សាលារាជធានីភ្នំពេញ គ្រោងបិទកំណាត់ផ្លូវមួយខ្សែតភ្ជាប់ពីស្ពានព្រែកព្នៅទៅផ្លូវជាតិលេខ ៦អា ដើម្បីសម្ពោធវិមាន«ឈ្នះ-ឈ្នះ»រយៈពេល ៣ថ្ងៃនៅចុងខែនេះ។
ក្នុងសេចក្ដីជូនដំណឹងកាលពីថ្ងៃម្សិលមិញនេះ អភិបាលរាជធានីភ្នំពេញ លោក ឃួង ស្រេង បានប្រាប់ទៅពលរដ្ឋទាំងអស់ ឲ្យផ្អាកបើកបរ ឬធ្វើដំណើរលើកំណាត់វិថីឈ្នះឈ្នះ ចាប់ពីគល់ស្ពានព្រែកព្នៅ រហូតដល់ផ្លូវជាតិលេខ៦ ចាប់ពីថ្ងៃទី២៨ ខែធ្នូ ឆ្នាំ២០១៨ រហូតដល់ថ្ងៃទី០១ ខែមករា ឆ្នាំ២០១៩។
អាជ្ញាធររាជធានីភ្នំពេញ ក៏បានប្រាប់ឲ្យអ្នកដំណើរ ឬអ្នកបើកបរយានយន្តគ្រប់ប្រភេទ ធ្វើដំណើរ និងបើកបរលើផ្លូវវាងតាមស្ពានព្រែកក្ដាមវិញ។
បើតាមសេចក្ដីជូនដំណឹងដដែលនេះ អាជ្ញាធររាជធានីភ្នំពេញគ្រោងផ្អាកចរាចរណ៍លើកំណាត់ផ្លូវមួយខ្សែនោះ ដើម្បីរៀបចំសម្ពោធវិមាន «ឈ្នះ-ឈ្នះ» និងអបអរសាទរខួប ២០ឆ្នាំ នៃការបញ្ចប់សង្គ្រាមស៊ីវិលនៅកម្ពុជា៕
