ធនាគារពិភពលោកបានសម្រេចបោះទុនវិនិយោគ ២០លានដុល្លារទៅក្នុងគ្រឹះស្ថានមីក្រូហិរញ្ញវត្ថុហត្ថាកសិករ ដោយថា ដើម្បីជួយដល់អាជីវកម្មធុនតូចនៅកម្ពុជា។ នេះបើតាមសេចក្ដីប្រកាសព័ត៌មានរបស់សាជីវកម្មហិរញ្ញវត្ថុអន្តរជាតិ IFC។
សេចក្តីប្រកាសព័ត៌មានកាលពីថ្ងៃទី១៧ ខែធ្នូ របស់IFC ដែលជាសមាជិកមួយរបស់ធនាគារពិភពលោក ដែល VOD ទទួលបាននៅថ្ងៃនេះ ឲ្យដឹងថា IFC បានសម្រេចបោះទុនវិនិយោគបែបនេះជាមួយហត្ថាកសិករ បន្ទាប់ពីគ្រឹះស្ថានមីក្រូហិរញ្ញវត្ថុធំលំដាប់ទី៣នៅកម្ពុជាមួយនេះ បានចុះបញ្ជីលក់ប័ណ្ណភាគហ៊ុននៅលើទីផ្សារមូលបត្រកម្ពុជាកាលពីថ្ងៃទី៥ ខែធ្នូកន្លងមកថ្មីៗនេះ។
នាយកគ្រប់គ្រង IFC ទទួលបន្ទុកប្រទេសកម្ពុជា ឡាវ និងវៀតណាម លោក KyleKelhofer បានថ្លែងក្នុងសេចក្ដីប្រកាសព័ត៌មាននោះថា IFC និងភាគីពាក់ព័ន្ធដទៃទៀត នឹងជួយគាំទ្រដល់ទីផ្សារមូលធនបំណុលនៅកម្ពុជា ដើម្បីជំរុញកំណើនសេដ្ឋកិច្ច បង្កើតការងារ និងវិបុលភាពរួម។
លោក Kyle Kelhofer ថ្លែងថា៖ «សាជីវកម្មហិរញ្ញវត្ថុអន្តរជាតិមានក្តីសោមនស្សដោយបានចូលរួមជាវិនិយោគិនគាំទ្រលើការបោះលក់នេះ ហើយសាជីវកម្មហិរញ្ញវត្ថុអន្តរជាតិនឹងបន្តធ្វើការជាមួយអ្នកពាក់ព័ន្ធសំខាន់ៗ និងអ្នកចូលរួមក្នុងទីផ្សារនានា ដើម្បីបង្កើតផ្សារមូលធនបំណុលនៅកម្ពុជា ដោយជួយកៀរគរមូលនិធិដើម្បីជម្រុញកំណើនសេដ្ឋកិច្ច ការបង្កើតការងារ និងវិបុលភាពរួម»។
ប្រធានអគ្គនាយកគ្រឹះស្ថានមីក្រូហិរញ្ញវត្ថុហត្ថាកសិករ លោក ហួត អៀងតុង ប្រាប់ VOD បន្ថែមនៅថ្ងៃនេះថា ហត្ថាកសិករនឹងជំរុញការប្រើប្រាស់ប្រាក់រៀល ដំណើរការយន្តការហិរញ្ញវត្ថុនៅកម្ពុជា និងពង្រីកអាជីវកម្ម។
លោក ហួត អៀងតុង មានប្រសាសន៍ថា៖ «ទីមួយ យើងចង់ជម្រុញការប្រើប្រាស់ប្រាក់រៀលទីពីរ យើងក៏ចង់ធ្វើយន្តការ ឬមួយឧបករណ៍ហិរញ្ញវត្ថុដែលបានបង្កើតឡើងនៅក្នុងប្រទេសកម្ពុជាយើងហ្នឹងឲ្យវាមានដំណើរការ ហើយគោលបំណងទីបី គឺយើងបានថវិកាវិនិយោគទាំងអស់ហ្នឹងមក យកមកពង្រីកអាជីវកម្មរបស់ហត្ថកសិករ ដោយសារតែយើងផ្តល់កម្ចីជាប្រាក់រៀលទៅអាជីវករ កសិករជាស្ត្រីជាបុរសនៅតាមជនបទទាំងអស់ ដែលហត្ថាកសិករយើងកំពុងធ្វើការផ្តល់សេវាកម្មហ្នឹង!»។
អនុប្រធានសមាគមមីក្រូហិរញ្ញវត្ថុកម្ពុជា (CMA) លោក ប៊ុន មុនី ថ្លែងប្រាប់ VOD នៅព្រឹកនេះដែរថា នេះជាសញ្ញាល្អសម្រាបវិស័យហិរញ្ញវត្ថុនៅកម្ពុជា ហើយបានគាំទ្រដល់សេដ្ឋកិច្ចខ្មែរ។
លោក ប៊ុន មុនី មានប្រសាសន៍ថា៖ «ខ្ញុំគិតថាជាសញ្ញាល្អមួយដែល IFC គេចាប់អារម្មណ៍ ហើយគាំទ្រលើទីផ្សារមូលប័ត្រកម្ពុជាហ្នឹង ហើយជាពិសេស ការបោះមូលប័ត្រជាប្រាក់រៀល ហើយគាត់គាំទ្រហ្នឹងមានន័យថា គាត់យល់ព្រមទិញមូលប័ត្រហ្នឹង! ហើយជួយគាំទ្រហ្នឹង ក៏ដូចជាជួយគាំទ្រវិស័យប្រាក់រៀលខ្មែរយើងដែរ ដើម្បីឲ្យហត្ថា[កសិករ]មានលុយប្រាក់រៀលយកទៅផ្តល់កម្ចីឲ្យអតិថិជនរបស់ខ្លួនហ្នឹងជាប្រាក់រៀលដែរ។ ហើយខ្ញុំគិតថា ជាសកម្មភាពសេដ្ឋកិច្ចមួយល្អដែល IFC គាំទ្រណា៎!»។
បើតាមសេចក្ដីប្រកាសព័ត៌មានដដែលខាងលើស្ថាប័នហិរញ្ញវត្ថុ IFC បានសម្រេចទិញសញ្ញាប័ណ្ណភាគហ៊ុន៨សែនសន្លឹកពីគ្រឹះស្ថានមីក្រូហិរញ្ញវត្ថុហត្ថាកសិករ ដែលមានតម្លៃប្រហែល២០លានដុល្លារ៕