ក្រុមជនជាតិដើមភាគតិចជងជិត ២០នាក់ មកពីតំបន់អារ៉ែង ស្ថិតក្នុងស្រុកថ្មបាំង បានស្នើទៅអាជ្ញាធរខេត្តកោះកុង ឲ្យពន្លឿនការងារចុះបញ្ជីសហគមន៍របស់ពួកគេឲ្យបានលឿន ប៉ុន្តែ មន្ត្រីរដ្ឋបាលខេត្តនេះ បានប្រាប់ថា នឹងបញ្ជូនសំណើទៅឲ្យអភិបាលខេត្តពិនិត្យសិន។
ប្រធានស្តីទីសហគមន៍ជនជាតិដើមភាគតិចជងនៅឃុំជំនាប់ លោក ហ៊ឹង ពៅ បានប្រាប់វីអូឌីតាមទូរស័ព្ទថា សហគមន៍របស់លោកបានស្នើចុះបញ្ជីស្វ័យអត្តសញ្ញាណជនជាតិដើមភាគតិចជងជាផ្លូវការតាំងពីឆ្នាំ២០១៦មកម៉្លេះ ប៉ុន្តែ សំណើនេះបានជាប់គាំងជាច្រើនឆ្នាំមកហើយ ដែលធ្វើឲ្យពួកគាត់ព្រួយបារម្ភអំពីការបាត់បង់សិទ្ធិលើការថែរក្សាប្រពៃណីទំនៀមទម្លាប់ និងព្រៃឈើសហគមន៍។
លោក ហ៊ឹង ពៅ មានប្រសាសន៍ថា៖ «បាទ! អ្វីជាការបារម្ភរបស់ពួកខ្ញុំ ប្រសិនបើអត់បានទទួលស្គាល់ជាផ្លូវការជាជនជាតិដើមភាគតិចទេ ខ្ញុំបារម្ភនៅថ្ងៃខាងមុខទៀត ប្រសិនបើមានគម្រោងផ្សេងៗ ពួកយើងអាចប្រឈមគ្រោះថ្នាក់ បាត់បង់ដីធ្លី លំនៅឋាន អត្តសញ្ញាណជនជាតិភាគតិចរបស់យើង ហើយនិងផ្នូរដូនតារបស់យើងតាំងពីមុនមក អាចបាត់បង់ទាំងស្រុងតែម្តង ប្រសិនបើមានគម្រោងអភិវឌ្ឍន៍ផ្សេងៗចូលទៅតំបន់ហ្នុង»។
អនុប្រធានការិយាល័យទទួលឯកសារនៃរដ្ឋបាលខេត្តកុះកុង លោក ឆេង សុខឃើយ បញ្ជាក់ថា ខាងលោកបានទទួលបានលិខិតរបស់សហគមន៍ ហើយលោកថា នឹងបញ្ជូនសំណើនោះទៅអភិបាលខេត្ត និងមន្ត្រីជំនាញដើម្បីពិនិត្យមើលសំណើរនោះ។
លោក សុខឃើយ បន្ថែមថា៖ «បាទ ខ្ញុំនឹងបញ្ជូនទៅការិយាល័យជំនាញ ដើម្បីឱ្យគាត់សិក្សាមើល ដើម្បីឱ្យគាត់ជួយសម្រួលដល់ពួកគាត់ ហើយនឹងត្រួតពិនិត្យមើលតាមលក្ខន្តិកៈ ដើម្បីជួយសម្រួលថា តើយើងត្រូវធ្វើយ៉ាងម៉េចខ្លះ ដើម្បីបានជាលទ្ធផល បានជាអីមក។ ដូចជាកាលមុន យើងមានជនជាតិដើមភាគតិចនៅហ្នុងដែរ»។
សកម្មជនបរិស្ថានដែលធ្វើការជាមួយសហគមន៍នៅតំបន់អារ៉ែង កញ្ញា ផេង ស្រីស បានលើកឡើងថា ប្រសិនបើសហគមន៍ជនជាតិដើមភាគតិចជងនៅតំបន់អារ៉ែង ត្រូវបានចុះបញ្ជីទទួលស្គាល់ជាផ្លូវការ ហើយឈានទៅចុះបញ្ជីដីសហគមន៍របស់ពួកគាត់ផង គឺមានប្រយោជន៍ច្រើនដល់ពលរដ្ឋម្ចាស់ស្រុក ព្រមទាំងអាចការពារធនធានធម្មជាតិនៅតំបន់នោះ ឲ្យរួចផុតពីការបំផ្លិចបំផ្លាញ និងគម្រោងអភិវឌ្ឍន៍នានា ដែលប៉ះពាល់ដល់បរិស្ថាន។
កញ្ញា ស្រីស យល់ថា៖ «មើលទៅ វាមិនគួរដល់ថ្នាក់វាត្រូវចំណាយពេលជាង ២ឆ្នាំកន្លងមកហើយ។ អីចឹង សហគមន៍ក៏បានព្យាយាមស្នើសុំស្វ័យអត្តសញ្ញាណហ្នឹង។ ហេតុអីបានជាវាជាប់គាំងមិនអាចបន្តនីតិវិធីបាន? អីចឹងសម្រាប់ខ្ញុំ ខ្ញុំស្នើសុំទៅភាគីពាក់ព័ន្ធ មានក្រសួង មានខេត្ត មានមន្ទីរ ឃុំ ស្រុក ដើម្បីឱ្យគាត់ធ្វើម៉េចមានដំណោះស្រាយមួយសម្រាប់សហគមមន៍»។
បច្ចុប្បន្ន ភូមិចំនួនពីរ ត្រូវបានអាជ្ញាធរចុះបញ្ជីស្វ័យអត្តសញ្ញាណទទួលស្គាល់ជាសហគមន៍ផ្លូវការហើយ ប៉ុន្តែ ភូមិចំនួន ៥ទៀត ស្ថិតក្នុងឃុំប្រឡាយ និងឃុំជំនាប់ ដែលមានពលរដ្ឋប្រមាណ ៣០០គ្រួសារ មិនទាន់ត្រូវបានអាជ្ញាធរចុះបញ្ជីទទួលស្គាល់ពួកគាត់ជាជនជាតិដើមភាគតិចនៅឡើយទេ៕