ភរិយារបស់លោក រ៉ាត់ រត្នមុនី បានអំពាវនាវទៅកាន់សាធារណជនឲ្យចូលរួមទាមទារដល់រដ្ឋាភិបាល ដើម្បីដោះលែងប្តីខ្លួនឲ្យមានសេរីភាពវិញ ដោយថា ការចោទប្រកាន់និងឃុំខ្លួនប្ដីអ្នកស្រីគឺអយុត្តិធម៌។
កាលពីថ្ងៃទី១៣ ខែធ្នូសប្ដាហ៍មុន ប្រធានសហព័ន្ធសហជីពសំណង់កម្ពុជានិងជាផលិតករទូរទស្សន៍រុស្ស៊ី RT លោក រ៉ាត់ រត្នមុនី ត្រូវបានតុលាការក្រុងភ្នំពេញសម្រេចចោទប្រកាន់ថា ញុះញង់ឲ្យមានការរើសអើង តាមមាត្រា៤៩៦ នៃក្រមព្រហ្មទណ្ឌ និងបញ្ជូនទៅឃុំខ្លួននៅពន្ធនាគារព្រៃសបន្ទាប់ពីគាត់ត្រូវបានប្រទេសថៃចាប់បញ្ជូនត្រលប់មកកម្ពុជាវិញ។
ភរិយារបស់លោកគឺអ្នកស្រី ឡុង គឹមហ៊ាង មានប្រសាសន៍ប្រាប់ VOD នៅថ្ងៃនេះ ដោយអំពាវនាវដល់អ្នកដែលស្គាល់អ្នកស្រីនិងប្តីអ្នកស្រី រួមទាំងសកម្មជនសិទ្ធិមនុស្សទាំងអស់ដែលយល់ថារឿង«ម្ដាយខ្ញុំលក់ខ្ញុំ» ជារឿងពិតនិយាយបញ្ហាដែលកំពុងកើតមានក្នុងសង្គមខ្មែរ ចូលរួមទាមទារឲ្យប្ដីអ្នកស្រីមានសេរីភាពឡើងវិញ។
អ្នកស្រី ឡុង គឹមហ៊ាង៖ « តាមរយៈការចែករំលែកតាមបណ្ដាញសង្គមហ្វេសបុកតាមរយៈការគាំទ្រនាងខ្ញុំ ឬចូលរួមសកម្មភាពជាមួយនាងខ្ញុំ ឬក៏តាមការបញ្ចេញមតិយោបល់ផ្សេងៗដែលបង្ហាញពីភាពត្រឹមត្រូវនៃការផលិតភាពយន្តឯកសារស្ដីពីការជួញដូរផ្លូវភេទនៅកម្ពុជាហ្នឹង! គ្រប់គ្នាគ្រាន់តែនិយាយថាការចាប់ខ្លួនប្ដីខ្ញុំវាមិនត្រឹមត្រូវហើយប្រាប់គ្នាតៗគ្នាហ្នឹងក៏ជាការជួយប្ដីខ្ញុំដែរ » ។
អ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន មានប្រសាសន៍ថា ពលរដ្ឋមានសិទ្ធិក្នុងការធ្វើការតវ៉ាដោយសន្តិវិធីចំពោះការមិនពេញចិត្តលើរឿងអ្វីមួយ តែលោកព្រមានថា វិធានការនឹងមាន ប្រសិនជាការតវ៉ានោះធ្វើឡើងទៅហួសច្បាប់កំណត់។
លោកថា៖ « សិទ្ធិសេរីភាពរបស់គាត់គឺមានស្របច្បាប់គាត់ធ្វើអីធ្វើទៅ! ឲ្យតែស្របច្បាប់។ ហើយឲ្យតែថាជាប់គុក មិនទាន់នឹងកាត់ផង គ្រាន់តែស្ថិតក្នុងនីតិវិធីបែរជាមកទាមទារដោះលែង មិនដឹងថាច្បាប់ហ្នឹងទៅណាទេ!បន្តិចទៀតខ្មែរក្រហមវាប្រមូលមនុស្សមកឲ្យដោះលែង ខៀវ សំផន អីបានទៀតហើយ។ ឥឡូវគេកំពុងអនុវត្តនីតិវិធីច្បាប់ គាត់មានសិទ្ធិរបស់គាត់ៗធ្វើម៉េចចធ្វើទៅឲ្យតែស្របច្បាប់ តែបើគាត់ធ្វើបំពានច្បាប់ រឿងហ្នឹងគេគិតផ្សេងទៀត » ។
