តារាចម្រៀង ទេព បូព្រឹក្ស បានប្តឹងម្ចាស់ភោជនីយដ្ឋានមួយក្នុងទីក្រុងភ្នំពេញ ទាមទារប្រាក់១០ម៉ឺនដុល្លារ បន្ទាប់ពីមានបុរសម្នាក់ជះស្រាបៀរ និងគប់កំប៉ុងស្រាបៀរមកលើរូបនាង ខណៈដែលកំពុងច្រៀងកាលពីយប់មិញ។
តារាចម្រៀងប្រចាំផលិតកម្មហង្សមាស កញ្ញាទេព បូព្រឹក្ស នៅព្រឹកមិញនេះបានដាក់ពាក្យបណ្តឹងម្ចាស់ហាងយីហោ«សមុទ្រ» នៅម្ដុំពេទ្យកុមារជាតិ ក្នុងខណ្ឌទួលគោក និងអ្នកពាក់ព័ន្ធ ក្រោយពីមានបុរសម្នាក់ប្រើហិង្សាជះស្រាបៀរ និងគប់កំប៉ុងស្រាបៀរលើរូបនាង ក្នុងពេលកំពុងច្រៀង ដោយទាមទារទឹកប្រាក់ចំនួន១០ម៉ឺនដុល្លារ។
កញ្ញា ទេព បូព្រឹក្ស បានថ្លែងនៅចំពោះមុខអ្នកកាសែតថា កញ្ញាមិនបញ្ចប់ត្រឹមការសុំទោសដូចការទាមទារកញ្ញាដែលបានប្រកាសនៅក្នុងវីដេអូឡាយលើបណ្តាញសង្គម កាលពីយប់ថ្ងៃទី២៥ ខែធ្នូនោះទេ។ ក្នុងវីដេអូឡាយ កញ្ញាគ្រាន់តែទទូចឲ្យអ្នកជះស្រាបៀរ និងអ្នកគប់កំប៉ុងស្រាបៀរ ដែលមានទឹកក្នុងកំប៉ុងនោះមកសុំទោសនាង ស្រាប់តែស្រ្តីជាម្ចាស់ហាងបានឡើងមកស្ដីឲ្យនាង និងប្រើពាក្យមិនសមរម្យចំពោះនាងដូចគ្មានការទទួលខុសត្រូវ ដោយនាងបានចោទថា ស្រ្តីនោះបានទាំងច្រានអ្នករាំរបស់នាង និងចង់ទះកំផ្លៀងអ្នករាំរបស់នាងទៀត នៅពេលអ្នករាំនោះព្យាយាមជួយការពារនាង។ នាងថាខ្លួននឹងតស៊ូឲ្យដល់ទីបំផុត ដោយនាងមិនជឿថាប្រទេសគ្មានច្បាប់ហើយគ្មានដំណោះស្រាយចំពោះរូបនាងដែលជាជនរងគ្រោះនោះទេ។
កញ្ញា ទេព បូព្រឹក្ស បានដាក់ពាក្យបណ្តឹងម្ចាស់ហាង និងអ្នកពាក់ព័ន្ធ នៅព្រឹកថ្ងៃទី២៦ ធ្នូនេះ ដោយទារសំណងប្រមាណ១០ម៉ឺនដុល្លារ។ កញ្ញាបានប្រកាសយកថវិកាសំណងនោះទៅជួយកុមារកំព្រា និងចាស់ជរាទាំងអស់ ដោយនាងមិនមែនចង់បានលុយនោះ ដើម្បីជាប្រយោជន៍ផ្ទាល់ខ្លួនទេ តែនាងនឹងធ្វើអោយដល់ទីបំផុត។
អ្នកនាង ចន ច័ន្ទលក្ខិណា ប្រធានសមាគមសិល្បករខ្មែរបញ្ជាក់ថា ប្រសិនបើចំណាត់ការដាក់បណ្ដឹងរបស់កញ្ញា ទេព បូព្រឹក្ស មិនទទួលបានចំណាត់ការដោះស្រាយសមស្រប នោះអ្នកនាងនឹងផ្ដល់មេធាវី ឲ្យជួយពន្លឿនផ្លូវច្បាប់លើករណីបនេះ រហូតដល់ម្ចាស់ហាង និងភាគីពាក់ព័ន្ធដោះស្រាយឲ្យកញ្ញា ទេព បូព្រឹក្ស។
ចំពោះករណីរបស់ទេព បូព្រឹក្ស នេះ លោក ថៃ នរៈសត្យា រដ្ឋាលេខាធិការក្រសួងវប្បធម៌ និងវិចិត្រសិល្បៈ បានមានប្រសាសន៍ថា ជារឿងតូចតាចប៉ុណ្ណោះ ប៉ុន្តែបណ្ដាលមកពីមានការបំប៉ោងបញ្ហាទើបធ្វើឲ្យក្លាយជារឿងធំដុំ ដែលលោកទទូចឲ្យគ្រប់ភាគីទាំងអស់គួរតែរួមគ្នាធ្វើឲ្យទៅជាស្ងប់ស្ងាត់។
ការលើកឡើងរបស់ លោក ថៃ នរៈសត្យា បានធ្វើអោយអ្នកគាំទ្ររបស់ ទេព បូព្រឹក្ស ប្រតិកម្ម ដោយអះអាងថា នោះមិនមែនជារឿងតូចតាចទេ ដោយសារតែការប្រមាថចំពោះសិល្បការិនីមួយរូបម្នាក់ក្នុងពេលច្រៀងលើឆាក ដែលមិនខុសពីការបន្ទាបបន្ថោកតម្លៃសិល្បៈយ៉ាងធ្ងន់ធ្ងរ។
អនុរដ្ឋលេខាធិកាក្រសួងកិច្ចការនារី លោកស្រី ញ៉ែម មរកត បានបង្ហាញប្រតិកម្មថានេះជាករណីធ្ងន់ធ្ងរ ដែលជនបង្កហេតុ និងអ្នកពាក់ព័ន្ធត្រូវតែយកមកផ្ទន្ទាទោស។ លោកស្រី ថា សកម្មភាពដែលបានកើតឡើងបានធ្វើឲ្យប៉ះពាល់ដល់តម្លៃ និងកិត្តិយសរបស់ស្រ្តីខ្មែរទាំងមូល ហើយលោកស្រីស្នើឲ្យបិទហាងនោះ រហូតទាល់តែមានយុត្តិធម៌ចំពោះតារាចម្រៀង ទេព បូព្រឹក្ស។ លោកស្រីថ្លែងថា បិទហាងនោះ ហើយចាប់ជនដៃដល់ និងជនផ្សំគំនិត ទាមទារជំងឺចិត្ត កុំយោគយល់ ហើយក៏អាចប្ដឹងមកក្រសួងកិច្ចការនារី ក្រសួងមានគណកម្មការលើកកម្ពស់សីលធម៌សង្គម និងតម្លៃស្រ្តីខ្មែរ ដើម្បីដោះស្រាយ។
ដោយឡែកភាគីខាងសមត្ថកិច្ចមិនទាន់បញ្ជាក់ឲ្យដឹងពីភស្ដុតាងដែលប្រមូលបានពីម្ចាស់ហាងនៅឡើយទេ ខណៈដែលវីដេអូសុវត្ថិភាពត្រូវបានគេព្រលយថាមិនមានថតកាលពីយប់ថ្ងៃកើតហេតុ៕