សមាគមសម្ព័ន្ធនិស្សិតបញ្ញវន្តខ្មែរ អះអាងថា វៀតណាមធ្វើផ្លូវក្រវ៉ាត់យកដីខ្មែររាប់រយហិកតាចាប់ពីបង្គោលព្រំដែន១៩៤ដល់១៩៩ ស្ថិតនៅតំបន់ព្រំដែនច្រមុះជ្រូក (ជំពុះទារ) ស្រុកចន្ទទ្រា ខេត្តស្វាយរៀង។
ក្នុងរបាយការណ៍បឋមរបស់ក្រុមសមាគមសម្ព័ន្ធនិស្សិតបញ្ញវន្តខ្មែរ បានឲ្យ វីអូឌី ដឹងនៅថ្ងៃនេះថា បេសសកម្ម១០០រាត្រីនៃមហាគ្រួសារខ្មែរ គឺក្នុងរាត្រី៣៩ បានចុះស្រាវជ្រាវឃើញថា កាលពីឆ្នាំ២០០៩ កម្ពុជាបោះបង្គោលព្រំដែន១៩៤ ដល់១៩៩ ជាមួយវៀតណាម ស្ថិតនៅតំបន់ព្រំដែនច្រមុះជ្រូក ឬចំពុះទា ក្នុងភូមិគោកតែក ឃុំចន្ទទ្រា ស្រុកចន្ទ្រា ខេត្តស្វាយរៀង ជាប់ខេត្តឡុងអាន ស្រុកមុខវ៉ា ឃុំមុខវ៉ា ប្រទេសវៀតណាមដែលជាទឹកដីខ្មែរកម្ពុជាក្រោម ធ្វើឲ្យកម្ពុជាបាត់បង់ទឹកដីរាប់រយហិកតាទៅឲ្យវៀតណាម។
របាយការណ៍ដដែលបញ្ជាក់ថា វៀតណាមប្រើយុទ្ធសាស្ត្របញ្ជូនគិញ ឬចារកម្មស៊ើបអង្កេតក្នុងភូមិ ឃុំ និងស្រុកតាមបណ្តោយព្រំដែន រួចធ្វើការអភិវឌ្ឍនៅតំបន់ព្រំដែន ដូចជាធ្វើផ្លូវថ្នល់ បង្កើតសាលារៀន មន្ទីរពេទ្យ កន្លែងកម្សាន្ត ព័ត៌មាន និងបញ្ជូនពលរដ្ឋវៀតណាមឲ្យទៅរស់នៅតំបន់ដែលត្រូវឈ្លានពានយកទឹកដីកម្ពុជាជាដើម។
ប្រធានសមាគមសម្ព័ន្ធនិស្សិតបញ្ញវន្តខ្មែរ លោក មួង សូនី មានប្រសាសន៍បន្ថែមលើរបាយការណ៍បឋមនោះថា ក្រុម១០០រាត្រីបានចុះទៅសម្ភាសន៍ប្រជាពលរដ្ឋមួយចំនួននៅស្រុកចន្ទទ្រា ខេត្តស្វាយរៀង កាលពីពេលថ្មីៗនេះថា មុនពេលវៀតណាមធ្វើផ្លូវចូលទឹកដីខ្មែរ អាជ្ញាធរនិងមន្ត្រីព្រំដែនកម្ពុជាបានចុះទៅជួបអាជ្ញាធរវៀតណាមដែរ ប៉ុន្តែលោកថា ក្រោយមកស្ងប់ស្ងាត់ទៅវិញ ហើយវៀតណាមនៅតែបន្តធ្វើផ្លូវចូលទឹកដីខ្មែររាប់រយហិចតាដដែល។
លោក សូនី ផ្តល់ជាអនុសាសន៍ថា រដ្ឋាភិបាលត្រូវពិនិត្យឡើងវិញជុំវិញបញ្ហាព្រំដែនកម្ពុជា-វៀតណាម និងបង្កើតក្រុមការងារចម្រុះទាំងស្ថាប័នរដ្ឋនិងអន្តរជាតិ ធ្វើការស្រាវជ្រាវដោយឯករាជ្យ មានវិជ្ជាជីវៈ ទើបទប់ស្កាត់វៀតណាម មិនឲ្យរំលោភទឹកដីខ្មែរបន្តទៀត។
