លោកនាយករដ្ឋមន្ត្រី ហ៊ុន សែន បានលើកឡើងថា ទំនប់វារីអគ្គិសនីសេសានក្រោម២ ដែលទើបសម្ពោធដាក់ឲ្យដំណើរការនៅថ្ងៃនេះ នឹងផ្ដល់នូវចិរភាពនៃការផ្គត់ផ្គង់អគ្គិសនីក្នុងប្រទេស ហើយក៏នឹងចូលរួមជំរុញកំណើនសេដ្ឋកិច្ចកម្ពុជាច្រើនផងដែរ ខណៈបណ្ដាញអគ្គិសនីត្រូវបានចែកចាយជិត ១០០ភាគរយហើយ។
ក្នុងពិធីសម្ពោធដាក់ឲ្យប្រើប្រាស់ជាផ្លូវការទំនប់វារីអគ្គិសនីសេសានក្រោម ២ នៅខេត្តស្ទឹងត្រែងនៅព្រឹកនេះ លោក ហ៊ុន សែន បានលើកឡើងថា ទំនប់ដែលបានផ្ដល់ថាមពលអគ្គិសនីជាង ៤០០មេហ្គាវ៉ាត់នេះ នឹងធ្វើឲ្យកម្ពុជាមានចិរភាពអគ្គិសនី ដែលនឹងជួយដល់គោលនយោបាយបញ្ចុះតម្លៃអគ្គិសនីរបស់រដ្ឋផងដែរ។
លោកថា៖ «គេប្រើពាក្យថា ប្រសិនជាវារីអគ្គិសនីសេសានត្រូវបានធ្វើ នឹងធ្វើឲ្យប៉ះពាល់ផលត្រីរហូតដល់ ៧០ភាគរយ។ បានខ្ញុំបង្ហាញការភ្ញាក់ផ្អើល ក៏ប្រដៅទៅជាមួយ ត្រីវានៅក្នុងទន្លេសាប ដើម្បីឲ្យភ្លឺភ្នែក ត្រីវានៅក្នុងទន្លេសាប ត្រីនៅក្នុងទន្លេមេគង្គឯណោះ ហេតុអីបានត្រីវាចេះឡើងភ្នំ? ត្រីខ្មែរវាឆ្លាតណាស់ តែវាឆ្លាតតែនៅពេលដែលគេប្រឆាំងយើងតែប៉ុណ្ណោះ»។
បើតាមលោកនាយករដ្ឋមន្ត្រី បច្ចុប្បន្ននេះ បណ្ដាញអគ្គិសនី ត្រូវបានចែកចាយទៅដល់ប្រជាពលរដ្ឋដល់ទៅជាង ៨៦ភាគរយនៅទូទាំងប្រទេស ពោលគឺបានចែកចាយដល់ភូមិចំនួន ១២ ៣០៥ នៅក្នុងចំណោមភូមិសរុប ១៤ ៣៨៣។
ទោះជាយ៉ាងណា លោកក៏បានប្រកាសពីគម្រោងចង់ខ្ចីលុយចិនបន្ថែមក្នុងការតបណ្ដាញអគ្គិសនីនេះឲ្យគ្រប់នាឆ្នាំខាងមុខផងដែរ។
លោកថ្លែងថា៖ «អញ្ចឹងទេ សុំជម្រាបឯកឧត្ដមអគ្គរដ្ឋទូតថ្មីផងថា ទស្សនកិច្ចរបស់ខ្ញុំនាពេលខាងមុខ ការចរចាផ្ដោតទៅលើការស្មើសុំឥណទានយ៉ាងគំហុកមួយ ដើម្បីតបណ្ដាញអគ្គិសនីសម្រាប់កម្ពុជា។ សុំជម្រាបទៅឯកឧត្ដមប្រធានាធិបតី ស៊ី ជិនពីន និងឯកឧត្ដមនាយករដ្ឋមន្ត្រី លី ឃឹជាំង»។
អ្នកវិភាគសេដ្ឋកិច្ចលោក យ៉ង ប៉ាក់ យល់ស្របចំពោះការលើកឡើងរបស់នាយករដ្ឋមន្ត្រី តែអ្វីដែលលោកបារម្ភនោះ គឺទៅលើការចែកចាយ និងតម្លៃអគ្គិសនីដែលកំណត់ឲ្យប្រើនោះ។
លោកថា៖ «ជាទូទៅ យើងឃើញកន្លងមកហើយ ការគ្រប់គ្រងប្រភពធនធានរបស់យើង គឺច្រើនតែគ្រប់គ្រងមិនមានប្រសិទ្ធភាពខ្ពស់ទេ។ មិនមែនតែអគ្គិសនីហ្នឹងទេ យើងឃើញហើយ មិនបាច់និយាយចំ មានកន្លែងផ្សេងៗទៀត ដូចជាការគ្រប់គ្រងការធ្វើផ្លូវថ្នល់អីនេះ យើងខ្ចីលុយមកពីគេអី យើងគ្រប់គ្រងមិនបានល្អ ធ្វើឲ្យការសាងសង់មិនមានគុណភាព ឆាប់ខូចឆាប់អីអញ្ចឹងទៅ។ ដូចគ្នាដែរ ខ្ញុំសង្ឃឹមថា រដ្ឋាភិបាលនឹងពង្រឹងការគ្រប់គ្រងកន្លែងដែលផលិតអគ្គិសនីហ្នឹងឲ្យបានល្អបំផុត ហើយចែកចាយឲ្យបានទូលំទូលាយសម្រាប់ការប្រើប្រាស់ក្នុងស្រុកយើង»។
ទំនប់វារីអគ្គិសនីសេសានក្រោម២ គឺជាគម្រោងវិនិយោគរួមគ្នាមានតម្លៃជិត ៨០០លានដុល្លារ ដែលកាន់កាប់ដោយក្រុមហ៊ុន រ៉ូយ៉ាល់ គ្រុប ៣៩ភាគរយ កាន់កាប់ដោយក្រុមហ៊ុនចិន China Hydolancang International Energy ៥១ភាគរយ និងកាន់កាប់ដោយក្រុមហ៊ុនអគ្គិសនីវៀតណាមអន្តរជាតិ (EVN) ៥១ភាគរយ នៅក្រោមសម្បទានរយៈពេល ៤៥ឆ្នាំ។
យោងតាមរបាយការណ៍របស់អាជ្ញាធរកម្ពុជា បច្ចុប្បន្ន កម្ពុជាផលិតថាមពលអគ្គិសនីបានប្រមាណ ២៥០០មេហ្គាវ៉ាត់ ដែលអាចផ្ដល់ថាមពលជាង ៨០០០គីឡូវ៉ាត់ក្នុង ១ម៉ោង៕