ធ្លាប់តែឮថាតារាភាពយន្តពូកែសម្ដែង តែសម្រាប់ក្រុមតារាមួយក្រុមនេះ មិនត្រឹមតែមានសមត្ថភាពខ្លាំងខាងផ្នែកសម្ដែងប៉ុណ្ណោះទេ ប៉ុន្តែក៏មានថ្វីជើងល្អៗមិនអាចមើលស្រាលផងដែរ នៅពេលដែលពួកគេប្រមូលផ្ដុំគ្នាជាក្រុមបាល់ទាត់មួយក្រុម ដោយប្រើឈ្មោះខ្លួនថា «ក្រុមបាល់ទាត់តារាមហាហង្ស»។
ការប្រកួតដណ្ដើមពានដែលបានធ្វើឡើងនៅសាលាបណ្ឌិត្យសភានគរបាលជាតិកម្ពុជា កាលពីរសៀលថ្ងៃទី២៧ ខែធ្នូ ក្រុមតារាសម្ដែងមួយក្រុមនេះ ដណ្ដើមបានរបស់សាលាបណ្ឌិត្យសភានគរបាលជាតិយ៉ាងមានកត្តិយស បើទោះជាការប្រកួតនេះ មិនត្រូវបានធ្វើឡើងដោយមានក្រុមផ្សេងប្រកួតសន្សំពិន្ទុ។
លោក អ៊ិន សុភិន ប្រធានក្រុមតារាមហាហង្សបានថ្លែងបញ្ជាក់ថា ដោយសារតែល្បីល្បាញថាក្រុមតារាមហាហង្សមានសមត្ថភាពខ្លាំង តំណាងជាន់ខ្ពស់របស់សាលាបណ្ឌិត្យសភានគរបាលជាតិកម្ពុជានៅដីឥដ្ឋ ហួសគៀនស្វាយ ក៏ស្នើអោយក្រុមតារាសម្ដែងរបស់លោកមកធ្វើការប្រកួតមិត្តភាពជាមួយក្រុមសិក្ខាកាមរបស់ស្ថាប័នមួយនេះ ដោយបានសម្រេចធ្វើពានកិត្តិយសមួយទុកប្រគល់អោយអ្នកឈ្នះ។
លោកថា ការប្រកួតមួយនោះ ត្រូវបានធ្វើឡើងក្រោមវត្តមានថ្នាក់ដឹកនាំរបស់សាលាបណ្ឌិត្យសភានគរបាលជាតិ ដោយលោក និងក្រុមទាំងមូលមិនសូវមានការរំពឹងពីការដណ្ដើមបានពាននោះទេ ដោយសារតែក្រុមរបស់បណ្ឌិត្យសភានគរបាលជាតិប្រាកដពីជ័យជម្នះច្រើនជាង ទើបស្នើអោយក្រុមរបស់លោកមកប្រកួតជាលក្ខណៈមិត្តភាពលើកដំបូង ហើយថែមទាំងធ្វើពានកិត្តិយស និងប័ណ្ឌសរសើរដើម្បីប្រគល់អោយអ្នកឈ្នះទៀត។
លោក អ៊ិន សុភិន បន្តថា ភាគីម្ចាស់ផ្ទះមានប្រៀបច្រើនជាងក្រុមតារាសិល្បៈរបស់លោក ដោយសារតែទឹកដីនៃតារាងដែលបើកប្រកួតនោះថ្នឹកនឹងក្រុមរបស់គូប្រកួតច្រើនជាង ហើយលោកយល់ថា ក្រុមរបស់បណ្ឌិត្យសភាគនរបាលជាតិ ប្រសិនបើថ្នាក់ដឹកនាំរបស់ស្ថាប័នមិនមានជំនឿចិត្ត ក៏មិនឈានដល់ការភ្នាល់ ដើម្បីដណ្ដើមពានដែលរៀបចំដោយថ្នាក់ដឹកនាំរបស់ស្ថាប័ននោះឡើយ។
លោកថ្លែងអារម្មណ៍សប្បាយចិត្តដែលក្រោយការប្រកួត ស្រាប់តែក្រុមតារាមហាហង្សដណ្ដើមបានជ័យជម្នះ ខណៈដែលក្រុមរបស់លោកគឺសុទ្ធតែជាក្រុមផលិត និងតារាសម្ដែងទាំងអស់ តែលទ្ធផលចុងក្រោយបែរជាអាចយកឈ្នះលើក្រុមរបស់សាលាដីឥដ្ឋបាន ដោយក្រុមទាំងមូលទទួលបានពានកិត្តិយស និងប័ណ្ឌសរសើរក្នុងនាមជាអ្នកឈ្នះ។
ការប្រកួតនៅក្នុងថ្ងៃនោះ លោកថារយៈពេល៩០នាទី បានត្រឹមតែលទ្ធផល១ស្មើប៉ុណ្ណោះ ប៉ុន្តែនៅពេលតម្រូវអោយស៊ុតប៉េណាំងទី ក្រុមរបស់លោកក៏មានសំណាងស៊ុតចូលទីបាន៥គ្រាប់ ខណៈដែលក្រុមរបស់សាលាដីឥដ្ឋ ឬសាលារាជបណ្ឌិត្យសភានគរបាលជាតិកម្ពុជា បានត្រឹមតែ៤គ្រាប់។
លោក អ៊ិន សុភិន អះអាងថា ក្រុមតារាមហាហង្សនៅក្នុងថ្ងៃនោះមានតារាមកលេងតែប៉ុន្មានរូបប៉ុណ្ណោះ ក្នុងចំណោមតារាសម្ដែងជាង១០រូប ដែលសុទ្ធតែជាក្រុមស្នូលប្រចាំក្រុម ដោយសារតែហេតុផលការកំណត់ថ្ងៃប្រកួតត្រូវចំសមាជិកក្រុមជាប់ថត។ តារាដែលបានបង្ហាញខ្លួនចូលប្រកួតនៅក្នុងថ្ងៃនោះរួមមានតែ តារាសម្ដែងលោក ត្រាយ៉ាកូ (អ្នកចាំទី), លោក ភឹម តារាវិបុល, លោក ហូ ប៉ូសេង ឬ ហូ នរមង្គល, តារាសម្ដែងលោក តុលា, លោក យុទ្ធ ឋានៈ, តារាសម្ដែងលោក ស្រេន វុធថា, និងហ្វ្រេស៊ីប៊យ លោក ចាន់ រតនា ដោយក្រៅពីនោះសុទ្ធតែជាក្រុមការងារផលិត៕