែមលើទោសប្បញ្ញត្តិនៃច្បាប់ស្តីពីអន្តោប្រវេសន៍នៅកម្ពុជាទៀតផង។
កម្លាំងចម្រុះ មន្ត្រីមន្ទីរការងារខេត្ត ព្រមទាំងមន្ត្រីតុលាការខេត្តស្វាយរៀង កាលពីថ្ងៃទី៦ និងទី៧ ខែធ្នូ បានចុះធ្វើអធិការកិច្ចពិនិត្យការស្នាក់នៅ និងការប្រកបមុខរបររបស់ជនបរទេស នៅតាមសណ្ឋាគារ ផ្ទះសំណាក់ កាស៊ីណូ និងសហគ្រាសមួយចំនួន។
អនុប្រធានមន្ទីរការងារ និងបណ្តុះបណ្តាលវិជ្ជាជីវៈ លោក អ៊ូ សុខឿន មានប្រសាសន៍ថា ការចុះធ្វើអធិការកិច្ចនៅមិនទាន់បញ្ចប់ ហើយខាងលោកនៅមិនទាន់បានបូកសរុបរបាយការណ៍នោះទេ។ លោក បន្តថា ក្នុងអំឡុងពេលចុះពិនិត្យ អាជ្ញាធររកឃើញថា មានកាស៊ីណូមួយ ដែលមានជនជាតិចិនកំពុងបំពេញការងារខុសច្បាប់ជាង១ ពាន់នាក់ ដោយថា មិនមានបណ្ណនិងគ្មានសៀវភៅការងារត្រឹមត្រូវ។
លោកថា ពួកគេទាំងនោះ ត្រូវប្រឈមការផាកពិន័យជាប្រាក់ក្នុងម្នាក់ចំនួន៥សែនរៀល និងតម្រូវឱ្យពួកគេទៅចុះបញ្ជីធ្វើបណ្ណនិងសៀវភៅការងារឡើងវិញ។
លោក មានប្រសាសន៍ថា៖ «ក្នុងករណីដែលយើងឆែកទៅមិនមានបណ្ណនិងសៀវភៅការងារអីចឹង អាហ្នឹង! យើងឱ្យគាត់ទៅធ្វើបណ្ណការងារ។ ហើយក្នុងករណីលើកក្រោយយើងរកឃើញ ពិន័យម្តងហើយ គាត់នៅតែរឹងទទឹងចចេស អាហ្នឹង! ការពិន័យវាអាចទ្វេដង ហើយចុងក្រោយវាអាចបណ្តេញចេញអីចឹង។ បាទបណ្តេញចេញពីស្រុកខ្មែរហ្នឹងតែម្តង»។
អនុប្រធានមន្ទីរការងារដដែល បញ្ជាក់ថា នៅខេត្តស្វាយរៀងមានជនបរទេសកំពុងស្នាក់នៅ និងបំពេញការងារចំនួន២៦ជនជាតិ ប៉ុន្តែ លោកមិនដឹងចំនួនជនបរទេសសរុបទេ ដោយលោកគ្រាន់តែបញ្ជាក់ថាជនជាតិចិនមានចំនួនច្រើនជាងគេ។ លោកអះអាងថា គិតត្រឹមថ្ងៃម្សិលមិញ មន្ទីរការងារបានផ្តល់បណ្ណនិងសៀវភៅការងារដល់ជនបរទេសចំនួនជាង១ម៉ឺននាក់(១១ ០៣១) ។
នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក មឿន តុលា មានប្រសាសន៍ថា ការចុះអធិការកិច្ចចំពោះជនបរទេស គប្បីធ្វើឡើងឱ្យបានទូលំទូលាយ ហើយធ្វើជាញឹកញាប់ មានតម្លាភាព និងគ្មានរើសអើងជនជាតិ។ លោកមើលឃើញថា នៅពេលកម្លាំងពលកម្មក្រៅស្រុកចូលមកច្រើន ម្យ៉ាងការគ្រប់គ្រងមិនបានត្រឹមត្រូវ នឹងបង្កផលប៉ះពាល់ដល់កម្លាំងពលកម្មម្ចាស់ស្រុកមិនខាន។
លោកមានប្រសាសន៍ថា៖ «ខ្ញុំមើលទៅឃើញ ដូចជាមិនគួរពិចារណា អំពីកម្លាំងពលកម្មបរទេសទេ ព្រោះដូចខ្ញុំនិយាយអីចឹង ថាកម្លាំងពលកម្មរបស់យើងកំពុងតែអត់ទាន់គ្រប់។ ចង់និយាយថា ស្រូបយកកម្លាំងពលកម្មរបស់យើងអត់ទាន់គ្រប់ផង ហើយគ្នាទៅធ្វើការនៅថៃ នៅម៉ាឡេ នៅកូរ៉េខាងត្បូងអី ។ល។ អ្វីដែលរដ្ឋត្រូវពិចារណា»។
លោក មឿន តុលា ថា ដើម្បីការងារគ្រប់គ្រងកម្លាំងពលកម្មបរទេសមានប្រសិទ្ធភាព អាជ្ញាធរគប្បីពង្រឹងការអនុវត្តច្បាប់ និងធានាមិនឱ្យមានអំពើពុករលួយ ដោយថាមន្ត្រីជំនាញ ពិសេសអាជ្ញាធរមូលដ្ឋានដឹងច្បាស់ពីស្ថានភាពជនបរទេសនៅកម្ពុជា។
របាយការណ៍បូកសរុបការងាររបស់ក្រសួងការងារនិងបណ្តុះបណ្តាលវិជ្ជាជីវៈ ដែលចេញកាលពីខែមីនា ឆ្នាំ២០១៨ ឱ្យដឹងថា កាលពីឆ្នាំ២០១៧ ក្រសួងការងារ បានផ្តល់បណ្ណ និងសៀវភៅការងារដល់កម្មករបរទេស ចំនួនជាង៥ម៉ឺននាក់(៥៦ ៩៧៥)។
របាយការណ៍របស់ក្រសួងមហាផ្ទៃចេញផ្សាយកាលពីខែកញ្ញាកន្លងទៅ បានបង្ហាញថា ជនជាតិចិននៅកម្ពុជាមានចំនួន២១ម៉ឺននាក់ ក្នុងនោះ ជនជាតិចិនកំពុងរស់នៅខេត្តព្រះសីហនុ មានចំនួន ៧៨ ០០០នាក់៕