លោកផ្តល់ជាអនុសាសន៍ថា៖ «រដ្ឋាភិបាលត្រូវធ្វើការសិក្សាស្រាវជ្រាវ កំណត់ពីយុទ្ធសាស្ត្រវៀតក្នុងការទន្ទ្រានយកទឹកដីខ្មែរ ហើយធ្វើជាព័ត៌មានបង្ហាញទៅពលរដ្ឋទូទៅ ទីពីររដ្ឋាភិបាលត្រូវឲ្យអ្នកជំនាញឯកទេសមានវិជ្ជាជីវៈ ដូចជា ក្រសួងផែនការ ឬអង្គការល្បីៗ[ឯករាជ្យ]ឲ្យគេទៅសិក្សាស្រាវជ្រាវពីព្រំដែនទៅ ហើយយើងប្តឹងទៅតុលាការទីក្រុងឡាអេ ប្រសិនបើយើងបាត់បង់ទឹកដីដូចអ្វីដែលពលរដ្ឋនៅតំបន់នោះអះអាងមែន ឬដូចក្រុមសិក្សាស្រាវជ្រាវរបស់យើងមែន»។
ប្រធានគណៈកម្មាធិការព្រំដែនកម្ពុជា លោក វ៉ា គឹមហុង មានប្រសាសន៍ថា របាយការណ៍របស់សមាគមសម្ព័ន្ធនិស្សិតបញ្ញវន្តខ្មែរ ឬហៅថា ក្រុម១០០រាត្រី ដែលថាវៀតណាមធ្វើផ្លូវចូលទឹកដីខ្មែរនោះ ជារបាយការណ៍ភូតកុហកមហាជន។
លោកមានប្រសាសន៍ថា៖ «អ្វីដែលក្រុម១០០រាត្រី គាត់ចេះតែចោទ ដោយសំអាងលើសម្ពាធលើអ្នកនេះ អ្នកនោះមក យើងអត់យកជាការបានទេ ការដែលយើងបោះបង្គោលព្រំដែនតាំងពីរដើមមក ដូចសម្តេចតេជោធ្លាប់មានប្រសាសន៍ច្រើនដងមកហើយ យើងបោះបង្គោលព្រំដែនមិនឲ្យបាត់បង់ទឹកដីយើងទេ បើយើងធ្វើចឹងដដែល យើងធ្វើធើអី យើងប្រាប់ច្រើនដងហើយ ប៉ុន្តែពួក១០០រាត្រីមិនដែលយកចិត្តទុកដាក់ទេ»។
សារព័ត៌មានវៀតណាមចុះផ្សាយ កាលពីដើមខែធ្នូនេះថា មេដឹកនាំជាន់ខ្ពស់គណបក្សកុម្មុយនីស្តវៀតណាម បានជំរុញឲ្យភាគីកម្ពុជានិងវៀតណាម រួមគ្នាបញ្ចប់ឯកសារការងារកំណត់ខ្សែបន្ទាត់ និងបោះបង្គោលព្រំដែនរវាងប្រទេសទាំងពីរនៅឆ្នាំ២០១៩ បន្ទាប់ពីសម្រេចបាន៨៤ភាគរយហើយនោះ។
កម្ពុជា និងវៀតណាម មានព្រំដែនគោករួមគ្នាប្រវែង ១២៧០គីឡូម៉ែត្រ ដោយភាគីទាំងពីរបានព្រមព្រៀងគ្នាបោះបង្គោលសរុបចំនួន ៣១៤ ដើម្បីកំណត់ខ្សែបន្ទាត់ព្រំដែនរវាងគ្នានិងគ្នា។
ប៉ុន្ដែ ប្រធានគណៈកម្មាធិការព្រំដែនកម្ពុជា លោក វ៉ា គឹមហុង បានឲ្យ VOD ដឹងកាលពីចុងខែវិច្ឆិកាកន្លងមកនេះថា ការបោះបង្គោលព្រំដែនជាមួយវៀតណាម មិនអាចបញ្ចប់នៅឆ្នាំ២០១៨ ដូចការគ្រោងទុកនោះទេ ដោយថា ការបោះបង្គោលព្រំដែនដែលនៅសេសសល់ចំនួន ១៦ភាគរយទៀត ចាំបាច់ត្រូវការភាគីបារំាងធ្វើជាអាជ្ញាកណ្តាល និងរង់ចាំផែនទីចម្លងរបស់ភាគីបារាំង ទើបអាចបោះបន្តបាន៕