មន្ត្រីស្ថានទូតនៃសាធារណៈរដ្ឋសហព័ន្ធរុស្ស៊ីប្រចាំកម្ពុជា ពុំបានចេញមកទទួលញត្តិសុំអន្តរាគមន៍ដែលស្នើប្រទេសមហាអំណាចមួយនេះសម្របសម្រួលជាមួយរដ្ឋាភិបាលកម្ពុជា ក្នុងការដោះលែងលោក រ៉ាត់ រដ្ឋមុន្នី ដែលសហការផលិតភាពយន្តឯកសារឲ្យសារព័ត៌មានរុស្ស៊ី RT រឿង « ម្ដាយខ្ញុំលក់ខ្ញុំ » ឲ្យមានសេរីភាពនោះទេ។
កាលពីថ្ងៃទី១៣ ខែធ្នូសប្ដាហ៍មុន ប្រធានសហព័ន្ធសហជីពសំណង់កម្ពុជា លោក រ៉ាត់ រដ្ឋមុន្នី ត្រូវបានតុលាការក្រុងភ្នំពេញសម្រេចចោទប្រកាន់ញុះញង់ឲ្យមានការរើសអើង តាមមាត្រា៤៩៦ នៃក្រមព្រហ្មទណ្ឌ និងបញ្ជូនទៅឃុំខ្លួននៅពន្ធនាគារព្រៃស បន្ទាប់ពីគាត់ត្រូវបានប្រទេសថៃចាប់បញ្ជូនត្រលប់មកកម្ពុជាវិញ។
នៅព្រឹកថ្ងៃទី១៨ ខែធ្នូនេះ ក្រុមគ្រួសារលោក រ៉ាត់ រដ្ឋមុន្នី និងសកម្មជនសិទ្ធិមនុស្សជាង១០នាក់ទៀតបាននាំគ្នាទៅដាក់ញត្តិនៅស្ថានទូតរុស្ស៊ី ដើម្បីស្នើដល់ប្រទេសនេះធ្វើការសម្របសម្រួលជាមួយរដ្ឋាភិបាលកម្ពុជា ក្នុងការដោះលែងលោកឲ្យមានសេរីភាពវិញ។
ភរិយាលោក រដ្ឋមុន្នី អ្នកស្រី ឡុង គឹមហ៊ាន បានប្រាប់អ្នកសារព័ត៌មានថា មូលហេតុដែលអ្នកស្រីទាមទារឲ្យប្រទេសរុស្ស៊ីជួយប្តីអ្នកស្រីឲ្យមានសេរីភាព ដោយសារតែស្ថានីយទូរទស្សន៍ RT ទទួលជំនួយពីរដ្ឋរុស្ស៊ីក្នុងការផលិតវីដេអូដែលរដ្ឋាភិបាលកម្ពុជាយកមកចោទប្ដីរបស់អ្នកស្រីនៅពេលនេះ។
អ្នកស្រី គឹមហ៊ាន៖ « ខ្ញុំស្នើសុំដល់រដ្ឋាភិបាលរុស្ស៊ីធ្វើកិច្ចការរបស់គាត់ជួយដោះលែងប្ដីខ្ញុំ ព្រោះគេចោទប្រកាន់ដោយសារតែគាត់ជាប់ទាក់ទងនឹងការផលិតភាពយន្តឯកសារទាក់ទងនឹងការជួញដូរផ្លូវភេទនៅកម្ពុជាជាមួយនឹងកាសែតរុស្ស៊ី។ ដូច្នេះហើយខ្ញុំស្នើសុំឲ្យរដ្ឋាភិបាលរុស្ស៊ី ធ្វើការជាមួយក្រសួងការបរទេសកម្ពុជា ដើម្បីឲ្យមានការដោះលែងប្ដីខ្ញុំវិញភ្លាម! ព្រោះដោយសារតែប្ដីរបស់ខ្ញុំអត់មានខុសទេ ប្ដីរបស់ខ្ញុំអត់បានប្រឌិតទេ។ រឿងដែលបានផលិតដោយ RT មិនមែនជារឿងប្រឌិតហើយមិនបានជួលតួឲ្យមកសម្ដែងអីទេ! »
ក្នុងញត្តិដែលនឹងដាក់ស្នើទៅស្ថានទូតរុស្ស៊ីនោះក្រុមគ្រួសារលោក រ៉ាត់ រដ្ឋមុន្នី បានទាមទារឲ្យប្រទេសនេះប្រកាសជំហរចំពោះភាពត្រឹមត្រូវនៃភាពយន្តឯកសារនេះ និងធ្វើការជាមួយក្រសួងការបរទេសកម្ពុជាក្នុងការដោះលែងលោក រដ្ឋមុន្នី ជាបន្ទាន់ផងដែរ។
មន្ត្រីជំនួយការកិច្ចសហការកម្ពុជា-រស្ស៊ី លោក ម៉ា ស៊ីថាវ បានឲ្យ VOD ដឹងថា ការចេញមកទទួល ឬមិនមកគឺជាអភ័យឯកសិទ្ធិរបស់ប្រទេសនេះ តែលោកបានសន្យាជាមួយក្រុមគ្រួសារលោក រដ្ឋមុន្នី ថានឹងយករឿងនេះពិភាក្សាជាមួយស្ថានទូតក្នុងកិច្ចប្រជុំរវាងក្រុមការងារលោកនិងស្ថានទូតនាពេលខាងមុខ។
លោកថា៖ « ខ្ញុំគ្រាន់តែជួយសួរយោបល់គេ(រុស្ស៊ី)ក្នុងរឿងហ្នឹង ហើយគេប្រាកដជាសួរយើងឲ្យយើងដោះស្រាយដែរ ខ្ញុំគ្រាន់តែមកស្ដាប់ព័ត៌មានទេថារឿងពិតប្រាកដយ៉ាងម៉េចអីយ៉ាងម៉េច » ។
កាលពីខែតុលាកន្លងទៅ សារព័ត៌មានរុស្ស៊ី Russia Today (RT) បានចេញផ្សាយនូវភាពយន្តឯកសារមួយដែលមានចំណងជើងថា «ម្ដាយខ្ញុំលក់ខ្ញុំ» ដែលវីដេអូឯកសារនេះ និយាយអំពីស្រ្តីខ្មែរលក់កូនស្រីខ្លួនឯង ដោយសារជីវភាពខ្វះខាត ក៏ដូចជាស្ថានភាពស្រ្តីដែលប្រកបមុខរបររកស៊ីផ្លូវភេទនៅកម្ពុជា។
ក្រោយពីការផ្សព្វផ្សាយវីដេអូនេះ សមត្ថកិច្ចកម្ពុជាបកស្រាយថា វីដេអូនេះ ជារឿងប្រឌិតឡើង ដែលធ្វើឲ្យប៉ះពាល់កិត្តិយសដល់ប្រទេសកម្ពុជា ហើយក្រោយមកបានបើកការស៊ើបអង្កេតរកអ្នកជាប់ពាក់ព័ន្ធក្នុងការផលិតវីដេអូនេះ ដែលឈានដល់ការចាប់នឹងឃុំខ្លួនលោក រ៉ាត់ រដ្ឋមុន្នី កាលពីសប្ដាហ៍មុន៕