យ៉ាងហោចណាស់មនុស្ស ២នាក់បានស្លាប់ ហើយ៤នាក់ទៀតបានរងរបួស ក្រោយពីអគ្គិភ័យបានឆាបឆេះរោងម៉ាស៊ីនកិនស្រូវមួយ ស្ថិតនៅក្នុងខេត្តកំពង់ស្ពឺកាលពីថ្ងៃម្សិលមិញនេះ។ នេះបើតាមរបាយការណ៍នគរបាលជាតិ។
របាយការណ៍របស់នាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៃអគ្គស្នងការនគរបាលជាតិ បានឲ្យដឹងថា រោងចក្រសម្ងួតអង្ករយីហោ«ហ្គោលដេនរ៉ាយស៍» ស្ថិតនៅក្នុងភូមិតាឡក ឃុំក្សេមក្សាន្ត ក្នុងស្រុកឧដុង្ គត្រូវភ្លើងឆាបឆេះ កាលពីថ្ងៃម្សិលមិញនេះ ដោយបណ្ដាលឲ្យកម្មករ២នាក់ស្លាប់ ហើយមនុស្ស ៤នាក់ទៀត រងរបួសនិងត្រូវបានបញ្ជូនទៅសង្គ្រោះបន្ទាន់។
បើតាមរបាយការណ៍នោះ អគ្គិភ័យក៏បានបំផ្លាញរថយន្តស្ទួចមួយគ្រឿង ម៉ាស៊ីនសម្ងួតស្រូវចំនួន ០១ និងសម្ភារប្រើប្រាស់ផ្សេងទៀត រួមទាំងស្រូវមួយចំនួនធំផងដែរ ខណៈនៅពេលនេះ សមត្ថកិច្ចកំពុងស្រាវជ្រាវរកមូលហេតុនៅឡើយ៕