សន្និបាតគណបក្សប្រជាជនកម្ពុជា បានសម្រេចជ្រើសតាំងមេទ័ព៤នាក់ ក្នុងនោះមានកូនលោកនាយករដ្ឋមន្រ្តីហ៊ុន សែនមួយរូបផងដែរឲ្យកាន់តួនាទីក្នុងគណៈអចិន្ត្រៃយ៍បក្សកាន់អំណាចមួយនេះ។
ក្នុងសេចក្ដីជូនដំណឹងពីលទ្ធផលនៃសន្ធិបាតគណៈកម្មាធិការកណ្ដាលលើកទី៤១ អាណត្តិទី៥របស់បក្សប្រជាជនកាលពីម្សិលមិញ គណបក្សនេះឲ្យដឹងថាខ្លួនបានសម្រេចជ្រើសតាំងមនុស្ស៧នាក់ដើម្បីបន្ថែមក្នុងសមាជិកគណៈអចិន្ត្រៃយ៍របស់គណៈកម្មាធិការកណ្ដាល។
ប្រភពដដែលឲ្យដឹងថា សមាជិកគណៈអចិន្ត្រៃយ៍របស់គណៈកម្មាធិការកណ្ដាល ទាំង៧នាក់នោះ មាន រដ្ឋមន្ត្រីក្រសួងដែនដីលោក ជា សុផារ៉ា រដ្ឋមន្ត្រីក្រសួងការបរទេសលោក ប្រាក់ សុខុន និងរដ្ឋមន្ត្រីក្រសួងសេដ្ឋកិច្ច លោក អូន ព័ន្ធមុនីរ័ត្ន អគ្គមេបញ្ជាការកងទ័ពលោក វង្ស ពិសេន អគ្គមេបញ្ជាការរង និងជាមេបញ្ជាការកងរាជអាវុធហត្ថលោក សៅ សុខា នាយសេនាធិការចម្រុះកងទ័ព លោក ឥត សារ៉ាត់ និងអគ្គមេបញ្ជាការរង និងជាមេបញ្ជាការកងទ័ពជើងគោក លោក ហ៊ុន ម៉ាណែត។
ការជ្រើសរើសបន្ថែមមនុស្ស៧នាក់ទៅក្នុងគណៈអចិន្ត្រៃយ៍បក្សនេះគឺដើម្បីជំនួសមន្ត្រីបក្ស៤នាក់ដែលទទួលមរណភាពដែលមានដូចជាលោក ជា ស៊ីម លោក សាយ ភូថង លោក សុខ អាន និង លោក នៃ ប៉េណា។
បច្ចុប្បន្នសមាជិកគណៈអចិន្ត្រៃយ៍បក្សប្រជាជនមានចំនួន៣៧នាក់ ខណៈសមាជិកគណៈកម្មាធិការកណ្ដាលចំនួន ៨៦៥នាក់៕