យ៉ាងហោចណាស់មនុស្ស ៤នាក់ បានស្លាប់ ហើយ ១១នាក់ទៀតបានរងរបួស ក្រោយពីរថយន្តមួយគ្រឿងដែលដឹកក្រុមតន្ត្រីករខេត្តកំពង់ស្ពឺ បានក្រឡាប់ធ្លាក់ចូលជ្រលងភ្នំនៅឯស្រុកបុទុមសាគរ ខេត្តកោះកុង នៅថ្ងៃនេះ។ នេះបើតាមការផ្សាយរបស់នគរបាលជាតិ។
គេហទំព័រនគរបាលជាតិ បានចុះផ្សាយនៅថ្ងៃនេះថា រថយន្តកូរ៉េមួយគ្រឿង បានក្រឡាប់ដោយខ្លួនឯងអំឡុងពេលបើកបរចុះចំណោតនៅភូមិជីមាល ស្ថិតក្នុងឃុំអណ្ដូងទឹក ដោយបណ្ដាលឲ្យមនុស្ស ៤នាក់ស្លាប់ ហើយមនុស្ស ១១នាក់ទៀតរងរបួសធ្ងន់ស្រាល និងត្រូវបានបញ្ជូនទៅសង្គ្រោះនៅតាមមន្ទីរពេទ្យ។
បើតាមគេហទំព័រនគរបាលជាតិ រថយន្តមួយគ្រឿងនោះផ្ទុកទៅដោយក្រុមតន្ត្រីករ និងសិល្បករ ដែលធ្វើដំណើរពីស្រុកគងពិសី ខេត្តកំពង់ស្ពឺ ទៅប្រគុំតន្ត្រីក្នុងពិធីមង្គលការរបស់ពលរដ្ឋនៅឯឃុំត្រពាំងរូង ស្រុកកោះកុង។
រូបថតនៅលើគេហទំព័រនគរបាលជាតិ បានបង្ហាញនូវរថយន្តកូរ៉េមួយគ្រឿងក្រឡាប់ជើងឡើងលើ មន្ត្រីនគរបាល និងពលរដ្ឋលើកជនរងគ្រោះចេញពីកន្លែងកើតហេតុ។
នគរបាលខេត្តកោះកុង បានបញ្ជាក់នៅលើទំព័រហ្វេសប៊ុករបស់ខ្លួនថា គ្រោះថ្នាក់ចរាចរណ៍នេះបណ្ដាលមកពីអ្នកបើកបរមិនស្គាល់ភូមិសាស្ត្រ ហើយរថយន្តជាន់ហ្វ្រាំងមិនជាប់។
របាយការណ៍នគរបាលចរាចរណ៍ផ្លូវ បានឲ្យដឹងថា មនុស្ស ៣នាក់ផ្សេងទៀត បានស្លាប់ ហើយ ១៤នាក់ទៀត បានរងរបួស នៅក្នុងគ្រោះថ្នាក់ចរាចរណ៍ទូទាំងប្រទេស នៅចន្លោះម៉ោង ២រសៀលថ្ងៃម្សិលមិញដល់ម៉ោង ២រសៀលថ្ងៃនេះ។
របាយការណ៍នេះក៏ឲ្យដឹងទៀតថា មនុស្សដល់ទៅ ៩៧នាក់ហើយ ត្រូវបានសម្លាប់ ហើយ ២៩៣នាក់ទៀត បានរងរបួសធ្ងន់ស្រាលនៅក្នុងគ្រោះ ២១៦លើកនៅទូទាំងប្រទេសចាប់ពីថ្ងៃទី១ ដល់ថ្ងៃទី២៣ ខែធ្នូនេះ។
របាយការណ៍នគរបាលជាតិ បានឲ្យដឹងថា គ្រោះថ្នាក់ចរាចរណ៍ បានកើតឡើងរៀងរាល់ថ្ងៃ ដោយបានសម្លាប់មនុស្ស ១៧៨០នាក់ និងបណ្ដាលឲ្យរបួសជាង ៥៥០០នាក់ កាលពីឆ្នាំ២០១៧កន្លងមក៕