មេធាវីការពារក្ដីឲ្យលោក រ៉ាត់ រត្នមុនី បានដាក់ពាក្យសុំឲ្យកូនក្តីលោកនៅក្រៅឃុំ បន្ទាប់ពីពិនិត្យសំណុំរឿងរួចរាល់។
កាលពីថ្ងៃទី១៣ ខែធ្នូ លោក រ៉ាត់ រត្នមុនី ត្រូវបានតុលាការកម្ពុជាចោទប្រកាន់នឹងបញ្ជូនទៅឃុំខ្លួននៅពន្ធនាគារព្រៃស បន្ទាប់ពីរកឃើញថា គាត់បានចូលរួមជួយផលិតខ្សែភាពយន្តឯកសាររបស់ស្ថានីយទូរទស្សន៍រុស្ស៊ី RT រឿង «ម្ដាយខ្ញុំលក់ខ្ញុំ» ដែលរដ្ឋាភិបាលចាត់ទុកថាជាការធ្វើឲ្យប៉ះពាល់ដល់កេរ្តិ៍ឈ្មោះរបស់កម្ពុជា។
មេធាវីរបស់លោក រ័ត្នមុនី គឺលោកមេធាវី សំ ទិត្យសីហា បានប្រាប់VOD ថាកាលពីម្សិលមិញលោកបានដាក់ពាក្យសុំឲ្យលោក រ័ត្នមុន្នី នៅក្រៅឃុំទៅកាន់សាលាដំបូងរាជធានីភ្នំពេញរួចហើយ បន្ទាប់ពីលោកបានទទួល និងពិនិត្យសំណុំរឿងនេះរួចរាល់។
លោកថា៖ «ការឃុំខ្លួនបណ្ដោះអាសន្ន ខ្ញុំគិតថាវាមិនមែនជាជម្រើសល្អបំផុតក្នុងការដំណើរការរឿងព្រហ្មទណ្ឌទេ! ខ្ញុំគិតថាយើងគួរសិក្សាហើយគួរតែអង្កេតទៅ គ្រាន់តែដាក់គាត់ឲ្យនៅក្រៅឃុំ ឲ្យស្ថិតក្រោមការត្រួតពិនិត្យតាមផ្លូវតុលាការ ហើយតុលាការបន្តនីតិវិធីហ្នឹងទៅ។ ព្រោះខ្ញុំយល់ថា កូនក្ដីខ្ញុំគាត់គ្មានលទ្ធភាពអីឬក៏អំណាចអីទៅធ្វើការរារាំង ឬបំផ្លាញភស្តុតាង ឬក៏រត់គេចវេះទៅណាបានទេ» ។
លោក រ៉ាត់ រត្នមុនី ត្រូវបានតុលាការក្រុងភ្នំពេញសម្រេចចោទប្រកាន់ថា ញុះញង់ឲ្យមានការរើសអើង តាមមាត្រា៤៩៦ នៃក្រមព្រហ្មទណ្ឌ និងបញ្ជូនទៅឃុំខ្លួននៅពន្ធនាគារព្រៃស បន្ទាប់ពីគាត់ត្រូវបានប្រទេសថៃចាប់បញ្ជូនត្រលប់មកកម្ពុជាវិញ។
ប្រសិនបើលោកត្រូវបានរកឃើញថាមានកំហុសមែននោះ លោក រ័ត្នមុនី អាចនឹងត្រូវជាប់ទោសក្នុងពន្ធនាគារពី ១ ទៅ ៣ឆ្នាំ៕