អង្គការជាតិនិងអន្តរជាតិជិត១០០ សូមឲ្យបញ្ឈប់ការដាក់ទោសទណ្ឌមកលើសហជីព៦រូប ដោយថ្កោលទោសដាច់អហំការចំពោះសេចក្តីសម្រេចរបស់តុលាការ កាលពីថ្ងៃទី១១ ខែធ្នូ ឆ្នាំ២០១៨។
សេចក្តីប្រកាសព័ត៌មានរួមដែលបានបង្ហោះលើទំព័រហ្វេសប៊ុករបស់អង្គការសង់ត្រាល់កាលពីម្សិលមិញ អង្គការជាតិនិងអន្តរជាតិចំនួន៩៥អង្គការ លើកឡើងថា ថ្នាក់ដឹកនាំសហជីពទាំង៦នាក់នោះមិនបានប្រព្រឹត្តបទល្មើសឡើយ ដោយថា នាពេលសវនការមិនមានសក្ខីកម្មណាមួយដែលបង្ហាញឲ្យឃើញជាក់ស្តែង។
សេចក្តីប្រកាសព័ត៌មានដដែលបន្តថា ថ្នាក់ដឹកនាំសហជីពទាំង៦នាក់នោះត្រូវបានចោទប្រកាន់ថាបានប្រព្រឹត្តនូវអំពើហិង្សាដោយផ្ទាល់ តែផ្ទុយទៅវិញតុលាការបែរជាផ្តន្ទាទោសថា អ្នកទាំងនោះជាអ្នកផ្តើមគំនិតនូវអំពើហិង្សាទៅវិញ។ សេចក្តីប្រកាសរួមនេះសង្កត់ធ្ងន់ថា ការដូរបទចោទនេះមិនបានផ្តល់ឱកាសដល់ភាគីជនជាប់ចោទក្នុងការតតាំងឡើយ។
កាលពីថ្ងៃទី១១ ខែធ្នូ ឆ្នាំ២០១៨មុននេះ សាលាដំបូងរាជធានីភ្នំពេញ បានផ្តន្ទាទោសមេដឹកនាំសហជីព៦នាក់ មានលោក អាត់ ធន់ លោក ជា មុនី លោក ប៉ាវ ស៊ីណា លោក រ៉ុង ឈុន អ្នកស្រី ម៉ម ញឹម និងអ្នកស្រី យ៉ាង សោភ័ណ្ឌ ឲ្យជាប់ទោសចន្លោះពី២ឆ្នាំកន្លះ ទៅ៤ឆ្នាំកន្លះ ទាក់ទិនទៅនឹងសំណុំរឿងផ្លូវវេងស្រេង។ ប៉ុន្តែទោសទាំងនោះត្រូវបានព្យួរ។
ពាក់ព័ន្ធនឹងសំណុំរឿងនេះ លោកនាយករដ្ឋមន្ត្រី ហ៊ុន សែន ក្នុងពិធីជួបសំណេះសំណាលជាមួយកម្មករនៅខេត្តកំពង់ស្ពឺកាលពីថ្ងៃទី១២ ខែធ្នូកន្លងទៅនេះ បានចេញមុខអះអាងថា មេដឹកនាំសហជីព៣រូប មានលោក អាត់ ធន់ លោក ជា មុន្នី និងលោក ប៉ាវ ស៊ីណា មិនបានដឹកនាំតវ៉ានៅផ្លូវវេងស្រេង ដូចសាលក្រមចោទប្រកាន់ របស់សាលាដំបូងរាជធានីភ្នំពេញនោះទេ។
សូមរំលឹកដែរថា កាលពីថ្ងៃទី៣ ខែមករា ឆ្នាំ២០១៤ មានព្រឹត្តិការណ៍ប៉ះទង្គិចបង្ហូរឈាមមួយនៅលើផ្លូវវេងស្រេង ក្នុងរាជធានីភ្នំពេញ រវាងក្រុមកម្មករនិងសមត្ថកិច្ច។ ព្រឹត្តិការណ៍នោះ កម្មករដែលទាមទារតម្លើងប្រាក់ឈ្នួល យ៉ាងតិច៤នាក់ ត្រូវកងកម្លាំងប្រដាប់អាវុធ បាញ់ឲ្យស្លាប់នៅនឹងកន្លែង ម្នាក់បាត់ខ្លួន មួយចំនួនទៀតរងរបួស និងខ្លះទៀតត្រូវបានចាប់ខ្លួន៕
