ទំហំនៃការនាំចេញអង្ករកម្ពុជាបានបន្តធ្លាក់ចុះទៀតនៅក្នុងរយៈពេល១១ខែ ហើយភាគីក្នុងឧស្សាហកម្មមួយនេះ បានបន្ទោសទៅលើតម្លៃចំណាយដឹកជញ្ជូនខ្ពស់និងការធ្លាក់ចុះទំហំនៃការបញ្ជាទិញពីប្រទេសចិន។
យោងតាមរបាយការណ៍ស្ថានភាពនៃការនាំចេញអង្ករប្រចាំខែវិច្ឆិកា ឆ្នាំ២០១៨នេះ ឲ្យដឹងថា ក្នុងរយៈពេល១១ខែកន្លងមកនេះ កម្ពុជានាំចេញអង្ករទៅបរទេសបានប្រមាណ៤៩ម៉ឺនតោន ថយចុះ ១៣.១០ភាគរយ បើធៀបទៅនឹងរយៈពេលដូចគ្នាកាលពីឆ្នាំមុន។
ទំហំនៃការនាំចេញអង្ករកម្ពុជាថយចុះបែបនេះ ត្រូវបានប្រធានក្រុមហ៊ុននាំចេញអង្ករ Amru Rice លោក សុង សារ៉ន លើកឡើងថា ដោយសារការចំណាយលើថ្លៃដឹកជញ្ជូនខ្ពស់ ការថយចុះការបញ្ជាទិញពីប្រទេសចិន ហើយកសិករកម្ពុជានាំគ្នាផលិតអង្ករក្រអូបច្រើន ដែលធ្វើឲ្យតម្លៃអង្ករដែលនាំទៅលក់ មានតម្លៃខ្ពស់ជាងតម្លៃអង្កររបស់ប្រទេសដទៃ។
លោកថា៖ «យើងនឹងព្យាយាមដោះស្រាយកុំឲ្យវាមានឱកាសកើតឡើងដូចអញ្ចឹងៗទៀត។ វាអាចធ្វើឲ្យល្អប្រសើរនាឆ្នាំ២០១៩ហ្នឹង! សង្ឃឹមថា ខាងរទេះភ្លើង ក៏គាត់ដោះស្រាយទៅ ខាងក្រុមហ៊នដឹកជញ្ជូនផ្សេងៗ ខាងផែ ស្ថាប័នដែលពាក់ព័ន្ធទាំងមូលហ្នឹងគាត់ ដោះមួយផ្នែកៗដែលមានបញ្ហាហ្នឹងទៅ។ វាល្អប្រសើរច្រើនហើយនាឆ្នាំ២០១៩ហ្នឹងណា»។
ប៉ុន្តែ របាយការណ៍ស្ថានភាពនៃការនាំចេញអង្ករ បានឲ្យដឹងផងដែរថា ទំហំនៃការនាំចេញអង្កររបស់កម្ពុជាបានកើនឡើងពីចំនួន ៤ម៉ឺន ៥ពាន់តោន នៅខែតុលា មកដល់ចំនួនជាង ៦ម៉ឺន ២ពាន់តោន នៅក្នុងខែវិច្ឆិកាកន្លងមកនេះ។
អង្ករកម្ពុជាត្រូវបាននាំចេញដោយ៧០ក្រុមហ៊ុន ទៅកាន់ប្រទេស៦០ នៅទូទាំងពិភពលោក ក្នុងនោះប្រទេសចិន បារាំង ប៉ូឡូញ ម៉ាឡេស៊ី និងបង់ក្លាដេស ទទួលទិញពីកម្ពុជាច្រើនជាងគេ។
ក្នុងឆ្នាំ២០១៧កន្លងទៅ កម្ពុជាសម្រេចនាំអង្ករចេញបាន ៦៣,៥ ម៉ឺនតោន កើនឡើង ១៧,៣ភាគរយ បើធៀបនឹងទំហំនាំចេញ ៥៤ម៉ឺនតោន នៅឆ្នាំ២០១៦៕
