របាយការណ៍ក្រសួងដែនដី បានបង្ហាញថា ទំហំនៃការវិនិយោគ និងសំណើគម្រោងសាងសង់ទូទាំងប្រទេសនៅឆ្នាំនេះ បានធ្លាក់ចុះជិត ២០ភាគរយ បើធៀបទៅនឹងតួលេខកាលពីឆ្នាំមុន។
សេចក្ដីព្រាងរបាយការណ៍បូកសរុបលទ្ធផលការងារឆ្នាំ២០១៨ និងលើកទិសដៅការងារឆ្នាំ២០១៩ ដែលVOD ទទួលបានពីក្រសួងដែនដី បានឲ្យដឹងថា សំណើសាងសង់ទូទាំងប្រទេសដែលបានមកសុំការអនុញ្ញាតមានចំនួន ២ ៨៦៧គម្រោងដែលមានផ្ទៃក្រឡាចំនួន ១១ ៤២៧ ១៩០ ម៉ែត្រការ៉េ និងមានតម្លៃប្រមាណជាង ៥ពាន់លានដុល្លារអាមេរិក។
របាយការណ៍នេះ បង្ហាញថា ទំហំនៃការវិនិយោគ និងសំណើគម្រោងសាងសង់ បានធ្លាក់ចុះ ១៨.៦៦ភាគរយបើធៀបនឹងឆ្នាំ២០១៧ ដែលមានជាង ៣ពាន់គម្រោង និងមានទំហំទុនវិនិយោគប្រមាណ ៦ ៤០០លានដុល្លារអាមេរិក។
VOD មិនអាចទាក់ទងអ្នកនាំពាក្យក្រសួងដែនដីលោក សេង ឡូត ដើម្បីបញ្ជាក់ពីមូលហេតុដែលធ្វើឲ្យវិស័យសំណង់កម្ពុជាឆ្នាំ២០១៨ ថយចុះបាននៅឡើយទេនៅថ្ងៃនេះ។
ប្រធានក្រុមហ៊ុនអចលនទ្រព្យ Amatak និងជាអនុប្រធានសមាគមអ្នកវាយតម្លៃអចលនទ្រព្យនៅកម្ពុជា អ្នកស្រី តាំង ហួរ បានលើកឡើងថាការថយចុះនៃគម្រោងសាងសង់នេះ មិនធ្វើឲ្យប៉ះពាល់ដល់វិស័យសំណង់នៅកម្ពុជានោះទេ ដោយថា អ្នកទិញនៅតែមាន ហើយតម្លៃទីផ្សារនៅតែមានកំណើន ខណៈគម្រោងមុនៗមិនទាន់ចប់ ដែលជាហេតុធ្វើឲ្យអ្នកវិនិយោគមិនទាន់ស្នើសុំគម្រោងសាងសង់ថ្មី។
អ្នកស្រីថា៖ «វាធ្លាក់ចុះតែក្នុងការសុំច្បាប់សាងសង់ តែចំនួនអគារដែលបានសាងសង់ហើយ នៅតែឃើញឡើងលូតលាស់ ព្រោះថា អគារមួយដែលត្រូវសាងសង់ វាត្រូវការពេលយ៉ាងហោចណាស់ ២ ទៅ ៣ឆ្នាំ។ អញ្ចឹងហើយ អ្នកដែលសាងសង់ជំនាន់ ១ ទៅ ២ឆ្នាំមុន វានៅតែកំពុងសាងសង់នៅឡើយ។ អញ្ចឹងការសុំច្បាប់សាងសង់ វារាងថយបន្តិច តែទីផ្សារយើងនៅតែមានសម្បូរភ្ញៀវចិនណាប្អូន។ អញ្ចឹង ខ្ញុំគិតថា វានៅតែតម្រូវការទៅមុខទៀត វានៅតែមាន តែចំនួនតិច ឬច្រើនវាអត់ច្បាស់ទេប្អូន»។
អ្នកវិភាគសេដ្ឋកិច្ច លោក ង៉ែត ជូ យល់ថា ការថយចុះនៃគម្រោងសំណង់នៅកម្ពុជានេះ បណ្ដាលមកពីបញ្ហានយោបាយក្នុងស្រុកនាឆ្នាំនេះ និងការកើនឡើងខ្ពស់នៃវិស័យសំណង់ក្នុងឆ្នាំ២០១៧ ខណៈលោកបារម្ភពីមិនរីកលូតលាស់នាវិស័យនាឆ្នាំបន្ទាប់។
លោក ង៉ែត ជូ ប្រាប់ថា៖ «ជាធម្មតាវិស័យសំណង់ និងអចលនទ្រព្យនេះ លក្ខណៈធម្មជាតិរបស់វា អាចថា ៤ ទៅ ១០ឆ្នាំ វាមានវិបត្តិម្ដង ពី២០០៧ ដល់២០១៧ និង២០១៨អីអញ្ចឹងអាចថា ទៅមុខទៀត យើងហៅថា វិបត្តិ ក៏ប៉ុន្តែ សម្រាប់ខ្ញុំ ខ្ញុំគិតថា វាដូចជាការសម្រាកម្ដងអញ្ចឹងណា! មិនមានវិបត្តិអីធ្ងន់ធ្ងរទេ គ្រាន់តែថា ជាទូទៅសម្រាប់ Sector ទាំងមូល ខ្ញុំគិតថា សម្រាកមួយរយៈអីទៅ ហើយចាប់ពីហ្នឹង ២ ទៅ ៣ឆ្នាំទៅមុខទៀត ខ្ញុំគិតថា វានឹងបន្តកំណើនទៅមុខទៅ ព្រោះ អាហ្នឹងវាជា cycle [វដ្ដ]ហ្នឹងជាធម្មតា» ។
បើតាមលោក ង៉ែត ជូ ដើម្បីដោះស្រាយបញ្ហានេះ រដ្ឋាភិបាលគួរតែជំរុញទៅវិស័យសំណង់សម្រាប់អ្នកមានចំណូលទាបឲ្យបានច្រើនវិញក្នុងអំឡុងពេលដែលវិស័យសំណង់នេះដល់វដ្ដធ្លាក់ចុះនោះ។
បើតាមក្រសួងដែនដីចាប់ពីឆ្នាំ២០០០ រហូតមកដល់ខែវិច្ឆិកាឆ្នាំ២០១៨ ក្រសួងបានចេញលិខិតអនុញ្ញាតសាងសង់បានចំនួន ៤៣ ១៣៦គម្រោង ដែលមានផ្ទៃក្រឡាសំណង់សរុបចំនួន ១១៤ ២៩៧ ៦២១ម៉ែត្រការ៉េ ឬស្មើនឹងទុនវិនិយោគប្រហែល ៤ម៉ឺន ៣ពាន់លានដុល្លារ៕