ក្រុមកម្មករក្រុមហ៊ុនស៊ីនទ្រី បានធ្វើកូដកម្មនៅព្រឹកថ្ងៃនេះនៅឯទីតាំងមួយកន្លែងរបស់ក្រុមហ៊ុនស្ថិតនៅក្នុងខណ្ឌដង្កោ ដើម្បីទាមទារការដំឡើងប្រាក់ឈ្នួលបន្ថែម និងលក្ខខណ្ឌការងារមួយចំនួនទៀត។
តំណាងកម្មករបោសសម្អាត លោក កៅ សុខវ៉ាត បានប្រាប់ វីអូឌី នៅឯកន្លែងប្រមូលផ្ដុំនៅព្រឹកថ្ងៃនេះថា ក្រុមកម្មករស៊ីនទ្រីបានចាប់ផ្ដើមធ្វើកូដកម្មតាំងពីល្ងាចថ្ងៃម្សិលមិញ ហើយកូដកម្មនេះបានបន្តរហូតដល់ព្រឹកថ្ងៃទី២៧ ខែធ្នូនេះ។
លោក កៅ សុខវ៉ាត ប្រធានសហជីពកម្មករនិយោជិតវិស័យទេសចរណ៍នៃក្រុមហ៊ុន ស៊ីនទ្រី ខេមបូឌា បានឲ្យដឹងទៀតថា ក្រុមកម្មករបានទាមទារឲ្យមានការដំឡើងប្រាក់ឈ្នួល ១៥ដុល្លារ បន្ថែមទៅលើប្រាក់ឈ្នួលបច្ចុប្បន្ន ប៉ុន្តែ ក្រុមហ៊ុនពុំបានដំឡើងប្រាក់ឈ្នួលទៅតាមការទាមទារនោះឡើយ។
លោក កៅ សុខវ៉ាត បានប្រាប់ថា តំណាងភាគីក្រុមហ៊ុនស៊ីនទ្រី និងតំណាងកម្មករ ២រូប កំពុងតែជួបពិភាក្សាចរចាគ្នានៅព្រឹកថ្ងៃនេះ ដើម្បីស្វែងរកដំណោះស្រាយជុំវិញកូដកម្មរបស់ក្រុមកម្មករ។
បើតាមតំណាងកម្មករស៊ីនទ្រីរូបនេះ ក្រុមហ៊ុនបានយល់ព្រមដំឡើងប្រាក់ឈ្នួលបន្ថែមត្រឹមតែ ៨ដុល្លារប៉ុណ្ណោះ ប៉ុន្តែ ក្រុមកម្មករបានបដិសេធសំណើមួយនេះ។
កូដកម្មរបស់ក្រុមកម្មករក្រុមហ៊ុនស៊ីនទ្រី បានជំរុញឲ្យសំរាមរាប់ពាន់តោន មិនត្រូវបានប្រមូលពីលំនៅឋាន តាមដងវិថី និងអគារនានានៅក្នុងរាជធានីភ្នំពេញ។
ក្រុមហ៊ុនស៊ីនទ្រី មានបុគ្គលិក និងកម្មករបម្រើការងារសរុបដល់ទៅ ២ពាន់នាក់ ដែលប្រមូលសំរាម និងកាក់សំណល់យ៉ាងតិច ១៨០០តោនក្នុងមួយថ្ងៃៗពីលំនៅឋាន ដងវិថី និងអគារនានាក្នុងរាជធានីភ្នំពេញ៕
