រដ្ឋាភិបាលគ្រោងចំណាយថវិកាថ្នាក់ក្រោមជាតិនាឆ្នាំ២០១៩ ដល់ជិត៦០០លានដុល្លារ កើនលើសឆ្នាំ២០១៨ ជាង១០០លានដុល្លារ ដោយថា ដើម្បីជំរុញការអភិវឌ្ឍនៅថ្នាក់ក្រោមជាតិ។
ក្នុងសុន្ទរកថាថ្លែងបើកសិក្ខាសាលាថ្នាក់ជាតិ ស្ដីពីការរៀបចំផែនការសកម្មភាព និងថវិកាឆ្នាំ២០១៩ របស់ គ.ជ.អ.ប នាក្រសួងមហាផ្ទៃនៅព្រឹកនេះ រដ្ឋមន្ត្រីក្រសួងសេដ្ឋកិច្ចលោក អូន ព័ន្ធមុន្នីរ័ត្ន បានលើកឡើងថា ក្នុងឆ្នាំ២០១៩ខាងមុខ ថវិកាថ្នាក់ក្រោមជាតិនឹងត្រូវបង្កើនដល់ ៥៩៥លានដុល្លារអាមេរិក ដែលក្នុងនោះជាង៥៥១លានដុល្លារជាថវិកាជាតិ ហើយជាង៤៤លានដុល្លារទៀតជាថវិកាជំនួយពីដៃគូអភិវឌ្ឍន៍។
លោកបន្ថែមថា ថវិកាជិត៦០០លានដុល្លារនេះ នៅមិនទាន់រាប់បញ្ជូលថវិកាដែលក្រសួងមួយចំនួនត្រូវផ្ទេរមុខងារទៅរដ្ឋបាលថ្នាក់ក្រោមជាតិនៅឡើយទេ។
បើតាមលោក អូន ព័ន្ធមុន្នីរ័ត្ន ចំនួននេះបើធៀបទៅនឹងឆ្នាំ២០១៨ មានការកើនឡើងជាង១២៧លានដុល្លារអាមេរិក។
របាយការណ៍សង្ខេបថវិកាជាតិឆ្នាំ២០១៨ បានបង្ហាញថា រដ្ឋបាលថ្នាក់ក្រោមជាតិបានចំណាយជាង៤២១លានដុល្លារអាមេរិក ក្នុងនោះមូលនិធិឃុំសង្កាត់មានជាង១០០លានដុល្លារ៕