ប្រធានផ្នែកស៊ើបអង្កេតនៃសមាគមអាដហុកលោក សឹង សែនករុណា យល់ថា រដ្ឋាភិបាលគួរតែស្នើសុំឲ្យ RT និងអ្នកពាក់ព័ន្ធរឿងនេះមកបកស្រាយ ជាជាងចាប់ជនជាតិខ្លួនឯងដែលត្រឹមជាអ្នកសម្របសម្រួលឲ្យសារព័ត៌មានអន្តរជាតិមួយនេះ។
លោកថា៖ « អ្នកសារព័ត៌មានយើងកាលណាឃើញអ្នកសារព័ត៌មានបរទេសមានទំនាក់ទំនងជាមួយរដ្ឋាភិបាលអញ្ចឹង យើងយល់ថា គេគឺជាស្ថាប័នព័ត៌មានមួយដែលមកធ្វើកិច្ចការក្នុងប្រទេសយើងស្របច្បាប់។ ហើយអញ្ចឹង យើងគ្រាន់តែធ្វើកិច្ចការគ្រាន់ជាអ្នកសម្របសម្រួលដែលខ្ញុំមើលឃើញគឺគាត់គ្រាន់តែសម្របសម្រួលឲ្យជួបនឹងប្រភពបកប្រែបកអីតែប៉ុនហ្នឹងទេ! បើយើងមើលទៅគាត់អត់មានសិទ្ធិអីចេញផ្សាយព័ត៌មានអញ្ចឹងទេ។ ហើយគួរណាស់តែខាងរដ្ឋាភិបាលមិនគួរចោទប្រកាន់ជនជាតិខ្មែរគ្នាឯងអញ្ចឹង គួរតែរកមើលថាអ្នកណាជាអ្នកធ្វើរឿងហ្នឹងដែលចេញផ្សាយរឿងហ្នឹង! »
អ្នកស្រី ឡុង គឹមហ៊ាង សរសេរលើហ្វេសប៊ុកថា ថ្ងៃនេះមន្ត្រីពន្ធនាគារព្រៃសមិនអនុញ្ញាតឲ្យអ្នកស្រី និងក្រុមគ្រួសារ ចូលជួបលោក រ៉ាត់ រត្នមុនី ទេ។ អ្នកស្រីបារម្ភថា ស្វាមីអ្នកស្រីរងការធ្វើទារុណកម្ម។
កាលពីខែតុលាកន្លងទៅទូរទស្សន៍រុស្ស៊ី (Russia Today (RT) បានចេញផ្សាយនូវភាពយន្តឯកសារមួយដែលមានចំណងជើងថា «ម្ដាយខ្ញុំលក់ខ្ញុំ» ដែលវីដេអូឯកសារនេះ និយាយអំពីស្រ្តីខ្មែរលក់កូនស្រីខ្លួនឯងដោយសារជីវភាពខ្វះខាត ក៏ដូចជាស្ថានភាពស្រ្តីដែលប្រកបមុខរបររកស៊ីផ្លូវភេទនៅកម្ពុជា។
ក្រោយពីការផ្សព្វផ្សាយវីដេអូនេះ សមត្ថកិច្ចកម្ពុជាបកស្រាយថា វីដេអូនេះ ជារឿងប្រឌិតឡើង ដែលធ្វើឲ្យប៉ះពាល់កិត្តិយសដល់ប្រទេសកម្ពុជា ហើយក្រោយមកបានបើកការស៊ើបអង្កេតរកអ្នកជាប់ពាក់ព័ន្ធក្នុងការផលិតវីដេអូនេះ ដែលឈានដល់ការចាប់នឹងឃុំខ្លួនលោក រ៉ាត់ រត្នមុនី កាលពីសប្ដាហ៍មុន៕
